ეკოლოგია

როგორც ვიცით, პლასტმასი ჩვენი პლანეტისთვის ყველაზე დიდი გამოწვევაა, ბევრმა კომპანიამ გამოწვევის საპასუხოდ თავიანთ პროდუქციაში ცვლილებები შეიტანა და ალტერნატიული შეფუთვა მოძებნა. როგორც ჩანს, გამონაკლისი არც Coca-Cola იქნება, რადგან კომპანიამ გადაწყვიტა პლასტმასის ნაცვლად მდგრადი ქაღალდის ბოთლი გამოუშვას. ყოველწლიურად Coca-Cola იყენებს 3 მილიონ ტონაზე მეტ პლასტმასის შეფუთვას, რომლის საკმაოდ დიდი ნაწილი არ გადამუშავდება.
ბოთლის პროტოტიპი დაამზადა დანიურმა კომპანია Paboco-მ(Paper Bottle Company). 2021 წლის ზაფხულს იგეგმება უნგრეთში Coca-Cola-ს პირველი ქაღალდის ბოთლის შემოწმება. თავდაპირველად კომპანია მხოლოდ 200 000 ბოთლის ჩაშვებას გეგმავს, რომლითაც გაიყიდება სასმელი, სახელწოდებით Adez, რათა შეამოწმონ ქაღალდის ბოთლი რეალურ სამყაროში და მოსახლეობის დამოკიდებულება.
Coca-Cola-ს ბოთლის ვიზუალურ მხარეზე ბევრი კითხვა გაჩნდა, თუმცა ამ დროისთვის ინფორმაცია უცნობია, თანაც პროდუქტის ოფიციალურ ჩაშვებამდე დიდი დროა, რადგან ვარაუდობენ, რომ ექსპერიმენტს რამდენიმე წელი დასჭირდება.
კომპანია ოფიციალურ საიტზე წერს: “წარმოიდგინეთ, რომ თქვენს მაღაზიაში ერთ დღეს გაქრა პლასტმასის შეფუთვა და საბოლოოდ, ყველა მინის ბოთლი და ლითონის კონსერვები, რომ ყველა შეფუთვა დამზადებულია განახლებადი მასალისგან, რომელთა გადამუშავება ან ბუნებაში დაბრუნება შესაძლებელია ზიანის მიყენების გარეშე.”

წყარო: Fastcompany
მასალა მოამზადა: ნინი ხეცურიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”

სან-პაულო მთელ პლანეტაზე ყველაზე სუფთა ქალაქია. სუფთა იმ თვალსაზრისით, რომ ქალაქში არცერთი რეკლამა არაა.

ურეკლამო ქალაქის ისტორია 2006 წელს იწყება, როდესაც მერმა კანონპროექტი “სუფთა ქალაქი” დაამტკიცა. ზუსტად 15 000 სარეკლამო ბანერი და პოსტერი გაქრა, რაც ქალაქს 8 მილიონი დოლარი დაუჯდა.

სარეკლამო კომპანიები, რომლებიც სან-პაულოში მუშაობდნენ 133 მილიონი დოლარი დაკარგეს, 20 000 ადამიანი სამსახურის გარეშე დარჩა და ეს ყველაფერი მხოლოდ იმის გამო, რომ ქალაქმა რეკლამაზე უარი თქვა.

“თანამედროვე ქუჩა რეკლამის გარეშე ერთი დიდი ბეტონის ჯუნგლებია” ამ შინაარსის სიტყვით გამოდიოდნენ რეკლამის დამცველები და მოითხოვდნენ კანონის შეცვლას. მიუხედავად მათი დიდი მცდელობისა, კანონი არა მხოლოდ სან-პაულოში, არამედ უკვე მსოფლიოს 160 ქალაქში მოქმედებს.

ახალგაზრდა ანალიტიკოსთა და მეცნიერთა დარბაზი ,,დოქტრინა”

კორონავირუსი მსოფლიო ოკეანეს კატასტროფული ზიანს აყენებს. ორგანიზაცია Oceans Asia-ს მონაცემებით, მიმდინარე წელს ოკეანეებში სავარაუდოდ 1,5 მილიარდზე მეტი სამედიცინო პირბადე მოხვდა, რაც იმას ნიშნავს, რომ მსოფლიო ოკეანე დამატებით 4 680-6 240 ტონამდე პლასტიკური ნაგვით დაბინძურდა.

როგორც ეკოლოგები განმარტავენ, პირბადეები პოლიპროპილენით არის დამზადებული, რომლის სრულ გახრწნას ნახევარი საუკუნე სჭირდება. დროთა განმავლობაში ის მცირე პლასტიკურ ნაწილაკებად იშლება, რაც ოკეანის ეკოსისტემას სერიოზულ საფრთხეს უქმნის.

ახალგაზრდა ანალიტიკოსთა და მეცნიერთა დარბაზი – ,,დოქტრინა”

“მოსახლეობისთვის ნარჩენების სეპარირება სავალდებულო გახდება”, – ამის შესახებ პარლამენტის გარემოს დაცვის კომიტეტის თავმჯდომარემ მაია ბითაძემ გადაცემა “Forbes კვირასთან” განაცხადა.

მაია ბითაძის თქმით, შესაბამისი საკანონმდებლო ცვლილებების დამტკიცებას პარლამენტი მომდევნო წელს გეგმავს, თუმცა, მისივე განმარტებით, ეს ვალდებულება მთლიანად საქართველოს მოსახლეობაზე ეტაპობრივად გავრცელდება.

კომიტეტის თავმჯდომარე ამბობს, რომ ნარჩენების შესახებ კოდექსი წლების წინ არის მიღებული, რომელიც მსგავსი ვალდებულების შემოღებასაც ითვალისწინებს, თუმცა, საკანონმდებლო დონეზე ამას დაზუსტება ესაჭიროება.

მაია ბითაძის თქმით, სანამ ნარჩენების სეპარაცია სავალდებულო გახდება, მანამდე სახელმწიფომ შესაბამისი ინფრასტრქუტურა უნდა მოაწყოს, რაც თბილისში უკვე დაწყებულია – ჭავაჭავაძის გამზირზე თბილისის მერიამ უკვე მოაწყო მიწისქვეშა ნაგვის ურნები, რომლებიც მოგვიანებით ამოქმედდება.

კომიტეტის თავმჯდომარე ამბობს, რომ ნარჩენების განცალკევების წასახალისებლად მოქალაქეებისთვის გარკვეული შეღავათების დაწესებაც იგეგმება.

“ჯერ მოსახლეობისგან ნარჩენების სეპარირებულად ამოღება არ ხდება, თუმცა, ამ კუთხითაც იგეგმება საკანონმდებლო ცვლილებები, რომელიც მომავალ წელს დაინიცირდება. ბუნებრივია, ეს რთული გზაა, თუმცა, მაგალითად ევროკავშირში არსებობს ხელშემწყობი მექანიზმები – სახადასახადო შეღავათები იმ მოსახლეობისთვის, რომლებიც დაასეპარირებენ ნარჩენებს”, – აცხადებს მაია ბითაძე.

ახალგაზრდა ანალიტიკოსთა და მეცნიერთა დარბაზი – ,,დოქტრინა”