კვლევები

2020 წლის 1 იანვრის მდგომარეობით, საქართველოს მოსახლეობის რიცხოვნობა 3,716,900 ადამიანს შეადგენდა, რაც წინა წლის შესაბამისი პერიოდის მაჩვენებელთან შედარებით 0.2 პროცენტით ნაკლებია – ამის შესახებ საქსტატის მიერ დღეს გამოქვეყნებული ანგარიშიდან ხდება ცნობილი.

უწყების განმარტებით, მოსახლეობის შემცირება მოხდა იმის მიუხედავად, რომ ქვეყანაში დაბადებულთა რაოდენობა სიკვდილიანობის მაჩვენებელზე მაღალი იყო, თუმცა ეს მაჩვენებელი არ აღმოჩნდა საკმარისი, რათა უარყოფითი მიგრაციული სალდო დაებალანსებინა.

“2019 წელს დაფიქსირდა დადებითი ბუნებრივი მატება (1 637) და უარყოფითი მიგრაციული სალდო (-8 243),”– ნათქვამია საქსტატის ანგარიშში.

საქსტატის მიხედვით, 2019 წელს ემიგრანტების რიცხოვნობამ 105,107  შეადგინა, რაც წინა წელთან შედარებით 6.2 პროცენტით მეტია, ხოლო იმიგრანტების რიცხოვნობა 9.9 პროცენტით გაიზარდა და 96,864 შეადგინა. შესაბამისად, მიგრაციული სალდო -8,243 იყო.

საქსტატის მიხედვით, იმიგრანტების 85.3 პროცენტი და ემიგრანტების 84.9 პროცენტი, შრომისუნარიან ასაკში მყოფ მოსახლეობას (15-64 წლის ასაკობრივი ჯგუფი) წარმოადგენდა.

2019 წელს იმიგრანტების 56.2 პროცენტს და ემიგრანტების 78.0 პროცენტს საქართველოს მოქალაქეები წარმოადგენდნენ.

მოსახლეობის ასაკობრივი განაწილება კი ასეთია:

2020 წლის 1 იანვრის მდგომარეობით, 0-14 წლის მოსახლეობის წილი მთელ მოსახლეობაში 20.4 პროცენტს შეადგენს, შრომისუნარიან ასაკში მყოფი მოსახლეობის წილი (15-64 წლის ასაკობრივი ჯგუფი) − 64.5 პროცენტს, ხოლო 65 წლის და უფროსი ასაკის მოსახლეობის წილი – 15.1 პროცენტს.

2020 წლის 1 იანვრის მდგომარეობით, მამაკაცების რიცხოვნობამ 1 790.3 ათასი კაცი შეადგინა და წინა წელთან შედარებით პრაქტიკულად უცვლელი დარჩა, ხოლო ქალების რიცხოვნობა 0.3 პროცენტით შემცირდა და 1 926.6 ათასი შეადგინა. ამასთან, საქართველოს მოსახლეობის 48 პროცენტი მამაკაცი, ხოლო 52 პროცენტი – ქალია.

2020 წლის 1 იანვრის მდგომარეობით, საქართველოს მოსახლეობის 59.0 პროცენტი ცხოვრობდა საქალაქო დასახლებებში. ამასთან,  თბილისის მოსახლეობა მთლიანი მოსახლეობის თითქმის მესამედს წარმოადგენს.

წინა წელთან შედარებით 2019 წელს სიცოცხლის მოსალოდნელი ხანგრძლივობა 0.1 ერთეულით გაიზარდა და შეადგენს 74.1 წელს, მათ შორის მამაკაცებისათვის – 69.8 წელს, ხოლო ქალებისათვის – 78.4 წელს.

ახალგაზრდა ანალიტიკოსთა და მეცნიერთა დარბაზი ,,დოქტრინა“

საავადმყოფოებში, კლინიკებსა და სხვა ისეთ შენობებში, სადაც ჰაერის ბაქტერიებითა და მიკრობებით დაბინძურების დიდი რისკია, ისეთ ნათურებს ამონტაჟებენ, რომლებისგანაც ულტრაიისფერი სხივები – UVC- გამოიყოფა.
აღნიშნული ნათურები გარკვეულ დროში ბაქტერიებს, სოკოსა და ვირუსებს კლავს.
ნათურებს ჭერში ამონტაჟებენ, ვინაიდან, აუცილებელია, ისინი ადამიანებთან ახლოს არ მდებარეობდნენ. მიკრობები ჰაერის ცირკულაციის საშუალებით ნათურაბამდე მიდის, იქედან კი, გასუფთავებული ჰაერი იქამდე ჩადის, სადაც ადამიანები არიან.
ნათურების მაღალ ადგილზე განთავსება მთავარი პირობაა, ვინაიდან ისინი ისეთი რაოდენობით ულტრაიისფერ სხივებს გამოყოფენ, რაც ადამიანის ჯანმრთელობისთვის, განსაკუთრებით თვალებისთვის, საზიანოა.
როგორც ცნობილია, ულტრაიისფერი სხივებიც განსხვავდება ერთმანეთისგან. მათ სამ ტიპად ყოფენ: A(UVA), B(UVB) და C(UVC) სხივებად. UVA ყველაზე სუსტია, მაგრამ ყველაზე ღრმად აღწევს კანში, შეუძლია გამოიწვიოს კანის ღრმა დამწვრობა, დააზიანოს შემაერთებელი ქსოვილოვანი სტრუქტურები, ბადურა. UVB უფრო ძლიერი და ნაკლებად შეღწევადია, მაგრამ თუ დიდი რაოდენობით დაგროვდა, შესაძლოა კანისა და რქოვანას მძიმე დამწვრობა გამოიწვიოს. UVC შედარებით სუსტია, თუმცა თვალების დაზიანება მასაც იოლად შეუძლია.
„როდესაც ჩვენ მათ ზედაპირების დეზინფექცირებისთვის ვიყენებთ, დარწმუნებულები ვართ, რომ ოთახში არავინაა, ხოლო თუკი ოთახის ჰაერის ზედა ნაწილის გაწმენდა გვსურს, დარწმუნებულები უნდა ვიყოთ, რომ დაბლა, იმ ადგილამდე, სადაც ადამიანები იმყოფებიან, ულტრაიისფერი სხივები მხოლოდ მცირე დოზით ჩააღწევს, რაც მათ თვალებს არ დააზიანებს,“- აცხადებენ მეცნიერები.
მათი განმარტებით, ასეთი ნათურები ეფექტურია ოთახში ჰაერის მიკრობებისა და ვირუსებისგან გასაწმენდად, ხოლო ულტრაიისფერი სხივების ადამიანებზე იმ დოზით გამოყენება, რომ ორგანიზმი ვირუსისგან გაიწმინდოს, არ შეიძლება, ვინაიდან ეს კანსა და თვალებს, და ზოგადად ადამიანის ჯანმრთელობას, დიდ ზიანს მიაყენებს.
„მცირე რაოდენობით ულტრაიისფერი სხივები ადამიანებში ვიტამინ D-ს წარმოსაქმნელად აუცილებელია, თუმცა მისი გადაჭარბებული დოზით დასხივებამ კანზე, თვალებსა და იმუნურ სისტემაზე, შესაძლოა მწვავე და ქრონიკული ჯანმრთელობის პრობლემები გამოიწვიოს,“- აცხადებენ მეცნიერები.
ვირუსის მოსაკლავად ულტრაიისფერი სხივების გამოყენების შესახებ გაფრთხილებას ჯანდაცვის მსოფლიო ორგანიზაციაც ავრცელებს.
„ულტრაიისფერი სხივების ნათურების გამოყენებამ ხელებისა და კანის სხვა ნაწილების სტერილიზაციითვის, შესაძლოა, კანის გაღიზიანება გამოიწვიოს. მზე და ცხელი ამინდი „კოვიდ 19“-ით დაინფიცირებისგან ვერ დაგიცავთ, ასე რომ იყოს, ვირუსი ცხელი კლიმატის მქონე ქვეყნებში არ გავრცელდებოდა, სადაც კორონავირუსის უამრავი დადასტურებული შემთხვევა გვაქვს,“- აცხადებენ „ჯანმო“-ში.

წყარო : edition.cnn.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ახალი კვლევის მიხედვით, კორონავირუსით ინფიცირებულ პაციენტებში, რომლებსაც ჰიდროქლოროქინით (პლაქვენილით) მკურნალობდნენ,, სიკვდილიანობისა და ხელოვნური სუნთქვის აპარატების გამოყენების უფრო მაღალი მაჩვენებელი დაფიქსირდა ვიდრე იმ პაციენტებში, რომლებიც აღნიშნულ მედიკამენტს არ ღებულობდნენ.
კვლევაში, რომელიც ჯანდაცვის ეროვნული ინსტიტუტებისა და ვირჯინიის უნივერსიტეტის დაფინანსებით ჩატარდა, მონაწილეობა 368 პაციენტმა მიიღო. აღნიშნული პაციენტებიდან 97-ში, რომლებსაც ჰიდროქლოროქინით მკურნალობდნენ, სიკვიდილიანობის მაჩვენებელი 27,8% იყო. ხოლო 158 პაციენტისგან შემდგარ ჯგუფში, სადაც მედიკამენტს არ იყენებდნენ, სიკვდილიანობის დონე მხოლოდ 11,4% იყო.
“ეს დასკვნები ცხადყოფს, რამდენად მნიშვნელოვანია დაველოდოთ ამ პრეპარატთან დაკავშირებით მიმდინარე კვლევების შედეგებს, ვიდრე მას ფართო მოხმარებაში დავნერგავთ”, – აცხადებენ კვლევის ავტორები, რომლებიც სამხრეთ კაროლინაში, კოლუმბიის ვეტერანთა საქმეების ჯანდაცვის სისტემის, ასევე სამხრეთ კაროლინისა და ვირჯინიის უნივერსიტეტების მკვლევარები არიან.
ისინი ასევე იკვლევდნენ, რამდენად ეფექტური იყო ჰიდროქლოროქინისა და აზითრომიცინის ნარევის ან მხოლოდ ჰიდროქლოროქინის მიღება და რამდენად იცავდა მკურნალობის ეს მეთოდი პაციენტებს ხელოვნური სუნთქვის აპარატის საჭიროებისგან.
“ამ კვლევისგან ვერ მივიღეთ მტკიცებულება იმის შესახებ, რომ ჰიდროქლოროქინით ან მისი აზითრომიცინთან კომბინირებით მკურნალობის შემთხვევაში, COVID-19-ით ინფიცირებულ პაციენტებში სასუნთქი აპარატის გამოყენების საჭიროება მცირდება,“ – წერენ კვლევის ავტორები.
ჰიდროქლოროქინი ათწლეულების განმავლობაში ისეთი დაავადებების სამკურნალოდ გამოიყენებოდა, როგორიცაა მალარია, მჭამელა(კანისა და ძვლის დამაზიანებელი დაავადება) და რევმატოიდული ართრიტი.
კიდევ ერთი ახალი კვლევის ფარგლებში, ფრანგმა მკვლევრებმა COVID-19-ით დაინფიცირებული 181 პაციენტის სამედიცინო ისტორიები შეისწავლეს, რომლებსაც აღენიშნებოდათ პნევმონია და დამატებით ჟანგბადს საჭიროებდნენ, დაახლოებით ნახევარს საავადმყოფოში მიყვანიდან 48 საათის განმავლობაში ჰიდროქლოროქინით უმკურნალეს, მეორე ნახევარს კი პრეპარატი არ მიუღია. აღნიშნულ ორ ჯგუფში დაფიქსიებული სიკვიდილანობის მაჩვენებელი ერთმანეთისგან მნიშვნელოვნად განსხვავებული არ აღმოჩნდა. თუმცა, აღსანიშნავია, რომ რვა პაციენტს, რომლებმაც მედიკამენტი მიიღეს, გულის რითმის პრობლემები განუვითარდათ და იძულებულები გახდნენ, მედიკამენტის მიღება შეეწყვიტათ.
აღსანიშნავია, რომ არცერთი აღნიშნული კვლევა სამეცნიერო ჟურნალში არ გამოქვეყნებულა.
წყარო : CNN

მასალა მოამზადა : თამარ ტაბატაძემ
ახალგაზრდა ანალიტიკოსთა და მეცნიერთა დარბაზი – ,,დოქტრინა”

სოციალური დისტანცირების შესახებ გადაწყვეტილების დროულად მიღება კორონავირუსისგან გამოწვეული სიკვდილიანობის მაჩვენებელზე პირდაპირ ზემოქმედებს, – ამის შესახებ ამერიკელი ეპიდემიოლოგების – ბრიტა და ნიკოლას ჯეველების სტატიაშია აღნიშნული.
ნიუ-იორკ თაიმსში გამოქვეყნებულ სტატიაში ვკითხულობთ, რომ თეთრმა სახლმა სოციალური დისტანცირების შესახებ გაიდლაინები 16 მარტს გამოსცა. იმ შემთხვევაში, თუკი აშშ-ის ხელისუფლება ამ გადაწყვეტილებას 2 კვირით ადრე, 2 მარტს, მიიღებდა, ქვეყანაში დაფიქსირებული ფატალური შემთხვევების 90 პროცენტის თავიდან აცილება იქნებოდა შესაძლებელი, ხოლო აღნიშნული ზომების ერთი კვირით ადრე, 9 მარტიდან, გატარება, სიკვდილიანობის მაჩვენებელს 60 პროცენტით შეამცირებდა.
ჯანდაცვის ექსპერტები აცხადებენ, რომ იზოლაცია და სოციალური დისტანცირება ცხოვრების ახალ ნორმად იქცა, თუმცა ეს ზომები არ წარმოადგენენ პასუხს კორონავირუსის წინააღმდეგ, არამედ ისინი არიან დროის მოგების საშუალება იმ დროს, როდესაც მეცნიერები ვაქცინებსა და მკურნალობის საშუალებებზე მუშაობენ.
ეკონომისტები აცხადებენ, რომ კორონავირუსის წინააღმდეგ ბრძოლის მიზნით დაწესებული შეზღუდვები ქვეყნების ეკონომიკებს უმძიმეს დარტმას მიაყენებს და ამ ფონზე, რამდენიმე ქვეყანამ შეზღუდვების თანდათან მოხსნის გადაწყვეტილება მიიღო.
ბრიტა და ნიკოლას ჯეველები ხაზს უსვამენ, რომ ამა თუ იმ ქვეყანაში შეზღუდვების თუნდ ერთი კვირით ნაადრევად შემსუბუქებამ, შესაძლოა, ამ ქვეყანაში ეპიდემიოლოგიურ სიტუაციასა და მოსახლეობის ჯანმრთელობაზე დამანგრეველი ზემოქმედება მოახდინოს.

წყარო : sciencealert.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”