კლიმატის ცვლილების გამო მსოფლიოში, განსაკუთრებით კი ევროპაში გაცილებით სწრაფად ვრცელდება ისეთი დაავადებები, რაც კოღოებს და ასევე სხვა მწერებს გადააქვთ. ლაპარაკია ისეთ დაავადებებზე, როგორიცაა მალარია და დენგეს ცხელება. მათი პრევალენტობა ბოლო 80 წლის განმავლობაში საგრძნობად გაიზარდა, რადგან გლობალურმა დათბობამ მათ გავრცელებას უფრო თბილი და ნოტიო პირობები შეუქმნა.
ჯანმრთელობის მდგრადობის გლობალური ჯგუფის ხელმძღვანელის, რეიჩელ ლოუს განცხადებით, უახლოესი რამდენიმე ათეული წლის განმავლობაში, კოღოებით გამოწვეული დაავადებები გავრცელდება ჩრდილოეთ ევროპის, აზიის, ჩრდილოეთ ამერიკისა და ავსტრალიის ამჟამად დაუზარალებელ ნაწილებში.
“გლობალურ დათბობა ნიშნავს, რომ მალარიისა და დენგეს გავრცელების რისკი იზრდება. მსოფლიო ამისთვის მზად უნდა იყოს. რეალობა ის არის, რომ ცხელი სეზონები კოღოებით გადამდები დაავადებების გავრცელებას ხელს შეუწყობს. დენგე ძირითადად გვხვდება ტროპიკულ და სუბტროპიკულ რეგიონებში, იგი აზიურ ვეფხვის კოღოს გადააქვს ( Aedes albopictus), ეს მწერი უკვე ევროპის 13 ქვეყანაში დაფიქსირდა: იტალია, საფრანგეთი, ესპანეთი, მალტა, მონაკო, სან მარინო, გიბრალტარი, შვეიცარია, გერმანია, ავსტრია, საბერძნეთი და პორტუგალია”, – ამბობს ლოუ.
2000 წელს მსოფლიოში დენგეს ცხელების 500 000 შემთხვევა დაფიქსირდა, 2019 წლის მონაცემებით კი – რაოდენობა 5 მილიონს აღემატებოდა.წყარო
- დენგეს ცხელება – ინფექციური გადამდები დაავადება, რომელიც ორი კლინიკური ფორმით მიმდინარეობს: დენგეს კლასიკური ცხელება და დენგეს ჰემორაგიული ცხელება. დაავადების გამომწვევია რნმ შემცველი არბოვირუსი, რომლის გადამტანიც კოღოები არიან. ამჟამად ეს დაავადება აფრიკის, ამერიკის, ხმელთაშუა ზღვისპირეთის აღმოსავლეთის და წყნარი ოკეანეს დასავლეთ ნაწილის 100 ქვეყნისათვის ენდემურ დაავადებას წარმოადგენს
- მალარია – მწვავე პროტოზოული დაავადება, რომელიც ხასიათდება ცხელების შეტევებით, ანემიით, ღვიძლისა და ელენთის გადიდებით; შესაძლებელია რეციდივები. დაავადებას იწვევს ერთუჯრედიანი ორგანიზმი – პლაზმოდიუმი, რომელიც გადააქვს მალარიის კოღოს – ანოფელესს.
ანალიტიკოსთა და მეცნიერთა დარბაზი “დოქტრინა”
0
