27 მარტს მიანმარში სამხედროები „შეიარაღებული ძალების დღეს“ აღნიშნავდნენ, როდესაც მომიტინგეები ისევ სამხედრო გადატრიალების წინააღმდეგ საპროტესტო აქციებს მართავდნენ, მათ შორის დაპირისპირებას კი 100 ადამიანი ემსხვერპლა. მიანმარში განვითარებულ მოვლენებზე ზუსტად საუბარი ძნელია, მაგრამ ყველაზე სისხლისმღვრელი დღის შემდეგ ადგილობრივებისა და მედიის განცხადებით, სამხედროებმა ცეცხლი გახსნეს 40-ზე მეტ ადგილას, რასაც ათობით მომიტინგის სიცოცხლე შეეწირა.
მსხვერპლთა შორის არიან ბავშვებიც. 12 წლის გოგონას მშობელი ამბობს, რომ როდესაც შეიტყო სამხედროების მოსვლის შესახებ, სასწრაფოდ მივარდა კარის დასახურად, მაგრამ გვიანი იყო, რამდენიმე წუთის შემდეგ უკვე ქალიშვილის სისხლით დასვრილი სხეული ეჭირა.
პირველი თებერვლის სამხედრო გადატრიალების შემდეგ მსხვერპლთა საერთო რაოდენობამ 400-ს გადააჭარბა. უკან დახევას არცერთი მხარე არ აპირებს, არც სამხედროები და არც დემოკრატიული მოძრაობის წევრები. სამხედროების ლიდერის, მინ ან ჰლაინმის განცხადებით, ისინი ქვეყანაში დემოკრატის, მშვიდობისა და სტაბილურობის მიღწევას ცდილობენ. მოძრაობას კი, რომელსაც ახალგაზრდები ხელმძღვანელობენ, გადაწყვეტილი აქვს მიანმარი სამუდამოდ გაათავისუფლოს სამხედრო დიქტატურისგან.
აშშ-მა და ევროკავშირმა მიანმარის სამხედრო გადატრიალებასთან დაკავშირებულ პირებს სანქციები დაუწესეს, აქტივები გაუყინეს და სავიზო შეზღუდვები დაუწესეს.
მასალა მოამზადა: ნინი ხეცურიანმა
ახალგაზრდა ანალიტიკოსთა და მეცნიერთა დარბაზი ,,დოქტრინა
0
