ბიზნესი

კლიენტის დათხოვნა ზოგ ვითარებაში გონივრული გამოსავალია, მაგრამ ხშირად ამგვარი სტრატეგია უფრო მეტ საფრთხეს ქმნის, ვიდრე – სარგებელს.

როცა კომპანია კლიენტურის ჩამოშორებას იწყებს, მოგების გარდა, ბიზნესის კიდევ მრავალი სხვა კომპონენტი ექცევა რისკის ქვეშ, მაგალითად, მაღალი ფიქსირებული ხარჯების მქონე კომპანიები რისკავენ, რომ შენარჩუნებულ კლიენტებზე მეტი ხარჯების დაკისრება მოუწევთ. ერთმა ექიმმა გვითხრა, რომ მას შემდეგ, რაც პაციენტთა ორი არამომგებიანი სეგმენტი ჩამოიშორა, გრაფიკში თავისუფალი ინტერვალის შევსება გაუჭირდა. მისი თანამშრომლები უსაქმოდ ისხდნენ. ის კი სამსახურიდან ვერ ითხოვდა მათ, რადგან მრავალ მათგანს მუშაობის ხანგრძლივი გამოცდილება ჰქონდა. საბოლოო ჯამში, ექიმს სხვა პრაქტიკის ყიდვა მოუწია, რომ თავისი ბიზნესი თავდაპირველ არაწამგებიან სტადიაში დაებრუნებინა. კლიენტთა ჩამოშორებით კომპანიებმა შეიძლება ფასეული საინფორმაციო, ექსპერიმენტული და საინოვაციო წყაროებიც დაკარგონ, რადგან ხშირად, ახალი პროდუქტისა თუ სერვისის სწრაფად გამოვლენა და პრაქტიკის გაუმჯობესება სწორედ საბოლოო მომხმარებლის იდეებისა და რჩევების საფუძველზე ხერხდება.

წყარო: Harvard business review

მასალა მოამზადა: ლაშა ჯინჭარაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ნებაყოფლობითი გაცვლა-გამოცვლა ტრანსაქციულ ხარჯებთან არის დაკავშირებული – თან ახლავს გარიგებებზე მოლაპარაკების პროცესს და მიღწეული შეთანხმებების შესრულების კონტროლს.

გასაგებია, რომ ყოველი გარიგება დაკავშირებულია გარკვეულ ხარჯებთან: მყიდველმა და გამყიდველმა უნდა მონახონ ერთმანეთი, მოილაპარაკონ იმის თაობაზე, თუ რას სთავაზობენ ერთმანეთს და რისი მიღება უნდათ სანაცვლოდ, უნდა დარწმუნდნენ, რომ ნამდვილად მიიღებენ იმას, რასაც მოელიან.

თუ ტრანსაქციული ხარჯები აღემატება იმ შედეგს, რასაც გარიგების მონაწილეები მოელიან, მაშინ გარიგება, უბრალოდ, არ შედგება. ამიტომ სახელმწიფო შეიძლება განვიხილოთ, როგორც ინსტრუმენტი, რომელიც იძულების გამოყენების გზით, ტრანსაქციულ ხარჯებს ამცირებს. ურთიერთხელსაყრელი გარიგებების რაოდენობა, რომლებიც ხორციელდება საზოგადოებაში, ტრანსაქციული ხარჯებით არის შეზღუდული.

წყარო: Harvard business review

მასალა მოამზადა: ლაშა ჯინჭარაძემ

ახა

ბოლო დროს, ტრენდად იქცა ლოგოს იდეისა და კონცეფციის მარტივი, მინიმალისტური შესრულებით გადმოცემა. ამის მაგალითად შეგვიძლია ,,იუვენტუსის” ახალი ლოგო განვიხილოთ, თუმცა, რაღა შორს წავიდეთ. ყველას გვახსოვს როგორი ორაზროვანი გამოხმაურება მოჰყვა ქუთაისის ახალ ლოგოს. მომხმარებელთა ნაწილი უკმაყოფილო დარჩა ლოგოს შესრულებით, რადგან მათი აზრით, ასეთი მარტივი ლოგო არ შეეფერება დიდი ისტორიის მქონე ქალაქს. კომენტარების უმრავლესობის ავტორები საკმაოდ მაღალ დონეზე აფასებდნენ თავიანთ Paintსქილებს და მიაჩნდათ, რომ მათაც მარტივად შეეძლოთ მსგავსი ლოგოტიპის დახატვა. რა თქმა უნდა, ამ აზრს აქვს არსებობის უფლება. არავის ეპარება ეჭვი ვინმეს ნიჭიერებაში, ამიტომ წარმოგიდგენთ კიდევ რამდენიმე  ლოგოს, რომელთა დახატვასაც აუცილებლად მოახერხებდით Paint-ში.

ნაიკი

რომელიმე ბერძნული მითოლოგიისა და Paint-ის უბადლო მცოდნეს, ალბათ აუცილებლად მოაფიქრდებოდა, რომ გამარჯვების ქალღმერთი ნიკე კარგი თემაა ლოგოს გასაკეთებლად. თავიდან იფიქრებდა, რომ სიტყვა “Victory”-ს პირველი ასო კარგი იქნებოდა, თუმცა, მეტი ორიგინალურობისთვის მას მოქნეული ფრთის ფორმას მისცემდა, ქალღმერთი, ხომ, ბოლო-ბოლო ფრთოსანია. აი, ასე შექმნიდა მე-4 კლასში „როგორ გავატარე ზაფხულის არდადეგების“ თემის ბოლოს მასწავლებლის მიერ აღნიშნულ „პწიჩკას“, რომელიც შემდეგ მსოფლიო ბრენდის ლოგო გახდებოდა.

შანელი

წარმოიდგინეთ, რომ ლოგოს აკეთებთ ადამიანისთვის, რომლის სახელიცა და გვარიც ერთსა და იმავე ასოზე იწყება. ასოთა წყება ერთ მხარეს რომ იყოს, უშნო და ბანალურია. ერთმანეთისაგან საპირისპირო სახით რომ დასვა, უკვე საინტერესოა. როგორ გავხადოთ უკეთესი? მოდით, ფერი იყოს შავი, შავი ხომ ყოველთვის ელეგანტურია. სულ 4 მოძრაობა Paint-ში და მსოფლიოს ერთ-ერთი უდიდესი დიზაინერული სახლის ლოგოც მზადაა.

ფედექსი

ინგლისური შრიფტით დაწერილი ფედექსის დიდხანს ყურებისას, გრაფიკოსი გრაფიკოსი აუცილებლად შეამჩნევდა, რომ Ex-ს შორის ისრის გამოსახულება ჩანს. თან რა კარგია, როდესაც პირველივე შეხედვით ვერ ამჩნევ და ცოტა ხანი დაკვირვება გჭირდება, ეს უფრო „აზრიანს“ გახდიდა ლოგოს, რომლის გაკეთებასაც რა უნდა. უბრალოდ დაწერე სახელი და მორჩა.

ამაზონი

ბრენდი, რომელიც ყველა დასახელების პროდუქტს ყიდის თავის საიტზე. ანუ რა გამოდის, რომ ანბანის ყველა ასოზე შეგიძლია შენთვის სასურველი პროდუქტის მოძებნა? სახელში ანბანის პირველი და ბოლო ასოებიც ურევია. მიახატე Paint-ით ისარი a-დან z-მდე და ეგ არის. გენიალური ლოგოც მზადაა.

გარდა ზემოთ ჩამოთვლილისა, კიდევ უამრავი ლოგოა, რომელთა დახატვაც საკმაოდ მარტივია Paint-ით, ამიტომ ყველას აღარ ჩამოვთვლით და უბრალოდ გიჩვენებთ, დანარჩენს თავადაც მიხვდებით.

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 2016 წელს სათამაშო ბიზნესის შემოსავალმა 4 მილიარდ 302 მილიონ ლარს გადააჭარბა.

მათ შორის ტოტალიზატორის სისტემურ-ელექტრონული ფორმით მომწყობი პირის ერთობლივი შემოსავალი 849 090 631 ლარი იყო. გასულ წელს, სათამაშო ბიზნესის მიერ გაცემული გადასახადები 109 987 188 ლარს გაუტოლდა. (მათ შორისაა: სანებართვო მოსაკრებელი -50 015 401 ლარი, საშემოსავლო გადასახადი – 35 115 289 ლარი, მოგების გადასახადი 60 156 604 ლარი, დღგ 9 105 259 ლარი, ქონების გადასახადი 858 816 ლარი და სხვა სახის გადასახადები 4 733 598 ლარი).

სათამაშო ბიზნესში გასულ წელს 7 365 პირი იყო დასაქმებული. რაც შეეხება, 2017 წლის მარტის მონაცემებს, დასაქმებულთა რაოდენობა 7 043 პირს შეადგენს.

მასალა მოამზადა: ლაშა ჯინჭარაძე

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ონლაინგამოცემა,, Business Insider-მა“ იმ კომპანიების სია გამოაქვეყნა, სადაც სტაჟიორობა საკმაოდ მიმზიდველია და ამას თავად კომპანიების ყოფილი სტაჟიორები ყვებიან.

✔Yahoo –ში სტაჟიორის თვიური ანაზღაურება 6333 დოლარია. კომპანია სტაჟიორს სთავაზობს ბევრ გართობას, უგემრიელეს საკვებს, კარგ სამუშაო გარემოს.

✔Twitter-ი მხოლოდ საუკეთესო კანდიდატებს აძლევს სტაჟიორობის უფლებას. მათი ყოფილი სტაჟიორი ამბობს, რომ Twitter-ში ყოფნა ბევრად სჯობდა Google inc-ში მუშაობას. Twitter-ში სტაჟიორის ანაზღაურება 6333 დოლარია.

✔Expedia-ში სტაჟიორის თვიური ხელფასი 6333 დოლარია. კომპანიაში საოცრად კარგი სამუშაო გარემოა, მეგობრული თანამშომლები და სამსახურისა და პირადი ცხოვრების ბალანსი კი, ძალიან მიმზიდველია ყველასთვის.

✔Apple-ში სტაჟიორებს 6333 დოლარს უხდიან. რა თქმა უნდა, ყველა ცნობილი ბენეფიტი მათზეც ვრცელდება. საოცარი სამუშაო გარემო კი, ყველაზე მეტად მიმზიდველია.

✔Google-ში სტაჟიორის ანაზღაურება 6600 დოლარია. სამუშაოს აღწერილობა მუშაობის დაწყების დღემდე საიდუმლოა. როგორც კომპანიის ყოფილი სტაჟიორები ამბობენ, თავდაპირველად მათ ერთ პროექტზე დაიწყეს მუშაობა, შემდეგ კი მისცეს საშუალება სხვადასხვა სფეროში ეცადათ თავი.

✔Groupon-ის შესახებ მისი ყოფილი სტაჟიორი წერს, რომ კომპანიას კარგი კულტურა აქვს, მეგობრული სამუშაო გარემოა, თუმცა არც ისე „სექსუალურია“ სწრაფად მზარდ ინტერნეტ ინდუსტრიებს შორის. Groupon-ი ონლაინ შეთავაზებებზე და ფასდაკლებების ვებ-გვერდია. კომპანიის სტაჟიორის ანაზღაურება 6667 დოლარია.

✔Uber-ში სტაჟიორის ანაზღაურება 6730 დოლარია. კომპანია თავისი ყოველკვირეული შეხვედრებით მის დამაარსებელთან, უნიკალური და გამორჩეულია.

✔Nest_ში დასაქმებულებს საკმაოდ გამოცდილ და ჭკვიან ინჟინრებთან ერთად უწევთ მუშაობა. მათი თვიური ანაზღაურება 6773 დოლარია.

✔საინტერესო გარემო, კარგი თანამშრომლები, ბენეფიტები და ერთ-ერთი საუკეთესო ოფისი Microsoft-ის სტაჟიორი კომპანიაში გატარებულ დროს(როგორც ყველაფერ სხვას) „საუკეთესოს“ უწოდებს. მისი ანაზღაურება 7000 დოლარი იყო.

✔Walmart-ის სტაჟიორს გარდა კარგი სამუშაო გარემოსა, განვითარების დიდი შანსი აქვს. სტაჟიორის თვიური ანაზღაურება 7219 დოლარია.

✔Nec Labs America საუკეთესო ადგილია ჭკვიანი და ექსპერიმენტების მოყვარული ადამიანისთვის. სამუშაო გარემოც ასეთია.უმართავი და დამოუკიდებელი. თვიური ანაზღაურება 7400 დოლარია.

✔LinkedIn-ში სტაჟიორის ხელფასისთვის 7500 დოლარია გამოყოფილი. ველო ბილიკები, სავარჯიშო დარბაზი, კალათბურთის ფარი და უფასო საკვები მათი ორგანიზაციული კულტურის ნაწილია. თანამშრომლებთან ერთად, აღმასრულებელი ხელმძღვანელიც მზად არის დაეხმაროს ყველას.

✔Facebook-ის შესახებ მხოლოდ კარგს საუბრობენ, რადგან კომპანიის მისია, ორგანიზაციული კულტურა ძალიან საინტერესოა სტაჟიორებისთვის. მათი ანაზღაურება თვეში 8000 დოლარია.

✔Pinterest-ში ზრუნავენ თანამშრომლების ბედნიერებაზე და განსაკუთრებით კი, სტაჟიორებზე. საინტერესო სამუშაო გარემოს გარდა, განვითარების დიდი პერსპექტივაც აქვთ. სტაჟიორის ანაზღაურება 8125 დოლარია.

✔Dropbox -ში ყველა ზრუნავს ერთმანეთზე. საოცარი გარემო, კარგი ბენეფიტები და 8500 დოლარი თვეში სტაჟირებისთვის კარიერის კარგი დასაწყისია.

მასალა მოამზადა:  ციცი კიკვაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

მონაცემთა მეცნიერების და მედიის არხების ფართოდ გავრცელებამ ტრადიციული მარკეტინგული სამსახური მკვეთრად შეცვალა და რიგ შემთხვევებში ახალი პოზიციებიც კი შექმნა. მთლიანობაში ამ ცვლილებებმა მარკეტინგი უბრალო ხელოვნებიდან მეცნიერებისა და ხელოვნების ჰიბრიდად აქცია.

დღეს ყველა მარკეტერს მონაცემებსა და ანალიტიკაში საბაზისო უნარები მოეთხოვება. თანამედროვე მარკეტერის საჭიროებები ბევრად უნდა სცდებოდეს ანგარიშგებისა და გაზომვის ფარგლებს, მეტად უნდა სპეციალიზდეს ანალიტიკური უნარების ფართო სპექტრში, მონაცემთა მართვისა და ანალიტიკური სტრატეგიების ჩათვლით და კარგად უნდა ესმოდეს მარკეტინგში მონაცემების ხარისხის როლი, მონაცემების მართვის აუცილებლობა და მონაცემების ფასი. გარდა ამისა, მარკეტერები ციფრული არხების ნიუანსებშიც უნდა ერკვეოდნენ.

რამდენადაც ჩვენი ფუნქციონალური საჭიროებები შეიცვალა, ჩვენი სამუშაოც და სამუშაო აღწერილობაც შესაბამისად დაკორექტირდა. წარმოგიდგენთ მარკეტინგის ოთხ როლს თანამედროვე ორგანიზაციაში.

ციფრული მარკეტინგი

ციფრული მარკეტინგი მართავს ვებს, საძიებო სისტემას, სოციალურ მედიას, ელექტრონულ კორესპოდენციას, ციფრულ რეკლამირებას და მედია შესყიდვას. ეს მიმართულება ბოლო წლების განმავლობაში წარმოუდგენლად გაიზარდა, რაც სხვადასხვა არხების გაჩენის დამსახურებაა. ამ ხნის განმავლობაში დავინახეთ, რომ წარმატება მხოლოდ მათ ჰარმონიულ შერწყმას მოსდევს – ისეთი სტრატეგიების შექმნას, რომლებიც ერთის ნაცვლად ერთდროულად რამდენიმე არხის ჩართვას გულისხმობს. დღეს ვეძებთ ადამიანებს, რომლებსაც კარგად ესმით, როგორ ხდება ინტერაქცია ამა თუ იმ არხის მეშვეობით.

მაგალითისთვის, სკოტ სელერსი სანამ სეგმენტაციის ანალიტიკოსის ახალ როლს მოირგებდა, რეკლამირების და ფასიანი ძებნის ერთ-ერთო სპეციალისტი იყო. სელერსი გუნდს ისეთ საკითხებში გარკვევაში ეხმარებოდა, როგორიცაა, ვთქვათ, იმ ძირითადი სიტყვების (keywords) შერჩევა, რომლებიც ყველაზე მეტ ინტერესს იწვევდა ჩვენს მომხმარებლებში.

სელერსთან მისი გამოცდილების რამდენიმე ასპექტის განხილვისას, მან ის დრო გაიხსენა, როცა ფასიანი ძებნის კამპანიის ანალიტიკოსი იყო. კამპანია ძვირადღირებულ ქივორდებზე იყო აგებული. მიუხედავად იმისა, რომ ფასიანი ძებნა კონკრეტული ქივორდებით გარკვეული დროის განმავლობაში იყო განთავსებული, სელერსი ორ წლის მონაცემების ანალიზს აკეთებდა კამპანიის ადამიანის მოქმედებაზე გავლენის გასარკვევად. ანალიზისას მიღებულ შედეგებს იმ ადამიანების ქცევებს ადარებდა, რომლებიც ორგანული ძებნის შედეგებს მიჰყვებდნენ. გარდა ამისა, აკვირდებოდა იმ ხალხის სხვა ქცევებს, რომლებიც რეკლამებზე აწკაპუნებდნენ. მისმა აღმოჩენამ გამომაფხიზლებელი როლი შეასრულა: ფასიანი ძებნის კამპანიის ღირებულების მიუხედავად, თითოეულ მათგანს მხოლოდ თოთხმეტ შეძენამდე მიჰყავდა. მათგან კი, არც ერთი არ იყო დაკავშირებული საპრომოციო ობიექტთან და არც ერთი მათგანი არ დასრულებულა წარმატებული გაყიდვით.

მსგავსი ანალიტიკური სამუშაოს და ინსაიტის წყალობით კამპანია მალევე დასრულდა.

კონტენტის მარკეტინგი

კონტენტი მარკეტინგის თანამედროვე მიდგომის მნიშვნელოვანი კომპონენტი გახდა. ყველაფერი, რასაც ჩვენ, მარკეტერები ვაკეთებთ, გარკვეულ კონტენტს მოიცავს, რომელიც კონკრტული არხის შესაბამისად უნდა შემუშავდეს – მისი ფორმატი, ხანგრძლივობა და რელევანტურობა შერჩეული არხის ადეკვატური უნდა იყოს. შეუძლებელია ვიზუალურ რეკლამაში ორ წუთიანი ვიდეო განათავსო. ამიტომაც შევქმენით ახალი მარკეტინგული პოზიციები, რაც ამ ხარვეზების შევსებასა მომხმარებლისთვის რელევანტური კონტენტის შეთავაზებაში გვეხმარება. იმ ადამიანებს, ვისაც ჩვენს კონტენტ მარკეტინგის როლს ვანდობთ, სხვადასხვა არხების, მათი ფუნქციონირებისა და ერთმანეთთან თავსებადობის ღრმა ცოდნა აქვთ.

ანალიტიკის ძლიერი მხარის გამოყენებით, მათ ადვილად შეუძლიათ კონტენტის და მის მარკეტინგულ კამპანიაში ჩართვის შეფასება. ასევე ხვდებიან, თუ მომხმარებლის მიერ გადაწყვეტილების მიღების პროცესში რა სახის კონტენტი როგორ მუშაობს – როდისაა ეფექტური სლაიდები, ვიდეოები თუ, თუნდაც, წიგნი.

თანამშრომლობა და კოორდინაცია, რა თქმა უნდა, მთავარია. მათ გარეშე შესაძლოა უამრავი დუბლირებული კონტენტი შევქმნათ, ან სულაც არ გამოვიყენოთ რამე, რადგან მისი არსებობის შესახებ არც კი გვქონდა ინფორმაცია. დღეს, ჩვენს კონტენტ-მარკეტერებს მსგავსი სიტუაციების გათვლაც და ანალიტიკის დახმარებით კონკრეტული დროისა და ადგილისთვის საუკეთესო კონტენტის შერჩევაც შეუძლიათ. მაგალითისთვის, როცა კამპანიას ვგეგმავთ, კონტენტის მარკეტინგის ჯგუფის წევრი კამპანიის გუნდთან „კონტენტის აუდიტის“ ჩასატარებლად მუშაობს, რაც სამიზნე აუდიტორიისთვის საუკეთესო კონტენტის შერჩევაში გვეხმარება.

მარკეტინგული მეცნიერება

მარკეტინგული მონაცემების სპეციალისტის და მონაცემების ვიზაუალიზაციის ანალიტიკოსის როლი მარკეტინგში აგრეთვე ახალია; ეს როლი მნიშვნელოვნად განსხვავდება ზოგადად მონაცემების სპეციალისტისგან. ერთი მხრივ, მარკეტინგული მონაცემების სპეციალისტის ქოლგის ქვეშ მოაზრებულ როლებს, სხვადასხვა  ტერმინით განვსაზღვრავთ. მსგავსი როლისთვის „მონაცემების ხელოვანი“ და „მონაცემთა მოამბეც“ შესაბამისი დასახელებაა. მაგალითისთვის, შოუნ სკილმენი მარკეტინგული მონაცემების ვიზუალიზაციის მთავარი ანალიტიკოსია და მონაცემების მოდელირებასა და არქივიზაციაში არის სპეციალიზებული. მისი საქმიანობა მონაცემების ობიექტურ შეფასებასა და მათ მიერ მოწოდებული ინფორმაციის განსაზღვრას გულისხმობს კამპანიის ავტორების ჩარევის გარეშე, რომლებიც მისი შეფასების ტენდენციურობის მიზეზები შეიძლება გამხდარიყვნენ.

ჩვენ მიერ განხორციელებული ცვლილებების შესაბამისი შედეგების შესახებ ინფორმაციის მოწოდება სკილმენის მსგავსი მარკეტინგული მონაცემების სპეციალისტებსაც შეუძლიათ. ზუსტად შეუძლიათ მოგვითხრონ, თუ როგორ იწყებს ისტორია ცვლილებებს.

კიდევ ერთი პოზიცია, რომელიც ამჟამად იმავე ქოლგის ქვეშ ერთიანდება, ე.წ. „სეგმენტაციის ანალიტიკოსია“. კამპანიის წარმოებისას სავარაუდოდ დაგჭირდებათ ისეთი სპეციალისტი, როგორც, მაგალითისთვის კული ჩოლკია და მას თქვენი კამპანიის სამიზნე აუდიტორიის საკონაქტო ბაზის ჩამოყალიბებას სთხოვდით. ამისთვის ჩოლკი „შეფასების მოდელს“ იყენებს, სადაც ის თავის საკონტაქტო ბაზას მთავარი ფაქტორების მიხედვით გადაარჩევს. შემდეგ კი, ჩოლკი კამპანიის შედეგებისთვის თვალ-ყურის მიდევნებას და მისი მუშაობის ხარისხის განსაზღვრას შეძლებს.

ჩოლკმა კამპანიისთვის ანალიზი მომხმარებლის გამოცდილების პროგრამული გადაწყვეტილების საშუალებით მოახდინა. შესაბამის ვებგვერდზე მომხმარებლის აქტივობებისთვის თვალ-ყურის მიდევნებით, ჩოლკმა გაანალიზა, რომ ვიზიტორების 26% უფასო შეთავაზებაზე დარეგისტრირებამდე ტოვებდა ვებგვერდს. ეს ძალიან კარგი დაკვირვება იყო, რადგან მანდ მიზეზებზე დაგვაფიქრა: ვიზიტორებისგან ზედმეტ ინფორმაციას ხომ არ ვითხოვდით? სხვა რა ბარიერებს ვუქმნიდით? და ალბათ ყველაზე მნიშნვნელოვანი – რისი გაკეთება შეგვეძლო ვებგვერდის დატოვების თავიდან ასარიდებლად და მეტი ჩართულობის უზრუნველსაყოფად?

მონაცემთა ხელოვანებისა და მოამბეებისგან მსგავის კითხვების ჩამოყალიბების შესაძლებლობა მარკეტინგის მოდერნიზაციისთვის გაწეული ძალისხმევის მთავარი პრინციპია. ისინი იმ ანალიტიკური ძალის შემუშავებაში გვეხმარებიან, რაც კამპანიებში უკეთესი ინვესტიციის და ამავდროულად, ხელახალი ცდის ხელსაყრელი დროის შერჩევაში გვეხმარებიან.

მომხმარებლის გამოცდილება

ბევრი მარკეტინგს მხოლოდ „საგარეო“ ფუნქციას ანიჭებს, რაც პოტენციური მომხმარებლების მიწვდომას გულისხმობს. „შიდა“ მარკეტინგი ამ დარგის ერთ-ერთი სფეროა, რაც პირდაპირ უკავშირდება მომხმარებლის მიერ გადაწყვეტილების მიღების გზას, რომელშიც ჩვენი ჩართულობა ნებისმიერ წერტილში მნიშვნელოვანია. ამ მიზნით ახალი პოზიცია შევქმენით, რომელსაც „მომხმარებლის ჩართულობის სპეციალიტს“ ვუწოდებთ. ამ პოზიციის როლი იმ პოტენციურ მომხმარებლებთან, რომლებიც თავიანთ კითხვებზე პასუხს ეძებენ, მეტად ღრმა და გაცნობიერებული ურთიერთობის დამყარებაში მდგომარეობს.

რამდენადაც პოტენციურ მომხმარებლები მოზღვავებული ინფორმაციის პირისპირ დგანან – იქნება ეს გუგლის ძებნიდან მიღებული შედეგები, თუ სოციალურ მედიაში დამყარებული კონტაქტები, – ყველა ინტერაქცია „ცივად“ ვეღარ განისაზღვრება. მომხმარებლები ჩვენთან ურთიერთობას უკვე ჩამოყალიბებული მოლოდინებით იწყებენ და სწორედ ამ ეტაპზე მათი ჩართვისთვის უნდა ვიყოთ მზად. ვიღაცას შესაძლოა არ ჰქონდეს ჩვენზე ინფორმაცია, მაგრამ ზუსტად იცოდეს, თუ რა სახის გადაწყვეტილება სჭირდება; მხოლოდ ჩვენზეა დამოკიდებული მივხვდებით და დავაკმაყოფილებთ მის საჭიროებებს, თუ ვერა. ეს ცვლილება გაცილებით მაღალი ხარისხის ინტერაქციების მიზეზი ხდება, რაც, თავის მხრივ, კომუნიკაციის გაყიდვებში გადაზრდის ადრინდელზე მეტ შესაძლებლობას იძლევა.

ახალი მომხმარებლების მოპოვებისთვის დახარჯული დროის და ძალისხმევის კვალდაკვალ, მონაცემების და ანალიტიკის ძალას არსებული მომხმარებლების მომსახურებისთვისაც ვიყენებთ – ის, რასაც დღეს „ურთიერთობების მარკეტინგს“ ვუწოდებთ. როგორც კი ვინმე ჩვენი მომხმარებელი გახდება, მას ცვლიილება დასჭირება და მასთან ურთიერთობის ჩამოყალიბება და ბიზნესში შენარჩუნება, სწორედ რომ ჩვენი საქმეა. მომხმარებლების საჭიროებები მუდამ უნდა დავაკმაყოფილოთ და დავრწმუნდეთ, რომ მათ ზუსტად იციან, თუ რისი მიწოდება შეგვიძლია ჩვენ.

ჩვენი მიზანი ისეთი მარკეტერების დაქირავებაა, რომლებსაც გადაწყვეტილების მიღების პროცესში მონაცემების და ანალიტიკის ფასი კარგად ესმით. დღეს ეს ბევრად მარტივია, ვიდრე ათი წლის წინ იყო. თანამედროვე მარკეტერი კრეატიული სპეციალისტიდან მონაცემების შემფასებლად და ანალიტიკოსად გადაიქცა. ყველას, ვინც ციფრული და სოციალური მედიის კამპანიებს ზომავდა, ან სხვადასხვა ვებგვერდებით ექსპერიმენტირებდა, მთლიანი პროგრამის შეფასება დახვეწილი ანალიტიკის საშუალებით შეუძლია. ეს არ ნიშნავს, რომ შემოქმედებას ან ინოვაციებს კლავთ – თქვენ მხოლოდ ცნობისმოყვარე თანამშრომლებს ეძებთ, რომლებიც გაუმჯობესებული უნარ-ჩვევებით გამოირჩევიან.

წყარო: Harvard Business Review

მასალა მოამზადა:  ციცი კიკვაძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”