გამოგონება - ინოვაცია

ბაჩო ჩხარტიშვილი 21  წლისაა, ის გრიგოლ თავართქილაძის სასწავლო უნივერსიტეტში სამართალმცოდნეობის სტუდენტია, სწავლობს მეოთხე კურსზე.
ბაჩო წარმოშობით გურიიდანა. ბავშვობა ლანჩხუთის რაიონის სოფელ წყალწმინდაში გაატარა და სკოლაც აქ დაამთავრა.
უყვარს ბევრი რამის კეთება და აკეთებს მხოლოდ იმას, რაც სიამოვნებას ანიჭებს. ყველაფერი ეს კი მუსიკის გარეშე წარმოუდგენელია მისთვის.
ბავშვობიდან აინტერესებდა იარაღი, სწორედ დამამთავრებელ კლასში ყოფნის დროს გაუჩნდა იდეა, რომელიც  ბევრი შრომისა და ცდის შემდეგ საინტერესო გამგონებად აქცია. ბაჩოს სურდა, გაეუმჯობესებინა იარაღის ფუნქციონირება და იგი უფრო მოსახერხებელი და მრავალჯერადი გამოყენების გაეხადა.
18 წლის ასაკში მან გამოიგონა მექანიზმი, რომელიც იარაღზე დამაგრების შემდეგ ასრულებს მრავალ ფუნქციას და შესაძლებელია როგორც ნადირობა, ასევე თევზაობა, სამიზნეებზე სროლაც სპეციალური ისრის გამოყენებით. იარაღზე მუშაობის შედეგად ბაჩომ ასეთი შედეგი მიიღო, მექანიზი, რომელი 2კგ და 500 გრ-ს იწონის, მშვილდზე მაგრდება 7-ცალიანი საისრე, დანა, სათევზაო მოწყობილობა, ასევე მობილური, რათა შესაძლებელი იყოს ამ ყველაფრის სამუშაო პროცესის გადაღება.
გამოგონილი ისრის მშვილდი ისვრის სხვადასხვა მასის ისრებს: 8-გრამიანსა და 60-მილიგრამიანს, 5-გრამიანსა და 120-მილიგრამიანს და ასევე მას შეუძლია 3 გრამისა და 160 მილიგრამი მასის ისრების სროლაც.
ახალგაზრდა გამომგონებელს ყოველთვის უყვარდა ხატვა და ჩხირკედელაობა, თუმცა მსგავს მექანიზმე მუშაობა მისთვის დიდი სიახლე და გამოწვევა იყო.
მარტო მუშაობდა სახლის პირობებში, მხოლოდ youtube-ის   დახმარებით და ნაცნობების სკეპტიკურ დამოკიდებულებას მრავაჯერადი ცდითა და დაუღალავი შრომით პასუხობდა.
საბოლოოდ სამი თვის შემდეგ, ბევრმა ნახატმა, უფრო ბევრმა ცდამ და გათენებულმა ღამეებმა შედეგი გამოიღო და გამომგონებელმაც შეძლო საკუთარი იდეის რეალობაში მოყვანა.
ბაჩომ მონაწილეობა მიიღო ლეონარდო დავინჩის ნორჩ მეცნიერებათა და გამოგონებელთა პროექტში და 36 ქვეყნის მასშტაბით მეორე ადგილი დაიკავა, საქართველოში კი თავისი გამოგონებით პირველ პოზიციაზე გავიდა.
კეკულეს არ იყოს, რომელმაც ბენზოლის სტრუქტურა სიზმარში იხილა, ბაჩომ სწორედ ასე მიაგნო მექანიზმის აგებულების ძირითად საიდუმლოს.
„იმდენად ვიყავი ამ საქმით გატაცებული და მთელი დღეები ამით დაკავებული, რომ დამესიზმრა მექანიზი და გამოღვიძებისთანავე შევუდექი მუშაობას. ყველაზე დიდი სიამოვნებაა, როდესაც რაღაცას ქმნი, ბევრი შეცდომის და მარცხის მერე და საბოლოოდ შედეგამდე მაინც მიდიხარ.”
მექანიზმისთვის ახალგარზდა შემოქედმა ხელმისაწვდომი მასალები: რკინა, ფოლადი, პლასტმასი და ცოტა ხე გამოიყენა.
პროექტში მიღწეული წარმატების შემდეგ ინვესტორებიც გამოჩნდნენ და მექანიზმის 600 დოლარად შესყიდვა შესთავაზეს, თუმცა შემოქმედი ვერ შეელია პირველ გამოგონებას.
ახლა ნორჩი გამომგონებელი ახალ პროექტზე მუშაობს. არ სცდება თავისი ინტერესესის სფეროს- იარაღს. ბაჩო აპირებს შექმნას იგივე მექანიზმი კონდახიანი მშვილდისთვის , იგივე არბალეტისთვის, რომლის დახმარებიტაც ისრის სასროლი მანძილი 200 მეტრამდე გაიზრდება.
ამჟამად სწავლითაა დაკავებული, თუმცა თავისუფალ დროს ისევ ჩხირკედელაობას აგრძელებს და ზუსტად იცის რომ ეს ის საქმეა, რომლის კეთებას მას ძალიან სიამოვნებს.

მასალა მოამზადა: ანა ურუშაძემ

ახალგაზრდა ანალიტიკოსთა და მეცნიერთა დარბაზი ,,დოქტრინა”

 11 დეკემბერს დასრულდა Garage48-ის მიერ ორგანიზებული ჰაკათონი ,,Gemification&Entertainment-ი”, რომელშიც 100-მდე მონაწილემ ესტონელი მენტორების დახმარებით, 48 საათის განმავლობაში შეძლო, რომ წარედგინა საკუთარი ინოვაციური იდეები. პროექტის ფარგლეში საუკეთესო ტექნიკური გუნდი კომპანია ,,ARX-ის” რამდენიმე წევრით დაკომპლექტებული გუნდი გახდა, რომელთაც ძალიან მოკლე დროში შექმნეს დახვეწილი აპლიკაცია სახელწოდებით „Ladybug-ი”, რომელიც დაკარგული ნივთების მარტივად პოვნაში დაგვეხმარება. აპლიკაციის შესახებ იდეის ერთ-ერთი ავტორი ნიკა დევაშვილი გვიამბობს.

ქართველი ახალგაზრდების მიერ შექმნილი „Ladybug-ი” – აპლიკაცია, ადამიანებს თავიანთი დაკარგული ნივთების მოძიებაში დაეხმარება, ეს გახლავთ სისტემა, სადაც ნებისმიერ ადამიანს შეუძლია გადაუღოს სურათი იმ ნივთებს, რომელებიც მისთვის მნიშვნელოვანია (მაგ: ბარათი, ტელეფონი, საფულე, საათი და ა.შ) და ატვირთოს ისინი აღნიშნულ აპლიკაციაში, ამის შემდეგ კი, კომპიუტერული ხედვის ალგორითმების გამოყენებით, აპლიკაცია იმახსოვრებს მათ და, იმ შემთხვევაში, თუ რაიმე ნივთი დაიკარგება და თუნდაც სრულიად უცნობი ადამიანმა იპოვის მას, მპოვნელს უბრალოდ დასჭირდება, რომ აპლიკაციის კამერით შეხედოს აღნიშნულ ნივთს და წამის მეასედებში შეძლებს დაუკავშირდეს მის პატრონს.

აპლიკაცია აქვს კიდევ ერთი, „Pokemon GO-ს“ სტილში წარმოდგენილი ფუნქცია, სადაც ადამიანებს, რომლებმაც დაკარგეს თავიანთი ნივთები, შეეძლებათ მიუთითონ ნივთის დაკარგვის სავარაუდო ადგილი და გარკვეული წამახალისებელი საჩუქარი დააწესონ მისთვის, ვინც ნივთს მიაგნებს, „თუ ვთქვათ რომელიმე მომხმარებელმა დაკარგა მეხსიერების ბარათი, რომელზეც მისთვის მნიშვნელოვანი ფაილებია, შეუძლია განათავსოს რუკაზე თავისი ნივთის დაკარგვის ადგილმდებაროება და მაგალითად დააწესოს გარკვეული ფულადი პრიზი მპოვნელისათვის, ხოლო ის ადამიანები რომლებსაც თავისუფალი დრო აქვთ და მაინც ახლოს არიან ამ ნივთთან დაიწყებენ ამ ნივთის ძებნას და ვინც პირველი მიაგნებს მას, მფლობელისგან დასაჩუქრდება,  ხოლო ჩვენს აპლიკაციაში ახალი წოდება მიენიჭება“ -აღნიშნავს ნიკა. ასევე, მაგალითად, დაკარგული ბარათის პოვნის შემთხვევაში შეძლებთ დაინახოთ როგორ გამოიყურება რეალურად ამ ბარათის მფლობელი და ადვილად დაუკავშირდებით მას ჩათის საშუალებით.

„Ladybug-ის“ იდეის ავტორი კომპანია „ARX-ია“, რომელიც 5 წევრისგან შედგება, მათ შორის, სტუდენტებთან ერთად, სკოლის მოსწავლეებიც არიან. ახალგაზრდებმა ჰაკათონში საუკეთესო ტექნიკური გუნდის სახელიც დაიმსახურეს, გამომდინარე იქიდან, რომ მენტორებისა და ჟიურის თვალსაზრისით მსგავსი პროდუქტის 48 საათის განმავლობაში შექმნა თითქმის შეუძლებელია,  თუმცა ახალგაზრდებმა დასახულ გამოწვევას წარმატებით გაართვეს თავი და მათ მიერ შექმნილი აპლიკაცია მომხმარებლისთვის უკვე 10 თებერვლიდან იქნება ხელმისაწვდომი, როგორც Android-ის, ასევე IOS ის App Store-ზე.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა”