მედიცინა

საფრანგეთში, გერმანიაში, ავსტრიაში, შვედეთში, ბელგიაში, დანიასა და ნორვეგიაში 65 წელს გადაცილებული ადამიანების Oxford/AstraZeneca-ს კორონავირუსის საწინააღმდეგო ვაქცინით აცრის რეკომენდაციას არ იძლევიან.

შვეიცარიასა და იტალიაში კი აცხადებენ, რომ აღნიშნული ვაქცინით მხოლოდ 55 წლამდე პირებს აცრიან.

გადაწყვეტილების მიზეზად ყველა მათგანი ხანდაზმულთა ჯგუფებში ვაქცინის გამოყენების შესახებ არასაკმარისი მონაცემების არსებობას ასახელებს.

“ჩვენ გადავხედეთ დოკუმენტაციას და სანამ ხანდაზმულებში ვაქცინის ეფექტზე უფრო მეტ მონაცემს არ ვნახავთ, ჩვენი რეკომენდაციაა, რომ AstraZeneca– ს ვაქცინა პირველ რიგში 65 წლამდე ასაკის ადამიანებს შევთავაზოთ”, – განაცხადა დანიის ჯანდაცვის ეროვნული საბჭოს წარმომადგენელმა ბოლეტ ზიბორგმა.

”გვინდა დავრწმუნდეთ, რომ ეროვნულ დონეზე ვაქცინის პოლიტიკისთვის საუკეთესო მონაცემები და ფონი გვაქვს,“-  აღნიშნა ნორვეგიის საზოგადოებრივი ჯანდაცვის ინსტიტუტის სპიკერმა.

გამოცემა Bloomberg-ის ბოლო მონაცემების მიხედვით, ამ დროისთვის მსოფლიოში კორონავირუსის საწინააღმდეგო ვაქცინაცია 105 მილიონამდე მეტ ადამიანს ჩაუტარდა. მათ შორის, აშშ-ში 33.7 მილიონზე მეტი ადამიანი აიცრა, რაც მოსახლეობის 10.2%-ს შეადგენს. აშშ-ს ჩინეთი მოჰყვება 24 მილიონზე მეტი ვაქცინირებული პაციენტით, რაც მოსახლეობის 1.7%-ს შეადგენს. ევროკავშირში კი, საერთო ჯამში ვაქცინაცია 13.4 მილიონ ადამიანს ჩაუტარდა. გამოცემის ცნობით, ყველაზე სწრაფი ტემპით მოსახლეობის ვაქცინაცია ისრაელში მიმდინარეობს, სადაც უკვე 5 მილიონი ადამიანი აიცრა, რაც მთლიანი მოსახლეობის 55.8%-ს შეადგენს.

წყარო : CNN , Bloomberg

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

ბრიტანელი მეცნიერების კვლევით, ჰოსპიტალიზებული და კოვიდგადატანილი პაციენტების მესამედი კვლავ საავადმყოფოში მოხვდა სადაც საშუალოდ ყოველი მეათე მათგანი გარდაიცვალა.

CNN-ის ინფორმაციაში ვკითხულობთ, რომ ბრიტანეთის ეროვნული სტატისტიკის ოფისის, ლესტერის უნივერსიტეტისა და სხვა მეცნიერთა ჯგუფმა, 48 000-მდე იმ ადამიანის მონაცემები შეისწავლა, რომლებიც, აგვისტოს ბოლო პერიოდამდე, კორონავირუსის გამო საავადმყოფოებში მკურნალობდნენ. მათ 140 დღის, ანუ დაახლოებით 5 თვის მანძილზე აკვირდებოდნენ.

„საავადმყოფოებიდან გაწერილი ადამიანების თითქმის მესამედი სამკურნალო დაწესებულებებში ხელახლა მოხვდა და ყოველ 10 ადამიანში ერთზე მეტი გარდაიცვალა“, – წერს გუნდი კვლევის წინასწარ შედეგებში, რომელიც ჯერჯერობით სამედიცინო ჟურნალის მიერ განხილული არ არის, თუმცა ინტერნეტში განთავსებულია.

კვლევის ავტორების მტკიცებით, იმ ადამიანებს, რომლებსაც ხელახალი ჰოსპიტალიზაცია დასჭირდათ, გულთან, თირკმლებთან, ღვიძლსა და სხვა ორგანოებთან დაკავშირებული პრობლემები აღენიშნებოდათ.

„განსაკუთრებით ხშირი იყო დიაბეტისა და ინფარქტის შემთხვევები,“ – აცხადებენ კვლევაში ჩართული მეცნიერები.

მათი განმარტებით, კორონავირუსის გამო ჯანმრთელობაზე ხანგრძლივი უარყოფითი ზეგავლენის მიმართ განსაკუთრებულად დაუცველები 70 წელს გადაცილებულ პირები არიან.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ამერიკელი მეცნიერების მიერ ჩატარებული კვლევის თანახმად, Pfizer/BioNTech-ის მიერ შექმნილი კორონავირუსის საწინააღმდეგო ვაქცინა კოვიდ 19-ის ახალი ვარიანტების ე.წ. სპაიკ ცილის N501Y მუტაციის მიმართ ეფექტურად მუშაობს.

მეცნიერების ნაწილის აზრით, ვირუსის ახალი ვარიანტები უფრო ადვილად და სწრაფად გავრცელებადი აღნიშნული მუტაციის გამო არიან.

კომპანია Pfizer-ის  წამყვანი მეცნიერის, ფილ დორმიცერის განცხადებით, ვაქცინა ეფექტური აღმოჩნდა როგორც აღნიშნული მუტაციის ასევე სხვა 15 მუტაციის მიმართაც, რომელზედაც ვაქცინის მოქმედება მანამდე დატესტეს.

”ამ დროისთვის 16 სხვადასხვა მუტაცია გვაქვს გამოცდილი და არც ერთ მათგანს ვაქცინის მოქმედებაზე მნიშვნელოვანი გავლენა არ ჰქონია, თუმცა ეს არ ნიშნავს, რომ მე-17 მუტაცია აღარ იქნება,”- აღნიშნა მეცნიერმა.

მისი თქმით, შეშფოთებას იწვევს სამხრეთ აფრიკის ვარიანტში აღმოჩენილი კიდევ ერთი, E484K მუტაცია.

კორონავირუსის ახალი ვარიანტების აღმოჩენისთანავე მსოფლიოს სხვადასხვა ქვეყნის მეცნიერებს გაუჩნდათ ეჭვი და შიში იმასთან დაკავშირებით, რომ ვაქცინებმა, რომლების გამოყენებითაც მოქალაქეების ვაქცინაცია დაწყებულია, შესაძლოა ადამიანები ვირუსის ახალი შტამებისგან დაინფიცირებისგან ვერ დაიცვან. მეცნიერები განსაკუთრებულ შეშფოთებას სამხრეთ აფრიკაში გაჩენილი ვარიანტის მიმართ გამოხატავენ.

რიდინგის უნივერსიტეტის ციტოლოგიური მიკრობიოლოგიის ასოცირებულმა პროფესორმა სიმონ კლარკმა რამდენიმე დღის წინ განაცხადა, რომ  სამხრეთ აფრიკაში აღმოჩენილ ვარიანტს ე.წ. ბრიტანული ვარიანტისგან განსხვავებული ბევრი ისეთი მუტაცია აქვს, რომლებიც სპაიკ ცილაში უფრო ძლიერ ცვლილებებს იწვევენ.

მეცნიერები მსგავსი კვლევის ჩატარებას ე.წ. ბრიტანულ და სამხრეთ აფრიკულ ვარიანტებში აღმოჩენილ სხვა მუტაციებზეც გეგმავენ.

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”