გამოგონება - ინოვაცია

ზოგადად, ავტომანქანით გადაადგილება და შემდგომში მისი უსაფრთხოდ დაპარკინგება საკმაოდ რთული და კომპლექსური პრობლემაა, რომელიც დღეს ყველა მძღოლის საზრუნავს წარმოადგენს.  

ქალაქ ბათუმში ამ ყველაფერს ავტოფარეხების პრობლემა ემატება. აქ ავტოფარეხების აკრძალვის შემდეგ, ავტომანქანები ღია ცის ქვეშ დარჩა, რაც საკმაოდ რთული აღმოჩნდა მანქანის მფლობელებისათვის. სწორედ ამ პრობლემის   მოგვარებაზე ზრუნვა ახალგაზრდა გამომგონებლებმა დაიწყეს და დიდ  წარმატებასაც მიაღწიეს ამ კუთხით.

მოძრავი ავტოფარეხი – ეს საკმაოდ საინტერესო და ინოვაციური პროექტია, რომელიც ბათუმელმა გამომგონებლემა უკვე დააპატენტეს  და მალე მის მასობრივ წარმოებასაც აპირებენ.

რამდენად ექნება პრაქტიკული გამოყენება ამ გამოგონებას და მოაგვარებს თუ არა ეს ქალაქში არსებულ  პარკირების პრობლემეს, ამას დრო გვიჩვენებს, თუმცა გიორგი ბობოხიძის ამ გამოგონებამ უკვე მიიპყრო საკმაოდ დიდი ყურადღება  და დიდი დაინტერესებითაც სარგებლოს საზოგადოების მხრიდან.

გიორგი 23 წლისაა,  დაამთავრა შოთა რუსთაველის სახელმწიფო უნივერსიტეტის ტექნოლოგიური ფაკულტეტი სამშენებლო განხრით. ამ სფეროთი და ზოგადად ინოვაციური პროექტების შექმნით დაინტერესებული სკოლის პერიოდიდანვე იყო, რადგან გრძნობდა საკუთარ მიდრეკილებას და ნიჭს, რომლის რეალიზებასაც შეძლებდა. შემდეგ ორ სხვა სტუდენტთან ერთად ,,creative group-ი” ჩამოაყალიბა და სხვადასხვა სამეცნიერო პროექტზე დაიწყო მუშაობა.

გიორგი, გარდა სამეცნიერო საქმიანობისა, ჯანსაღი ცხოვრების წესსაც მისდევს. სპორტის სახეობებიდან განსაკუთრებით იტაცებს ველორბოლა და როგორც ამბობს, მისი ამ ჰობის დამსახურებით ნახევარი საქართველო აქვს უკვე მოვლილი.

სამეცნიერო საქმიანობის ინსპირაციებსა და სამუშაო პროცესის სირთულეებზე გიორგი ბობოხიძე დოქტრინას ესაუბრა:

-როდის გაგიჩნდა გამოგონების იდეა და რამ განაპირობა ეს?

-2016 წელს გამიჩნდა იდეა შემექმნა რაიმე ინოვაციური პროდუქტი. იდეა მომდინარეობს იქიდან რომ,  ქალაქში აიკრძალა კაპიტალური  ავტოფარეხები, რამაც გამოიწვია, ტრანსპორტის ღია ცის ქვეშ დატოვება.  დამებადა იდეა, შემექმნა ისეთი პორტატული ავტოფარეხი,  რომელიც  იქნებოდა მობილური და ასევე დაიცავდა სატრანსპორტო საშუალებებს ატმოსფერული ნალექებისგან. ამავე წელს  ეს იდეა დავაპატენტე. რაც შეეხება სამუშაო პროცეს, შევქმენით პირველი პროტოტიპი,  რომელსაც დიდი დრო და შრომა დასჭირდა და რომელმაც საკმაოდ წარმატებული შედეგები აჩვენა.

-რა სირთულეები ახლდა თავად გამოგონების შექმნის პროცესს?

-სირთულე საკმაოდ ბევრი იყო, რადგანაც ვმუშაობდით პროდუქტზე, რომელიც ჩვენთვის უცხო და რთული იყო. საბოლოო შედეგით მაინც  კმაყოფილი დავრჩით.

-რაში მდგომარეობს შენი გამოგონების უნიკალურობა?

-ჩემთვის ჩემი გამოგონების უნიკალურობა, როგორც ავტორისთვის , განუსაზღვრელია, რადგანაც ეს ჩემი პირველი გამოგონებაა. ზოგადად მისი უნიკალურობა და სარგებლიანობა უკვე იმ ხალხის შესაფასებელია,  ვინც ამით დაინტერესდა და შეიძენს.

-რას საქმიანობ ამჟამად და გვიამბე სამომავლო გეგმებზე.

-სხვა უამრავ პროექტზე ვმუშაობ, მსგავს და ამაზე უფრო მასშტაბიანზე. სამომავლო გეგმებს რაც შეეხება მ, იზნად მაქვს ჩემი კომპანია უფრო წარმატებული გავხადო.

მასალა მოამზადა:  ანა ურუშაძემ

ახალგაზრდა ანალიტიკოსთა და მეცნიერთა დარბაზი ,,დოქტრინა“

30 მარტს ,,EUhack-ის” გუნდის ორგანიზებით კიდვე ერთი 48–საათიანი ჰაკათონი ჩატარდა, რომლის ფარგლებშიც პირველი ადგილი დაიკავა აპლიკაცია „Let’s watch-მა“. აპლიკაცია საშუალებას გვაძლევს ერთ ან რამდენიმე მეგობართან ერთად ვუყუროთ რაიმე ფილმსა თუ სერიალს სინქრონში, მისი ავტორები ივანე ჯავახიშვილის სახლობის სახელმწიფო უნივერსიტეტის სტუდენტები – აკაკი ხოჭოლავა, ჯონი კოსტავა, თორნიკე ცომაია და გიორგი ჭეიშვილი არიან. აპლიკაციის ინოვაციურ მხარეებსა და სამომავლო გეგმებზე აკაკი ხოჭოლავა გვიამბობს.

–აკაკი, თქვენი აპლიკაცია „Let’s watch-ი“ პროექტის გამარჯვებული გახდა, გვიამბეთ მისი მახასიათებლების შესახებ.

–“Let’s Watch-ი” არის აპლიკაცია, რომელიც 2 ან მეტ ადამიანს აძლევს დისტანციის მიუხედავად სინქრონში უყურონ სასურველ ფილმს, ვიდეოს ან მოუსმინონ მუსიკას  ვირტუალური კონტაქტის მაქსიმალური უზრუნველყოფით, ვგულისხმობ – საუბარსა და მიმოწერს ნახევრადგამჭვირვალე ჩატში, რათა არ დაირღვეს ფილმის ყურების პროცესი, მაყურებლებს შეუძლიათ მონიშნონ ეკრანზე კადრები, სხვადასხვა ფრად მიახატონ სასურველი გამოსახულებები და ამ ფორმით გაუზიარონ შთაბეჭდილება, რაღა თქმა უნდა, მიხატული გამოსახულება სულ რამდენიმე წამში გაქრება, რათა ამით დისკომფორტი არ შეიქმნას.

აპლიკაციას აქვს კიდევ ერთი საინტერესო თვისება, თუ თქვენ ფილმს უყურებთ ლეპტოპისა თუ პერსონალური კომპიუტერისგან მოშორებით და ამ დროს გსურთ რომ მეგობრებს/თანამაყურებლებს გაუზიაროთ რაიმე, ასეთ შემთხვევაში შეგიძლიათ ძირითად აპლიკაციას დაუკავშირდეთ სპეციალური Assistant-აპლიკაციით და ისაუბროთ, გაუგზავნოთ მესიჯები თანამაყურებლებს, გამოიყენოთ თქვენი მობილური როგორც paint-pad-ი და დახატოთ რაიმე რაც ასევე გამოჩნდება თანამაყურებლების ეკრანზეც. ამასთან – უნდა აღინიშნოს, რომ ენის ან ხარისხის შეცვლა და ხმის მომატება არის ინდივიდუალური, შესაბამისად, თუ თქვენ გსურთ უყუროთ რუსულად, სხვა მონაწილეს უნდა უყუროს ინგლისურად, ეს პრობლემას არ წარმოადგენს.

აღსანიშნავია, რომ როდესაც ერთ-ერთი მონაწილე თავად გადაახვევს ან დააპაუზებს ვიდეოს/ფილმს ან იგივე მოხდება რაიმე ტექნიკური პრობლემიდან გამომდინარე,  გამოსახულება სხვა მაყურებლებთანაც დაპაუზდება და როგორც კი ჩაიტვირთება ფილმი – პროცესი ყველასთან ავტომატურად გაგრძელდება.

-თუ აქვს თქვენს აპლიკაციას უცხოური ანალოგი და რამ გადაგაწყვეტინათ სწორედ ამ ტიპის პროდუქტზე მუშაობა?

-მსგავსი ტიპის ანალოგი არ არსებობს, უბრალოდ არსებობს პროგრამები რომლებითაც შეიძლება თქვენი კომპიუტერის გამოსახულების გაზიარება სხვა ადამიანებთან და ასეთი გზით ნახვა ფილმის ან ვიდეოსი, როგორიცაა “Skype”, ,,Team Viewer-ი”, მაგრამ მოგეხსენებათ ეკრანის გაზიარებისას იკარგება გამოსახულების ხარისხი, მაშინ როცა ,,Let’s Watch-ი” გაძლევთ საშუალებას უყუროთ ფილმებს სრული ხარისხით და ამასთან მიიღოთ მაქსიმალური კომფორტი თქვენი ემოციების გამოხატვისას.

-როდის შეეძლება დაინტერესებულ პირს თქვენი აპლიკაციით სარგებლობა?

–აპლიკაცია მცირე ხნით დახურული ტესტირების რეჟიმშია, მაგრამ უახლოეს მომავალში იგი გადავა ღია ტესტირების რეჟიმში, რის შედეგადაც ნებისმიერი მოხალისე შეძლებს ტესტირების პროცესში მონაწილეობის მიღებას და წვლილის შეტანას, საბოლოოდ კი როდესაც ღია ტესტირებაც დასრულდება – აპლიკაცია გაეშვება დასრულებული სახით.

-სამომავლოდ ხომ არ გეგმავთ აპლიკაციისთვის სხვა ფუნქციების დამატებასაც?

-რა თქმა უნდა, ვაპირებთ მოცემული აპლიკაციის განვითარებას, გეგმაში გვაქვს რომ აპლიკაციას გარდა გასართობისა – შევძინოთ საგანმანათლებლო ხასიათიც, რის შედეგადაც სტუდენტები და მოსწავლეები შეძლებენ საერთ დავალებების შესრულებას ონლაინრეჟიმში, ექნება ისეთი პრაქტიკული ფუნქციები როგორიცაა: ფორმულებისგან გრაფიკების აგება ავტომატურად და გაზიარება სხვებისთვის, კალკულაცია, ინტერფეისში ჩაშენებული ,,ინტერნეტძებნა” და ძებნის შედეგების ნახვება ჩვენება მონაწილეებისთვის. ეს უკანასკნელი მოსწავლეს საშუალებას მისცემს აღმოჩენილი რესურსი მარტივად გაუზიაროს სხვა მონაწილეებს.

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა“