განათლება

2018-2019 სასწავლო წლისთვის პირველკლასელთა რეგისტრაცია 10 აპრილს დაიწყება. ვადებისა და ეტაპების შესახებ ბრძანებას განათლებისა და მეცნიერების მინისტრმა მიხეილ ჩხენკელმა ხელი მოაწერა.

ბრძანებით დადგინდა ზოგადსაგანმანათლებლო დაწესებულებებში პირველ კლასში მოსწავლის ჩარიცხვის ეტაპები. edu.aris.ge-ს ცნობით, ეტაპები შემდეგნაირია:

I ეტაპი – რეგისტრაცია დაიწყება 2018 წლის 10 აპრილს და 27 აპრილის ჩათვლით გაგრძელდბეა. პირველ ეტაპზე რეგისტრაცია განხორციელდება სკოლაში, სადაც რეგისტრირდებიან ის მოსწავლეები: რომლის და-ძმაც სწავლობს ამ სკოლაში; რომლის მშობელიც სკოლის თანამშრომელია (მშობელი და არა ბებია ან ბაბუა); რომლის ოჯახიდანაც ერთდროულად ორი ან მეტი ბავშვი შედის პირველ კლასში.

ამასთან, I ეტაპზე რეგისტრირებული მოსწავლეების ჩასარიცხად შესაბამისი დოკუმენტები სკოლაში 30 აპრილიდან 7 მაისის ჩათვლით უნდა წარადგინონ.

II ეტაპი – საყოველთაო ელექტრონული რეგისტრაცია, რომელიც დაიწყება 8 მაისს და გაგრძელდება 8 ივნისის ჩათვლით.

ამ ეტაპზე შესაძლებელი იქნება იმ ბავშვების რეგისტრაცია, ვინც სკოლაში შესვლის ასაკს აკმაყოფილებს. რეგისტრაცია განხორციელდება განათლების მართვის საინფორმაციო სისტემის ოფიციალურ ვებგვერდზე WWW.EMIS.GE. რეგისტრირდებიან ის მოსწავლეები, რომლებიც ვერ დარეგისტრირდებიან I ეტაპზე. რეგისტრაცია უნდა გაიაროთ სსიპ განათლების მართვის საინფორმაციო სისტემის ვებგვერდზე ელექტრონულად.

II ეტაპზე რეგისტრირებული მოსწავლის ჩასარიცხად აუცილებელი დოკუმენტების 11 ივნისიდან 30 ივნისის ჩათვლით იქნება შესაძლებელი. (პირველ და მეორე ეტაპზე მოსწავლის ჩასარიცხად აუცილებელი დოკუმენტაციის წარუდგენლობის შემთხვევაში, რეგისტრაცია ავტომატურად უქმდება).

III ეტაპი – ეს ეტაპი II ეტაპის დასრულების შემდგომ გამოთავისუფლებულ ვაკანტურ ადგილებზე მოსწავლეთა რეგისტრაციას გულისხმობს. რა თქმა უნდა, მესამე ეტაპზეც მოსწავლის ჩასარიცხად აუცილებელია დოკუმენტაციის წარდგენაც. მესამე ეტაპზე დარეგისტრირების მსურველები დოკუმენტაციას წარადგენენ უშუალოდ სკოლაში მისვლის დროს. საბუთების წარდგენა იწარმოებს 2018 წლის 2 ივლისიდან 2018 წლის 16 ივლისის ჩათვლით.

ახალგაზრდა ანალიტიკოსთა და მეცნიერთა დარბაზი ,,დოქტრინა”

2018 წლის ერთიან ეროვნულ გამოცდებზე აბიტურიენტს საკუთარი კალმის გამოყენება შეეძლება, არჩევით საგნებში გამოცდა მხოლოდ ქართულ ენაზე ჩატარდება, ასევე, ზოგადი უნარების ტესტის ფორმატი მცირედ განსხვავებული იქნება. განხორციელებული ცვლილებების შესახებ სტატიას “სამხრეთის კარიბჭე” ავრცელებს.

მიმდინარე წელს ცენტრი აპლიკანტებს საშუალებას აძლევს, სურვილის შემთხვევაში, საკუთარი გელიანი (ტუშის) კალამი შეიტანონ გამოცდაზე.

ასევე, აბიტურიენტებს პროგრამებზე განაცხადების რაოდენობის შესახებ ინფორმაციის გაცნობა სპეციალური სისტემის მეშვეობით შეეძლებათ – რეგისტრაციის დაწყებიდან მოქმედებს გვერდი, სადაც განთავსებულია ყოველდღიურად განახლებადი ინფორმაცია კონკრეტულ პროგრამებზე განაცხადების რაოდენობის შესახებ.

გარდა ამისა, არჩევით საგნებში გამოცდა, მხოლოდ ქართულ ენაზე ჩატარდება–აბიტურიენტები არჩევით გამოცდებზე ტესტირებას რუსულ ენაზე ვეღარ გაივლიან.

2018 წლის ერთიანი ეროვნული გამოცდებისათვის ზოგადი უნარების ტესტის ფორმატი მცირედით შეიცვალა. ტესტში ანალოგიები არა დამოუკიდებელი ბლოკის სახით, არამედ წაკითხული ტექსტის გააზრების დავალებების ბლოკთან ერთად იქნება წარმოდგენილი.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ივანე ჯავახიშვილის სახელობის თბილისის სახელმწიფო უნივერსიტეტმა ტენდერი გამოაცხადა, რომლის მიხედვითაც, მეორე სასწავლო კორპუსის რეაბილიტაციისთვის 5 829 877 ლარი დაიხარჯება.
ეს თანხა მოხმარდება ფასადის, ფანჯრების, გადახურვის, გათბობისა და სანიტარული კვანძების შიდა და-გარეგაყვანილობის სარემონტო სამუშაოებს.
სავარაუდოდ, მეორე კორპუსის სარეაბილიტაციო სამუშაოები ზაფხულში დაიწყება.

ახალგაზრდა ანალიტიკოსთა და მეცნიერთა დარბაზი ,,დოქტრინა”

მეგი დიასამიძე 17 წლის წარმატებული ახალგაზრდაა ქ. ბათუმის #15 საჯარო სკოლიდან, რომელიც კიდევ ერთ ქართველ მოსწავლესთან – ლუკა ჯაფარიძესთან ერთად, საერთაშორისო კოლეჯების კონკურსის გამარჯვებული გახდა და დღეს საყვარელ პროფესიას გერმანიაში ეუფლება, საინტერესო აქტივობებისა და უცხოეთში ადრეულ ასაკშივე მიღებული გამოცდილების შესახებ მეგი თავად გვიამბობს.

-მეგი, რას გულისხმობდა საერთაშორისო კოლეჯების კონკურსი და რა ეტაპების გავლა მოგიწია, სანამ ფინალამდე მიხვიდოდი?
-თავიდან პროგრამის შესახებ ბევრი არაფერი ვიცოდი. მოგვიანებით, როცა პირველი ტური გადავლახე, წინა წლების გამარჯვებულთა ძიება დავიწყე რჩევების მისაღებად და სწორედ აქედან აღმოვაჩინე, რომ ჩემს სამეგობრო წრეში საკმაოდ ბევრმა ადამიანმა იცოდა ამ პროგრამის შესახებ. პირველი ტური ონლაინაპლიკაციაა, რომელსაც თან ერთვის 2 სავალდებულო სარეკომენდაციო წერილი, 2 ესე და კითხვები, რომელებიც ეხმარება კომიტეტს შენს უკეთესად გაცნობაში. მეორე ტური ონლაინგასაუბრებას გულისხმობს და თუ მას წარმატებით გადალახავ, უკვე მესამე ტურში წყდება საბოლოოდ შენი ბედი, რომელიც რამდენიმე ინტერვიუს, ესესა და ჯგუფურ სამუშაოს მოიცავდა.
-როგორც ვიცი, ყოველთვის გინდოდა გერმანიაში სწავლა სამედიცინო განხრით და დღეს ეს მიზანიც განახორციელე, რამდენად რთული იყო შენთვის ეს ყველაფერი?
-საქართველოში ყოფნის დროს გერმანიაში სწავლა წარმოუდგენელი მეჩვენებოდა და, შესაბამისად, ახლო მომავალში იქ წასვლას ნამდვილად არ ვგეგმავდი. კომიტეტმა გერმანიაში გამოყოფილ 1 ადგილში მე ჩამსვა და, შესაბამისად, სწავლის გაგრძელებაც იქ გადავწყვიტე. საზღვრებს მიღმა ცხოვრება ბევრი გამოწვევითაა სავსე. აქ IB-სისტემით ვსწავლობ, რომელიც ქართული საგანმანათლებლო სისტემისგან ძალიან განსხვავდება და ამასთანავე UWC (მსოფლიოს გაერთიანებული კოლეჯები) არ არის ორიენტირებული მხოლოდ განათლებაზე. ხშირად ისეთ თემებზეც გვიწევს საუბარი, რომლებზეც აქამდე არასდროს მიფიქრია. ჩემი აქაური ცხოვრება ცვალებადი ტალღასავითაა, საბოლოოდ მაინც ვაცნობიერებ, რომ ეს სირთულეები ამ ორწლიანი გამოცდილებისთვის ნამდვილად ღირს. ახლა, შემიძლია ვთქვა, რომ ბევრ რამეს სხვა თვალით ვუყურებ და ბედნიერი ვარ რომ ჩემი მომავალი ასე წარიმართა.

-მედიცინის გარდა, სხვა ბევრი სფეროთიც ხარ დაინტერესებული, გვიაბე თითოეული მათგანის შესახებ და რა ადგილი უკავია მათ შენს ცხოვრებაში?
-სკოლაშივე საკმაოდ აქტიური მოსწავლე ვიყავი და ჩემი ინტერესის სფერო არ შემოიფარგლებოდა მხოლოდ საგაკვეთილო პროცესით. გერმანიაში მოხვედრის შემდეგ გავაცნობიერე, რომ ჩემს წარმატებაში გარეაქტივობებს უდიდესი წვლილი მიუძღვის. 5 წლის ვიყავი როცა ბაღში პროდიუსერმა მუსიკალურ კონკურსში მონაწილეობა შემომთავაზა. წარმატებული გამოსვლის შემდეგ კი, კონსერვატორიაში საფორტეპიანო განხრით დავიწყე სწავლა, პარალელურად, კარატეზეც დავდიოდი 4-5 წლის განმავლობაში. მუსიკალური კარიერის განმავლობაში რამდენჯერმე საზღვარგარეთაც მომიწია წასვლა და, ვფიქრობ, სწორედ აქედან იწყება ჩემი პირველი დამოუკიდებელი ნაბიჯები. 2015 წელს იტალიაში ჯიფონის ფილმის ფესტივალს ვესწრებოდი ჟიურის წევრად. მოგვიანებით ევროპის ახალგაზრდულ პარლამენტს, BIAFF-ს, დებატების კლუბსა და გაეროს მოდელირებასაც შევუერთდი. ხშირად მეკითხებოდნენ რა მიზიდავდა მსგავს პროგრამებში და პასუხს მხოლოდ ახლა მივაგენი: სესიებზე ისეთ თემებს განვიხილავდით რაზეც საზოგადოებაში ღიად არ მსჯელობენ. აგრეთვე ხშირად ვმოხალისეობდი, ვღებულობდი მონაწილეობას ბანაკებში და სხვადასხვა ორგანიზაციას ვეხმარებოდი პროექტების განხორციელებაში.
-მეგი, სამომავლო გეგმების შესახებ გვიამბე.
-კოლეჯის გამოშვება 2019 წლის 26 მაისს მექნება, საქართველოს დამოუკიდებლობის დღეს და ვფიქრობ წინ დიდი დრო მაქვს საბოლოო პროფესიული არჩევანის გასაკეთებლად, რა თქმა უნდა, უნივერსიტში ჩაბარებასა და სამომავლო კარიერაზე ფიქრი უკვე დაწყებული მაქვს, თუმცა ამ ეტაპზე ჩემთვის რთულია საბოლოო გადაწყვეტილების შესახებ საუბარი.

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”