განათლება

გამოცდების ეროვნული ცენტრის ხელმძღვანელის, სოფო გორგოძის განცხადებით, 2020 წლიდან ერთიანი ეროვნული გამოცდების ჩაბარება სამ სავალდებულო საგანში იქნება: ქართული ენა და ლიტერატურა, უცხო ენა და მესამე იქნება იმ პროფილის მიმართულებით, რა სპეციალობასაც აბიტურიენტი აირჩევს. კერძოდ, ტექნიკური მიმართულებების შემთხვევაში, აბიტურიენტები ჩააბარებენ მათემატიკას, ხოლო ჰუმანიტარული მიმართულებების შემთხვევაში – ისტორიას.

რაც შეეხება ზოგადი უნარების გამოცდას, მისი ან სხვა პროფილური გამოცდის დამატების უფლება უმაღლესმა სასწავლებლებმა მიიღეს.

დღეს ასევე ცნობილი გახდა, რომ გამოცდების ეროვნული ცენტრის ხელმძღვანელის, სოფო გორგოძის განცხადებით, 2020 წლიდან სკოლებში გამოსაშვები გამოცდები მოიხსნება.

2020 წელს მე-11 და მე-12 კლასელებისთვის სკოლის გამოსაშვები გამოცდები მოიხსნება. ამის შესახებ შეფასებისა და გამოცდების ეროვნული ცენტრის დირექტორმა სოფო გორგოძემ განათლების რეფორმის ფარგლებში საქართველოს განათლების, მეცნიერების, კულტურისა და სპორტის მინისტრ მიხეილ ბატიაშვილთან ერთად გამართულ პრეზენტაციაზე განაცხადა.

მისივე თქმით, 2020 წელს ქართული ენისა და ლიტერატურისა და უცხო ენის გამოცდები სავალდებულო იქნება ყველასთვის. ამასთან, მესამე სავალდებულო საგანი განისაზღვრება უმაღლესი სასწავლებლის პროგრამების მიხედვით: მათემატიკა- ტექნიკური მიმართულებების შემთხვევაში, ისტორია – ჰუმანიტარული მიმართულების შემთხვევაში.

ასევე, უნივერსიტეტებს ექნებათ უფლება, დაამატონ პროგრამის რელევანტური არჩევითი გამოცდა ზოგადი უნარების გამოცდის ჩათვლით.

10-15 იანვარს, ყაზახეთის ქალაქ ალმათიში ჟაუტიკოვის სახელობის მე-15 საერთაშორისო ოლიმპიადა გაიმართა. ინფორმაციას განათლების, მეცნიერების, კულტურისა და სპორტის სამინისტრო ავრცელებს,

ოლიმპიადაში 18 ქვეყნის 82-მა გუნდმა, მათ შორის თბილისიდან კომაროვის და ვეკუას სახელობის, ხოლო ქუთაისიდან რაზმაძის ფიზიკა-მათემატიკური სკოლის გუნდებმა მიიღეს მონაწილეობა.

საქართველოს წარმომადგენლებმა ინდივიდუალურ და გუნდურ შეჯიბრებებში 4 ოქროს, 3 ვერცხლის და 3 ბრინჯაოს მედალი მოიპოვეს.

მათ შორის კომაროველმა ოქროსმედალოსანმა ნიკა ბირკაძემ ინფორმატიკაში მაქსიმალური 600 ქულის მოპოვება შეძლო.

„თიბისი“ 2019 წელს ახალი პროექტით იწყებს, მომავალ წელს 200-მდე ნიჭიერი ახალგაზრდა ყოველთვიურ სტიპენდიას მიიღებს.

სტიპენდია გადაეცემათ ბავშვებს, რომლებიც გამოირჩევიან თავიანთი ნიჭით ხელოვნებაში, მეცნიერებასა თუ სპორტში, თუმცა არ აქვთ ამ ნიჭის გამოვლენისათვის სათანადო მხარდაჭერა.

როგორც კომპანიის მიერ გავრცელებულ ინფორმაციაშია აღნიშნული, სხვადასხვა ორგანიზაციასთან და კერძო პირთან მუშაობის შედეგად, შეირჩა „თიბისის“ ბენეფიციარი 200-მდე ბავშვი.

ამასთან, პროექტი მთელ საქართველოს მოიცავს. კერძოდ, ჭუბერს, გორის წნორს, წეროვანს, თბილისს, ლექოკს, ბარისახოს, უწერას, არახვეთს, ქუთაისს, კარალეთს, ზუგდიდს, ბათუმს, ხონს, ამბროლაურს, სენაკს, პატარძეულსა და სხვას.

„საქართველო ტალანტების ქვეყანაა, მაგრამ სამწუხაროდ, ძალიან ბევრი ნიჭიერი ახალგაზრდა დაიკარგა იმის გამო, რომ არ ჰქონდა ხელშეწყობა. ქველმოქმედებას არ აქვს საზღვარი. ჩვენ ვფიქრობთ, რომ ნიჭიერი ახალგაზრდების მხარდაჭერა, მათი შესაძლებლობების საზოგადოებისთვის ჩვენება, მათ მიმართ გამოჩენილი ყურადღება ძალიან მნიშვნელოვანი საქმეა. ეს უნდა იყოს არამარტო ჩვენი, არამედ მთელი ქვეყნის პრიორიტეტი“, – განაცხადა „თიბისის ბანკის“ სამეთვალყურეო საბჭოს თავმჯდომარემ მამუკა ხაზარაძემ.

აღსანიშნავია, რომ ამ ინიციატივის შესახებ მამუკა ხაზარაძემ „თიბისის“ კორპორაციული სოციალური პასუხისმგებლობის ანგარიშის წარდგენისას ისაუბრა. ღონისძიება „თიბისი გალერეაში გაიმართა“, რომელზეც საზოგადოების წინაშე ნიჭიერი ახალგაზრდა მუსიკოსები წარდგნენ.

ახალგაზრდა ანალიტიკოსთა და მეცნიერთა დარბაზი ,,დოქტინა”

ქართველი მასწავლებელი ლადო აფხაზავა მსოფლიოს 50 საუკეთესო მასწავლებელს შორისაა.

ამის შესახებ ინფორმაციას “მასწავლებლის გლობალური ჯილდოს” საიტი აქვეყნებს.

“ლადოს მიზანია მოსწავლეები აქტიურ მოქალაქეებად და თანამედროვე საზოგადოების ლიდერებად აღზარდოს, რათა ისინი ჩამოყალიბდნენ დამოუკიდებელ, კრიტიკულად მოაზროვნე პიროვნებებად, შეძლონ საკუთარი აზრის გამოხატვა, იდეების გენერირება და საკუთარი ინიციატივების განხორციელება. 2003 წელს მან დააფუძნა ბანაკი, სადაც მოსწავლეები არაფორმალურ განათლებას იღებდნენ. ბავშვებმა ბანაკს „ლადოს ბანაკი“ უწოდეს.” – აღნიშნულია “მასწავლებლის ეროვნული ჯილდოს” ვებგვერდზე.

მასწავლებლის მსოფლიო ჯილდოს მიზანი, მასწავლებლის პროფესიის პოპულარიზაციის ხელშეწყობა და მსოფლიოს სხვადასხვა ქვეყნიდან ყველაზე გამორჩეული, შთამაგონებელი და მონდომებული მასწავლებლის პოვნაა, რომელიც ჯილდოდ მილიონ დოლარს მიიღებს. წელს პირველად, ასეთ მასწავლებელთა შორის ჯილდოს ადმინისტრაციამ ქართველი მასწავლებელი დაასახელა ჩიბათიდან, რომელმაც ქართულ საზოგადოებას ძალიან ბევრი აქტივობით დაამახსოვრა თავი.