რამაზ დათიაშვილი დღეს მსოფლიოში აღიარებული, ერთ-ერთი ყველაზე ცნობილი პლასტიკური ქირურგია, რომელმაც 35 წლის წინ, სამი წლის გოგონას მოკვეთილი კიდურების სრულად რეპლანტირება შეძლო და დღესაც აოცებს მსმენელს საკუთარი ისტორიით. ამჟამად, ქართველი ექიმი აშშ-ში მოღვაწეობს და სამეცნიერო საქმიანობითაც არის დაკავებული, ექიმი არაერთხელ მოხვედრილა უცხოური მედიის ყურადღების ობიექტივში, ამჯერად კი, მისი დაუჯერებელი ისტორიით ნიუ-ჯერსის საინფორმაციო მაუწყებელი “NJTV-ი” დაინტერესდა.
რამაზ დათიაშვილი, მოსკოვის სამედიცინო უნივერსიტეტის დასრულების შემდეგ მალევე, 28 წლის ასაკში გახდა მოსკოვის 51-ე საავადმყოფოს მიკროქირურგიული დეპარტამენტის უფროსი, 1978 წელს დოქტორის წოდებაც მიიღო და აკადემიური მოღვაწეობა მოსკოვის ეროვნულ ქირურგიულ ცენტრში გააგრძელა. დათიაშვილი გახდა წამყვანი ექსპერტი მიკროქირურგიის სფეროში და 1988 წელს მიენიჭა რუსეთში უმაღლესი, მედიცინის მეცნიერებათა დოქტორის წოდებაც.
მაგრამ, ისტორია, რომელმაც ქართველ ქირურგს ყველაზე დიდი აღიარება და ნდობა მოუპოვა, 1983 წლის ივნისში, ლიტვაში განვითარდა, როდესაც უბედური შემთხვევის შედეგად, მამამ თიბვის დროს, საკუთარ გოგონას (რასა), ორივე ქვედაკიდური მოსწყვიტა, მოთხოვნა მისთვის კიდურების რეპლანტაციის შესახებ, ხუთი ათასი კილომეტრის დაშორებით, მოსკოვში, სწორედ ექიმ დათიაშვილს მიუვიდა, რომელთანაც პაციენტის გადაყვანა კომერციული თვითმფრინავით მოხერხდა და ინციდენტიდან მხოლოდ 12 საათის შემდეგ გახდა შესაძლებელი ოპერაციის გაკეთება, მაგრამ, დროის დანაკარგის მიუხედავად, დათიაშვილმა ოპერაციას წარმატებით გაართვა თავი და ბავშვს კიდურები დაუბრუნა.
ახალგაზრდა ექიმს ოპერაციამდე მრავალი დაბრკოლების გადალახვა მოუხდა, რადგან მისმა კოლეგებმა უარი თქვეს ბავშვის ანესთეზიაზე, ზრდასრულთა საავადმყოფო კი, სადაც ის იმყოფებოდა, მოითხოვდა, რომ გოგონასთვის ოპერაციის ბავშვთა საავადმყოფოში ჩაეტარებინათ და პასუხისმგებლობაც მათ აეღოთ. საბოლოოდ, მიკროსკოპის საათნახევრიანი ლოდინის შემდეგ, დათიაშვილმა შეძლო დაეწყო ოპერაცია, „როდესაც ამპუტირებული კიდურები დავინახე, ისინი გაყინული, ხესავით მყარი იყო და წამით დავფიქრდი, ღირს კი ამის გაკეთება?! რადგან თუნდაც წარმატებული რეპლანტაციის შემთხვევაშიც, პაციენტის დაკარგვის რისკი საკმაოდ მაღალი იყო“ -აღნიშნავს დათიაშვილი.
დათიაშვილი ცდილობდა შეერთებინა გოგონას არტერიები და ვენები, როცა მის ორგანიზმს სისხლი მიეწოდებოდა, ყველაზე მნიშვნელოვანი ამპუტირებულ ნაწილებში ჟანგბადისა და სისხლის ნაკლებობის გამო განვითარებული ტოქსინების რასას ორგანიზმისთვის უვნებლობაში დარწმუნება იყო, საბედნიეროდ, ცხრასაათიანმა ოპერაციამ წარმატებით ჩაიარა და უკანასკნელი ნაკერის დადების შემდეგ, გოგონას პატარა კიდური ექიმის ხელში გათბა, ექიმის საპასუხისმგებლო მისიაც წარმატებით შესრულდა და დღეს რასა მინიმალური შეზღუდვებით გერმანიაში ცხოვრობს საკუთარ მეუღლესთან ერთად და როგორც დათიაშვილი აღნიშნავს, მისთვის, როგორც ქირურგისთვის, ეს ყველაზე დიდი ჯილდოა.
დღეს რამაზ დათიაშვილი პლასტიკური ქირურგიის ამერიკული საზოგადოების წევრია და აქტიურად მუშაობს სხვადასხვა ნაშრომზეც, მას ეკუთვნის 80-ზე მეტი სამეცნიერო პუბლიკაცია, მათ შორის სახემძღვანელოები თუ სტატიები მსოფლიოს წამყვან გამოცემებში. დათიაშვილი ნიუ-ჯერსის სამედიცინო სასწავლებელშიც ასწავლის და იშვიათად თუ საუბრობს იმაზე, თუ როგორ დაუბრუნა პატარა გოგონას კიდურები, მაგრამ დარწმუნებულია რომ ადამიანის შესაძლებლობები უსაზღვროა, რისი კარგი მაგალითადაც სწორედ თავად არის.
წყარო: NJTV NEWS
ახალგაზრდა ანალიტიკოსთა და მეცნიერთა დარბაზი ,,დოქტრინა“
0
