დედამიწა

გლობალურ სამუშაო ბაზარს მომდევნო ხუთი წლის განმავლობაში დიდი შეფერხებები დაატყდება თავს, რადგან ეკონომიკა სუსტდება და კომპანიები სულ უფრო მეტად იყენებენ ისეთ ტექნოლოგიებს, როგორიცაა ხელოვნური ინტელექტი, – ამის შესახებ“მსოფლიო ეკონომიკური ფორუმის“ (WEF) ანგარიშშია აღნიშნული, რომელიც 800-ზე მეტი კომპანიის გამოკითხვებზე დაყრდნობით გამოქვეყნდა.
“მსოფლიო ეკონომიკური ფორუმის“ შეფასებით, დამსაქმებლები 2027 წლისთვის 69 მილიონი ახალი სამუშაო ადგილის შექმნას და 83 მილიონი პოზიციის გაქრობას ელიან, რაც, საერთო ჯამში, 14 მილიონი სამუშაო ადგილის დაკარგვას გამოიწვევს, ეს კი ამჟამინდელი სამუშაო ადგილების 2%-ს შეადგენს.
ამ პერიოდში შრომის ბაზრის რყევას მრავალი ფაქტორი განაპირობებს. განახლებადი ენერგიის სისტემებზე გადასვლა მძლავრი ძრავა იქნება სამუშაო ადგილების შესაქმნელად, ხოლო ნელი ეკონომიკური ზრდა და მაღალი ინფლაცია ზარალს გამოიწვევს.
იმავდროულად, ხელოვნური ინტელექტის გამოყენებისკენ სწრაფვა იქნება როგორც დადებითი, ასევე უარყოფითი ძალა.
კომპანიებს დასჭირდებათ ახალი თანამშრომლები, რომლებიც დაეხმარებიან მათ ხელოვნური ინტელექტის ინსტრუმენტების დანერგვასა და მართვაში. WEF-ის თანახმად, მონაცემთა ანალიტიკოსებისა და მეცნიერების, მანქანათმცოდნეობის სპეციალისტებისა და კიბერუსაფრთხოების ექსპერტების დასაქმება 2027 წლისთვის საშუალოდ 30%-ით გაიზრდება.
ამავდროულად, ხელოვნური ინტელექტის გამოყენების გავრცელება ბევრ პოზიციას საფრთხის ქვეშ დააყენებს, რადგან ზოგიერთ შემთხვევაში რობოტები ანაცვლებენ ადამიანებს. WEF-ის პროგნოზით, 2027 წლისთვის, შეიძლება, აღრიცხვასა და ადმინისტრაციულ სამუშაოსთან დაკავშირებული 26 მილიონით ნაკლები სამუშაო ადგილი იყოს.
იმავდროულად, კომპანიებს ახალი მიდგომა აქვთ იმასთან დაკავშირებით, რა უნარები სჭირდებათ მათ თანამშრომლებს. WEF-ის თანახმად, ფირმები ახლა უფრო მეტად აფასებენ ხელოვნური ინტელექტის ინსტრუმენტების ეფექტურად გამოყენების უნარს, ვიდრე კომპიუტერულ პროგრამირებას.

წყარო : edition.cnn.com

ანალიტიკოსთა და მეცნიერთა დარბაზი ,,დოქტრინა”

ალბათ, ყველას სმენია პარიზის შეთანხმების შესახებ, რომლის მიზანიცაა, ტემპერატურის ზრდამ, პრეინდუსტრიულ პერიოდთან შედარებით, 1.5°C-იან ზღვარს არ გადააჭარბოს. ამის მიუხედავად, გაეროს ახალი პროგნოზის თანახმად, შესაძლოა, ადამიანის სამრეწველო საქმიანობისა და ანომალიური კლიმატური მოვლენების გამო, ეს მომდევნო 5 წელიწადში მოხდეს. ინფორმაციას უცხოური მედია ავრცელებს. 

კერძოდ, მსოფლიო მეტეოროლოგიური ორგანიზაციის (WMO) განცხადებით, იმის შანსი, რომ გლობალურად დედამიწის ზედაპირის ტემპერატურის ყოველწლიური ზრდა 1.5°C-იან მიჯნას დროებით გადასცდეს, 66 პროცენტია. ეს ისტორიაში პირველი მსგავსი შემთხვევა იქნება, რასაც ხელს, სავარაუდოდ, მოსალოდნელი თბილი სეზონური დინება, იგივე ელ-ნინიოც შეუწყობს. ეს და ჩვენ მიერ პროვოცირებული კლიმატის ცვლილება პლანეტას სერიოზულ საფრთხეს შეუქმნის, რადგან გრენლანდიასა და ანტარქტიდაზე ყინულის საფარის კოლაფსს, ასევე, მსოფლიოს სხვადასხვა ნაწილში სითბურ ტალღებს, ძლიერ გვალვებს, წყლის ნაკლებობასა და ექსტრემალურ ამინდს განაპირობებს.

გაეროში ამბობენ, რომ ელ-ნინიო მომდევნო თვეებში დაიწყება და სჯობს, ტემპერატურის მატებისთვის მოვემზადოთ. ამ დროს ქარი, რომელიც წყნარ ოკეანეში თბილ წყალს დასავლეთისკენ უბიძგებს, სუსტდება და მის ერთ ადგილზე დაგროვებას იწვევს. ეს კლიმატს მთელ მსოფლიოში ცვლის, ზოგან ჩვეულებრივზე მეტი ნალექი მოდის, ზოგან კი პირიქით, ძლიერი გვალვები იჩენს თავს. ცხელდება ატმოსფეროც, რაც სიტუაციას კიდევ უფრო აუარესებს.

WMO-ს პროგნოზით, 98 პროცენტია შანსი, რომ მომდევნო 5 წელში ერთ-ერთი რეკორდულად ცხელი იყოს და 2016 წელს დაფიქსირებულ ნიშნულს, ტემპერატურის 1.28°C-იან ზრდას, გადააჭარბოს. მოსალოდნელია წვიმის შემცირება ცენტრალურ ამერიკაში, ავსტრალიაში, ინდონეზიასა და ამაზონის მიმდებარედ, ხოლო არქტიკის რეგიონში – ყინულის ლღობის აჩქარება, რაც ჩრდილოეთ ნახევარსფეროში ტემპერატურის მარეგულირებელ სისტემებზე ცუდ გავლენას იქონიებს.

ანალიტიკოსთა და მეცნიერთა დარბაზი ,,დოქტრინა“