კიბოს ახალი პერსონალიზებული ვაქცინა უსაფრთხოა და ფილტვის, შარდის ბუშტისა და სხვა ხშირად განმეორებადი სიმსივნის მქონე პაციენტებში დამაიმედებელი შედეგი აჩვენა. პირველი ფაზის მეცნიერებმა კლინიკური კვლევის შედეგები „კიბოს კვლევის ამერიკის ასოციაციის“ ვირტუალურ შეხვედრაზე წარმოადგინეს.
მართალია, იმუნოთერაპია კიბოს მკურნალობის რევოლუციური გზაა, თუმცა, პაციენტების უმეტესი ნაწილი ამ თერაპიით შესამჩნევ კლინიკურ პასუხს ვერ იღებს. რაც შეეხება კიბოს ვაქცინებს, ისინი ძირითადად სიმსივნის სპეციფიკურ იმ სამიზნეებს აერთიანებს, რომელთა ამოცნობისა და თავდასხმის დასწავლა იმუნურ სისტემას შეუძლია. ამის შემდეგ კი კიბო აღარ დაგემართებათ. ვაქცინა ასევე ადიუვანტს (დამხმარე) შეიცავს, რომელიც იმუნურ სისტემას მაქსიმალურ ეფექტურობამდე „წვრთნის“.
ამ კვლევაში 13-მა პაციენტმა პერსონალიზებული ვაქცინა მიიღო. 10 პაციენტს მყარი სიმსივნე ჰქონდა, ხოლო სამს – მრავლობითი მიელომა.
ვაქცინა პაციენტის სპეციფიკური სიმსივნის გენეტიკისა და ჩანასახოვანი ხაზის დნმ-ის სეკვენირებით შეიქმნა. შემდეგ, მკვლევარებმა სიმსივნეზე სპეციფიკური სამიზნეები გაშიფრეს, რითიც იწინასწარმეტყველეს, ამოიცნობდა თუ არა პაციენტის იმუნური სისტემა ვაქცინის სამიზნეებს. შემდეგი ნაბიჯი იყო OpenVax-ის კომპიუტერული სისტემის გამოყენება, რათა უფრო დაევიწროვებინათ ეს სამიზნეები და შემდეგ ყველაზე სიცოცხლისუნარიანები პერსონალიზებულ ვაქცინაში მოეთავსებინათ.
მიუხედავად იმისა, რომ პირველი ფაზის კვლევა ვაქცინის უსაფრთხოების ტესტი უფრო იყო, რომელმაც მკვლევარების იმედი გაამართლა, მან გრძელვადიან პერსპექტივაში ზოგიერთ პაციენტში საკმაოდ დამაიმედებელი შედეგები აჩვენა.
აქვე უნდა აღინიშნოს, რომ მკაცრი დასკვნებისგან ჯერჯერობით თავი უნდა შევიკავოთ, რადგან პირველი ფაზის კვლევა ძალიან ცოტა ადამიანს მოიცავდა და, აქედან გამომდინარე, მისი უსაფრთხოება და ეფექტურობა ზოგად პოპულაციაზე დადასტურებული არ არის.
ახალგაზრდა ანალიტიკოსთა და მეცნიერთა დარბაზი ,,დოქტრინა
0
