მედიცინა

ექიმი გიორგი ღოღობერიძე სოციალურ ქსელებში გავრცელებულ ცრუ ინფორმაციას გამოეხმაურა. მისი თქმით, სიმართლეს არ შეესაბამება ცნობები იმის შესახებ, რომ პირველი რეზუს-უარყოფითი სისხლის მქონე ადამიანებს კოვიდ-19 არ ემართებათ:

„ეს ინფორმაცია მეც ვნახე Facebook-ის რამდენიმე გვერდზე. ზოგჯერ პატარ-პატარა გვერდები ხალხის დაინტერესების მიზნით არასწორ სახელებს აწერენ ხოლმე სტატიებს. ასეთი სათაური იყო სწორედ, რომ თითქოს ​სისხლის რომელიღაცა ჯგუფს არასდროს ემართება კოვიდი. რა თქმა უნდა, ეს სიმართლე არ არის. ვინც ჩემი ვიდეო უშუალოდ ნახა და მოუსმინა მას, იქ განმარტებული იყო ის ფაქტი, რომ ამ ოთხი ჯგუფიდან, კოვიდ ინფექციის შემთხვევები ყველაზე იშვიათი იყო პირველი ჯგუფის შემთხვევაში.“

გიორგი ღოღობერიძის თქმით, პირველი ჯგუფის რეზუს-უარყოფითი სისხლის მქონე პაციენტებში ნამდვილად უფრო იშვიათად გვხვდება კოვიდ-19, ვიდრე სხვა ჯგუფებში:

„კოვიდ-19 უფრო ნაკლებად გვხვდებოდა, თუ ადამიანი იყო პირველი ჯგუფის სისხლის და რეზუს-უარყოფითი. ეს იმას არ ნიშნავს, რომ თუ ადამიანს აქვს პირველი რეზუს-უარყოფითი სისხლი, მას არასდროს დაემართება ვირუსი.​ მათაც დაემართებათ ვირუსი, უბრალოდ უფრო ნაკლებად, ვიდრე სხვა ჯგუფების შემთხვევაში.“

„კვლევა ჩატარდა დაახლოებით ნახევარ მილიონ ადამიანზე, სადაც შეისწავლეს სისხლის ჯგუფიც და კოვიდიც. ნახეს, რომ პირველი ჯგუფის სისხლში არსებული ანტისხეულები ​იცავდა ადამიანებს კოვიდის შემოჭრის შემთხვევაში მძიმე ფორმების განვითარებისგან. შეიძლება, ადამიანს დამართნოდა კოვიდი, მაგრამ ხშირად (არა ყოველთვის) ის იყო მსუბუქი ხასიათის. გარდა ამისა, ისევ პირველი და უარყოფითი რეზუსის შემთხვევაში ნაკლები იყო სისხლის შემადედებელი ფაქტორის შემცველობა. ეს იმას ნიშნავს, რომ პირველ რეზუსუარყოფითიან ადამიანებში უფრო ​ნაკლებად გვხვდებოდა თრომბოზი. ეს არ ნიშნავს, რომ არასდროს გვხვდებოდა. ის ინფორმაცია, რომ თითქოს კოვიდი არასდროს ემართება პირველი უარყოფითი სისხლის მქონე ადამიანს, არასწორია. მათაც ემართებათ კოვიდი, უბრალოდ უფრო ნაკლებად, ვიდრე სხვებს,“ – აღნიშნულ საკითხზე გიორგი ღოღობერიძემ ტელეკომპანია იმედის გადაცემაში „იმედის დღე“ ისაუბრა.

ახალგაზრდა ანალიტიკოსთა და მეცნიერთა დარბაზი “დოქტრინა”

19 ივლისს ნეაპოლის ერთ-ერთი კლინიკის ქირურგებმა ჩირო მაიელოს ხელმძღვანელობით სრულად ხელოვნური გულის Aeson პირველი კომერციული იმპლანტაცია ჩაატარეს. ამის შესახებ Aeson-ის მწარმოებელი ფრანგული კომპანიის, Carmat-ის განცხადებაშია ნათქვამია.

პროთეზი მსხვილი რქოსანი საქონლის ორგანიზმის ქსოვილებისა და სხვა ბიოთავსებადი მასალებისგან არის დამზადებული. დატვირთვის გათვალისწინებით, ის გულის მუშაობის ინტენსივობის შეცვლის საშუალებას იძლევა. პროთეზი კვების გარე წყაროს დახმარებით მუშაობს.

ამასთან, პაციენტს ხელოვნური გულით დამატებითი აღჭურვილობის ტარება მოუწევს, რომლის წონაც 4 კილოგრამია. მათ შორის აკუმულატორებს, რომლებიც ყოველ 4 საათში უნდა დაიტენოს.

ხელოვნური გული Aeson-ი იმ პაციენტებისთვის არის შექმნილი, რომლებსაც ტრანსპლანტაცია ესაჭიროებათ და დონორის მოლოდინში არიან. მწარმოებლები ფიქრობენ, რომ ასეთი გულით ცხოვრებას ადამიანი 6 თვის განმავლობაში შეძლებს, თუმცა თვითონ მოწყობილობამ შეიძლება 5 წლის განმავლობაშიც იმუშაოს.

იტალიაში ჩატარებული ოპერაციის ღირებულებამ 150 ათასი ევრო შეადგინა. Carmat-მა ევროკავშირში Aeson-ის გაყიდვის სერტიფიკაცია გასული წლის დეკემბერში მიიღო.

ახალგაზრდა ანალიტიკოსთა და მეცნიერთა დარბაზი ,,დოქტრინა”

“ამ დროისთვის საკმარისი მტკიცებულება არ არსებობს იმის დასადასტურებლად, რომ ის უფრო აგრესიულია, ვიდრე კორონავირუსის სხვა ვარიანტები, თუმცა ერთ-ერთი მიზეზი, რის გამოც “ლამბდას” საფრთხე უნდა გავითვალისწინოთ, მისი გამორჩეული თვისებაა –  ეს ვარიანტი შეიცავს სპაიკ ცილის რამდენიმე მუტაციას, რომელიც ვირუსის სწრაფად გავრცელების უნარზე გავლენას ახდენს.” – მეცნიერების ამ მოსაზრებას კიდევ ერთხელ ამოიკითხავთ Financial Times-ის მიერ გამოქვეყნებულ მასალაში. 

რა ვიცით “ლამბდა” შტამზე და რა სიმპტომები ახასიათებს მას

მართალია, მსოფლიო ჯანდაცის ორგანიზაციას ვირუსის მუტირებული ვერსია “შეშფოთების გამომწვევი შტამების” სიაში ჯერ არ შეუყვანია, თუმცა “საფრთხისშემცველად” ასახელებს და მის შესახებ აქტიურ კვლევებს იწყებს.

“ლამბდა” შტამი იგივე ლათინოამერიკული ვარიანტია, რომელიც პირველად 2020 წლის ბოლოს ჩილეში, პერუში, ეკვადორსა და არგენტინაში დაფიქსირდა. ამის შემდეგ ის მსოფლიოს 27 ქვეყანაში აღმოაჩინეს, მათ შორის დიდ ბრიტანეთში.

მკვლევრების შეშფოთებამ კი მას შემდეგ მოიმატა, რაც WHO-ს მონაცემების მიხედვით დადასტურდა, რომ პერუში ინფიცირების შემთხვევების 82 პროცენტი სწორედ ეს შტამი აღმოჩნდა. აქვე უნდა აღინიშნოს, რომ პერუ ერთ-ერთია იმ ქვეყნებს შორის, სადაც გარდაცვალების მაღალი მაჩვენებელი ფიქსირდება – ქვეყანაში დღემდე კოვიდით გარდაცვალების 192 687 შემთხვევა აღირიცხა.

მიმდინარე წლის 15 ივნისს ჯანდაცვის მსოფლიო ორგანიზაციის მიერ “ლამბდას” შტამი კლასიფიცირდა, როგორც საყურადღებო ვარიანტი და მისი სიმპტომებიც მალევე დაასახელა.

აღმოჩნდა, რომ ისინი არ განსხვავდება კორონავირუსისთვის დამახასიათებელი დომინანტი სიმპტომებისგან და ძირითადი ჩამონათვალი ასე გამოიყურება – სხეულის ტემპერატურის მატება, გართულებული ხველა, ყნოსვისა და გემოს შეგრძნების დაკარგვა.

მუტაციის უჩვეულო შესაძლებლობა – თავსატეხი მეცნიერებისთვის

მიუხედავად იმისა, რომ სირთულის ხარისხით “ლამბდა” შტამს ჯერჯერობით არ განიხილავენ ალფას, ბეტას, გამასა და დელტა შტამებს შორის, მას მაინც ახასიათებენ, როგორც უჩვეულო შესაძლებლობების მქონე ვარიანტს.

როგორც აღმოჩნდა, აღნიშნული შტამი შეიცავს სპაიკ ცილის რამდენიმე მუტაციას, რომელიც ვირუსის გავრცელების ხარისხზე გავლენას ახდენს.

🔴  “ლამბდას აქვს სპაიკ ცილის მუტაციის უნიკალური ნიმუში, რომელსაც ვირუსი ადამიანის უჯრედების დასაინფიცირებლად იყენებს. განსაკუთრებით საინტერესოა ერთ-ერთი მუტაცია – L452Q, რომელიც L452R-ის მსგავსია, სწორედ ამ უკანასკნელზე შეიძლება ვიფიქროთ, რომ ის ხელს უწყობს ვირუსის “დელტა” ვარიანტის მაღალ ინფექციურობას.” – ამბობენ მკვლევრები.

სანტიაგოს უნივერსიტეტის მეცნიერებმა ადგილობრივი სამედიცინო პერსონალის სისხლის ნიმუშები გამოიკვლიეს და “ლამბდას” ქცევა შეისწავლეს – აღმოჩნდა, რომ ეს შტამი უფრო ინფექციურია, ვიდრე “გამა” და “ალფა” და გაცილებით უკეთ შეუძლია, ვაქცინაციის შედეგად წარმოქმნილ ანტისხეულებს დააღწიოს თავი, შესაბამისად, პირველადი მონაცემებით, მეცნიერების დასკვნა ასეთია:

“ლამბდას ვარიანტის მწვავე პროტეინში არსებული მუტაციები ანტისხეულების განეიტრალებას და ინფექციის ზრდას იწვევს”.

“ლამბდას” შტამი სწრაფად ვრცელდება – არგუმენტები რიცხვებში

გასული წლის დეკემბერში, მაშინ როდესაც ლათინოამერიკული შტამი პირველად პერუში გამოვლინდა, ის აღმოჩნდა 200 ნიმუშიდან მხოლოდ ერთში;

მიმდინარე წლის მარტში კი, ანუ დაახლოებით 3 თვეში, პერუს დედაქალაქ ლიმაში ჩატარებული კვლევის შედეგად დადგინდა, რომ “ლამბდა” შტამი შესწავლილი ნიმუშების 50 პროცენტს შეადგენდა;

ივნისის თვეში მონაცემი საგრძნობლად გაიზარდა და შესწავლილი შემთხვევების 80 პროცენტი სწორედ ამ ვარიანტს უკავშირდება.

ვირუსის “ლამბდა” ვარიანტი გავრცელებულია ჩილეშიც, სადაც ახალი შემთხვევების თითქმის მესამედი სწორედ ამ შტამს წარმოადგენს.

მონაცემების მიუხედავად, მსოფლიო ჯანდაცვის ორგანიზაციაში მიიჩნევენ, რომ ეს შტამი ნაკლებად საფრთხისშემცველია, ვიდრე დიდ ბრიტანეთში, სამხრეთ აფრიკაში, ბრაზილიასა და ინდოეთში აღმოჩენილი მუტაციები, თუმცა იმასაც ხაზგასმით აღნიშნავენ, რომ მონიტორინგი მაინც უმნიშვნელოვანესია.

ლათინური ამერიკა პანდემიისგან ყველაზე მეტად დაზარალებული რეგიონია. კონტინენტზე, რომელზეც გლობალური მოსახლეობის მხოლოდ 8 % ბინადრობს, მსოფლიოს მასშტაბით აღრიცხული კოვიდშემთხვევების 20 % მოდის.

ლათინურ ამერიკაში გენეტიკური კვლევის ობიექტების ნაკლებობა ართულებს იმის ცოდნას, თუ რამდენად მართავდა “ლამბდა” ვარიანტი რეგიონში ეპიდვითარებას და არის თუ არა მისი დამსახურება ვირუსის უკონტროლო გავრცელება.

ბოლო კვირების განმავლობაში, ინფიცირებულთა რიცხვმა საგანგაშოდ იმატა კოლუმბიაში, პარაგვაისა და ურუგვაიშიც.

4 კვირის განმავლობაში თითქმის 30 ქვეყანაში – “ლამბდა” შტამი ახლა უკვე ავსტრალიაშიც ფიქსირდება

დღეს უცხოური მედიასაშუალებები წერენ, რომ “ლამბდა” შტამი უკვე ავსტრალიაშიც აღმოაჩინეს.

“ეს შემაშფოთებელია, რადგან შესაძლოა მუტირებული ვარიანტი “დელტა” შტამზე ინფექციურიც კი იყოს. ლათინოამერიკული ვარიანტი აოცებს მსოფლიო ჯანდაცვის ორგანიზაციას, რადგან ოთხი კვირის განმავლობაში ის თითქმის 30 ქვეყანაში გავრცელდა.” – წერენ უცხოური ონლაინგამოცემები და აღნიშნავენ, რომ ავსტრალიაში ეს შტამი დაუდასტურდა მოგზაურს, რომელიც კარანტინს  აპრილში, ახალ სამხრეთ უელსის ერთ-ერთ სასტუმროში გადიოდა.

მეცნიერები აღნიშნავენ, რომ ეპიდემიის კონტროლის მცდელობა ვირუსის გავრცელების კონტროლისა და შემთხვევების შემცირების პირდაპირპროპორციულია, ამიტომ წამყვანი ლაბორატორიების კვლევებში აქტიურ ჩართვას ითხოვენ.

აქვე – NYU Grossman-ის მედიცინის სკოლის წინასწარი კვლევის მიხედვით, შესაძლოა ვაქცინებმა ამ ვარიანტის წინააღმდეგაც მაღალი  ეფექტიანობა აჩვენოს, თუმცა კვლევა ჯერ არ დასრულებულა და პანდემიური მსოფლიოც საბოლოო შედეგების გამოქვეყნებას ელის.

ახალგაზრდა ანალიტიკოსთა და მეცნიერთა დარბაზი ,,დოქტრინა”

შეკითხვა: რომელი ვაქცინით ავიცრა – ჩინურით, თუ ფაიზერს დაველოდო. ვისაც უბრალო შეჯამება აინტერესებს მათთვის მარტივად ვიტყვი:

ახალგაზრდა ანალიტიკოსთა და მეცნიერთა დარბაზი ,,დოქტრინა”