გამოგონება - ინოვაცია

  ილიას სახელმწიფო უნივერსიტეტის ბიზნესის სკოლამ მაისის თვეში აბიტურიენტებისთვის ჩაატარა ბიზნესიდეების სასტიპენდიო კონკურსი –  ,,Abitour-ი“, რომელშიც დამამთავრებელი კლასის მოსწავლეებით დაკომპლექტებული ჯგუფები ერთმანეთს შეეჯიბრნენ საკუთარი ინოვაციური ბიზნესიდეების წარმოჩენაში. ერთ-ერთი ასეთი გახლავთ მოწყობილობა, რომელიც სმენადაქვეითებულ ადამიანებს დაეხმარება კომუნიკაციაში, ჩვენ იდეის ერთ-ერთ ავტორს  – მარიამ ჭარხალაშვილს გავესაუბრეთ.

      ,,MCE box-ი” (“Make communication easy”) არის ახალგაზრდა ქართველი გოგონების სტარტაპიდეა, რომლის მიზანია სმენადაქვეითებულ ადამიანებს დაეხმაროს საზოგადოებასთან აქტიური კომუნიკაციის მიღწევაში. პროექტის ავტორები არიან მარიამ ჭარხალაშვილი, სოფო პეტრიაშვილი და  ნინი შავდია, სამივე მათგანმა წელს დაამთავრა სკოლა და გადაწყვიტა მონაწილეობა მიეღო ილიას სახელმწიფო უნივერსიტეტის ბიზნეს იდეების სასტიპენდიო კონკურსში, უშუალოდ მათი ერთ გუნდში გაერთიანება კი, თვითონ პროექტის ფარგლებში მოხდა.

ინოვაციური მოწყობილობა  იმუშავებს შემდეგი პრინციპით: ჟესტური ენით მოსაუბრე ადამიანი დადგება ეკრანის წინ და იმეტყველებს ჟესტების ენით, მისი მოძრაობა კი ეკრანის მეორე მხარეს აისახება ტექსტური სახით, მეორე მხრივ კი, მოწყობილობას ექნება ,,Google Voice Search-იც“, და შესაძლებელი იქნება ეკრანზე ჟესტების ენით გამოისახოს ვერბალურად ნათქვამი ტექსტი, რაც სმენადაქვეითებული ადამიანისთვის გასაგებს გახდის სხვა პირისნ საუბარს.

მოწყობილობა, მარიამის თქმით, ძირითადად, საზოგადოებრივი დაწესებულებებისთვისაა განკუთვნილი, ,,ჩვენი მოწყობილობა, რომელიც შეიძლება დაიდგას სხვადასხვა დაწესებულებაში, კომპანიაში, ბანკსა თუ კვების ობიექტში და გაამარტივებს კომუნიკაციას სმენადაქვეითებულ ადამიანებსა და ამ დაწესებულების თანამშრომლებს შორის“ – აღნიშნავს ის.

გოგონებს სმენადაქვეითებულთა პრობლემებზე ადრეც უფიქრიათ, ,,Abitour-მა“ კი შესაძლებლობა მისცათ ფართო საზოგადოებისთვის წარედგინათ საკუთარი ნაფიქრი და დადებითი გამოხმაურებაც მოეპოვებინათ, მით უმეტეს რომ მათ მოწყობილობას არ აქვს უცხორი ანალოგი. რაც შეეხება პროტოტიპს, მისი შექმნა გარკვეულ ფინანსებთან არის დაკავშირებული და ამ ეტაპზეც გოგონებს დატვირთული სასწავლო პროცესიდან გამომდინარე ნაკლები დრო რჩებათ მისთვის, მაგრამ სამომავლოდ აუცილებელად გეგმავენ განავითარონ იდეა და მოიძიონ საჭირო რესურსები.

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

15 მაისს დაიწყო ფუნქციონირება ინოვაციურმა ქართულმა ვებგევრდმა –,,Fulwish.com-ი“, ის საშუალებას გვაძლევს გავაჩუქოთ ნივთები, რომლებიც აღარ გვესაჭიროება და მსგავსადვე, თავადაც შევძლოთ სხვა მომხმარებლების მიერ გამოქვეყნებული ნივთებიდან სასურველის შერჩევა. პლატფორმა საკმაოდ ორიგინალურია და მომავალში კიდევ უფრო დაიხვეწება, მის შესახებ იდეის ერთ-ერთ ავტორს -გიორგი გოგუაძეს გავესაუბრეთ.

ალბათ ყველას გვაქვს ნივთები, რომლებსაც აღარ ვიყენებთ, მაგრამ გადასაყრელად გვენანება და გულმოდგინედ ვინახავთ თვალისგან დამალულ ადგილას, მაშინ როცა შესაძლოა ისინი სხვისთვის ძალიან სასურველიც კი აღმოჩნდეს.„Fulwish.com-ი” ინგლისურენოვანია და მომავალში გაცილებით უფრო მეტი ადამიანისთვის იქნება ხელმისაწვდომი.

ვებგვერდის გამოყენება ძალიან მარტივია – თქვენ უღებთ ფოტოს ნივთს, რომლის გაცემაც გსურთ და ტვირთავთ ვებგვერდზე, მსურველები კი მარტივად გიკავშირდებიან და თანხმდებით შეხვედრის დროსა და ადგილზე. ასევე, სურვილის შემთხვევაში თავადაც შეგიძლიათ სხვა მომხმარებლების მიერ გამოქვეყნებული ნივთებიდან შეარჩიოთ სასურველი, მისწეროთ მფლობელს და დაელოდოთ გამოხმაურებას.

იდეის ავტორები გიორგი გოგუაძე და გიგა მეხრიშვილი არიან, როგორც გიორგი აღნიშნავს, კარგი იდეები ყველას მოგვდის, მთავარია გაგვაჩნდეს საიმისო გამბედაობა, რომ იდეა რეალობად ვაქციოთ – ,,ბევრს არ სჯეროდა, რომ ეს პროექტი გაამართლებდა, რამდენიმე საგრანტო პროგრამაშიც მივიღეთ მონაწილეობა, თუმცა უშედეგოდ, მაგრამ ჩვენ იმდენად ბევრ დადებით რაღაცას ვხედავდით ამ საქმეში, რომ ვარჩიეთ მაინც გაგვერისკა და ჩვენი დრო, ენერგია და ფული ამ საქმისთვის მოგვეხმარა“.

საიტი, უპირველეს ყოვლისა, საშუალებას მოგცემთ გამოემშვიდობოთ წარსულსა და ისეთ ნივთებს, რომლებიც აღარ გჭირდებათ და  ტყუილად იკავებს ადგილს არა მარტო თქვენს საცხოვრებელში, არამედ თქვენს გონებაშიც კი.  ამავე დროს, სასიამოვნოა, როცა შესაძლებელია ამ მარტივი ქცევით სხვას ბედნიერება მიანიჭო, მაგრამ მხოლოდ ეს როდია, მეგობრების იდეას გაცილებით უფრო დიდი პრობლემაც დაედო საფუძვლად.

გლობალურად, რომ შევხედოთ მსოფლიოში, 7 მილიარდი ადამიანი ცხოვრობს და ეს რაოდენობა კატასტროფულად იზრდება. შესაბამისად, ამდენი წარმოება და ჭარბი მოხმარება, ძალიან დიდ ზიანს აყენებს ჩვენს პლანეტას. ,,ვცდებით თუ გვგონია, რომ თუ, მაგალითად, ამაზონის ტყე იჩეხება, ეს ჩვენთვის ზიანის მომტანი არ არის, ვცდებით, რადგან დედამიწაზე ყველაფერი ურთიეთდაკავშირებულია და ჟანგბადის 20% სწორედ ტროპიკული ტყეებიდან მოდის. ჩვენ მიერ გადაგდებული ნაგვით კი ოკეანეები იწამლება. პროდუქციის ჭარბად მოხმარების შედეგად ათასობით ტონა ქიმიკატი ჩაედინება მდინარეებში. ვფიქრობ, რომ ჩვენი, როგორც კაცობრიობის, ვალია უფრო გააზრებულად ვიცხოვროთ. უფრო გააზრებულად ცხოვრება კი,  ნიშნავს რესურსების ეფექტურად გამოყენებასა და უაზრო მომხმარებლობის სინდრომისგან თავის დაღწევას. ამასთან ერთად, ეს მოტივაციას გვაძლევს დავფიქრდეთ, როცა რამეს ვყიდულობთ, მართლა გვჭირდება ეს ნივთი თუ ლამაზი რეკლამით ვართ გაბრუებული ან უბრალოდ მოგვწონს,“ -აღნიშნავს გიორგი.

აღსანიშნავია, რომ საიტს უცხოერი ანალოგი არ აქვს, მეგობრებმა მოიძიეს ინფორმაცია მსგავსი პლატფორმების შესახებ, რომლებიც რამდენამდე მიახლოებული არიან ,,Fulwish.com-თან“, თუმცა საბოლოო ჯამში ვერცერთმა მათგანმა ვერ დააკმაყოფილა მათი მოთხოვნები, მათ სურდათ, რომ ვებგვერდი მაქსიმალურად მარტივი და გასაგები ყოფილიყო, ზედმეტი ინფორმაციისა და ვიზუალური დატვირთვის გარეშე, რასაც მიაღწიეს კიდევაც. სამომავლოდ პლატფორმა კიდევ უფრო დაიხვეწება და მეგობრებს იმედი აქვთ, რომ რაც შეიძლება მეტი ადამიანი შემოუერთდება მათ სახალისო და ძალიან პრაქტიკულ ინიციატივას.

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

ინოვაციებისა და ტექნოლოგიების სააგენტოს, განათლებისა და მეცნიერების სამინისტროსა და ორგანიზაცია ,,EuHack-ის” ორგანიზებით აპრილში ,,პროფესიული განათლების ჰაკათონი“ ჩატარადა, რომელშიც ორი მეგობრის საინტერესო და სახალისო პროექტმა ,,ჭკვიანმა დაფამ“ გაიმარჯვა. პროექტის შესახებ იდეის ერთ–ერთი ავტორს – არჩილ გობეჯიშვილს გავესაუბრეთ.

,,ჭკვიანი დაფის“ იდეა არჩილ გობეჯიშვილსა და დავით კუჭუხიძეს ეკუთვნით. არჩილი 25 წლისაა და ამჟამად საფეხბურთო კლუბ ,,სიმბას“ მწვრთნელი და მენეჯერია, მან გასულ წელს ჩააბარა კოლეჯში ,,სპექტრი“, რათა მისთვის კიდევ ერთი საინტერესო სფერო – ხის დამუშავება შეესწავლა, ნახევარ წელიწადში კი უკვე შეძლო ნამუშევრები საქართველოს ეროვნულ ბიბლიოთეკაში,  ფართო საზოგადოებისთვის წარედგინა. კოლეჯმა, როგორც თავად აღნიშნა, დიდი პროფესიული განათლებასთან ერთად საკმაოდ საინტერესო ნაცნობობაც შესძინა, დავით კუჭუხიძემაც სწორედ ერთ-ერთი გადაცემიდან გაიცნო და დაუკავშირდა მას.  დავითი 35 წლისაა და პროფესიით 3Dსპეციალისტია, ასევე აქვს პატარა ლაბორატორია – ,,Artisan-ი”, სადაც ხის ულამაზეს ნივთებს – სათამაშოებს, სანათებსა და სუვენირებს ქმნის.

კოლეჯში სწავლის ბოლო პერიოდში არჩილმა გადაწყვიტა საქართველოს ინოვაციებისა და ტექნოლოგიების სააგენტოს მიერ ორგანიზებულ პირველ პოფესიულ ჰაკათონში დავითთან ერთად მიეღო მონაწილეობა. ჰაკათონის პირველ ტურში გუნდმა ჟიურის დავითის მიერ შექმნილი 3Dგამოსახულებით გააცნო ,,ჭკვიანი დაფის“ იდეა და ფინალურ ეტაპზეც დამსახურებულად გადავიდა. შემდეგ, ილიაუნის ფაბლაბის დახმარებით, 24 დღის განმავლობაში შექმნეს პირველი პროტოტიპი, რომელმაც ხალხის დიდი მოწონება დაიმსახურა და პირველი ადგილის მფლობელიც გახდა.

,,ჭკვიანი დაფა“ არის ერთგვარი სახალისო დაფა, რომელზეც პაზლის პრინციპით ეწყობა ხის სხვადასხვა ნატურალური ჯიშისგან დამზადებული საქართველოს გაერთიანებული რუკა, რუკა ჯამში 68 დეტალისგან შედგება და თითოეულ დეტალს აქვს საქართველოს კონკრეტული რაიონის  ფორმა. ხოლო, რელიეფური ფორმები მაქსიმალურად მიმსგავსებულია საქართველოს ფიზიკურ ლანდშაფტს. 68-ვე დეტალში ჩამონტაჟებულია მინიატურული მაგნიტი რაც საშუალებას გვაძლევს რუკა ავაწყოთ, როგორც ჰორიზონტალურ, ასევე ვერტიკალურ მდგომარეობაში.

დაფის შექმნის იდეა კი მეგობრებს ჩვენივე რეალობაში არსებული პრობლემიდან  გამომდინარე გაუჩნდათ, არჩილმა აღნიშნა – ,,მიუხედავად იმისა, რომ საქართველო ძალიან პატარა ქვეყანაა, სამწუხაროდ ბევრი ქართველი ყველა მხარეში არ არის ნამყოფი და საუბედუროდ ბევრმა ქართველმა საქართველოს კუთხეების ადგილმდებარეობაც არ იცის! რა თქმა უნდა, ყველას აქვს შესაძლებლობა დაინტერესების შემთხვევაში მოიძიოს და მიიღოს საჭირო ინფორმაცია, თუმცა, ჩვენი მხიარული დაფა პროცესს ბევრად უფრო მიმზიდველსა და ეფექტურს ხდის“.

მხიარულ დაფას გააჩნია სპეციალურ მობილური ვებგვერდის დემოვერსია, რომელშიც მოთავსებულია ინფორმაცია საქართველოს რეგიონებზე, მათი ისტორია, გეოგრაფია, ფლორა და ფაუნა, სოფლის მეურნეობა,  ტურისტული მარშრუტები, კულტურული მემკვიდრეობა, არქეოლოგიური ძეგლები და ა.შ. ვებგვერდის მობილური ვერსია ბლუთუზის საშუალებით უკავშირდება დაფაზე დამონტაჟებულ დინამიკს, რომელიც ხმოვან რეჟიმში გვაწვდის ჩვენ მიერ მოთხოვნილ ინფორმაციას.

ამ ეტაპზე პროტოტიპის დასახვეწად და საჭირო დანადგარების შესაძენად გუნდი დამატებითი გრანტებისა და დაფინანსების მოპოვებას ცდილობს, ამის შემდეგ კი, უკვე შესაძლებელი გახდება დაფის რეალიზება და ბაზარზე გატანა. აღსანიშნავია, რომ მეგობრები სამი ტიპის დაფის წარმოებას აპირებენ – შედარებით დაბალფასიანი დაფა განკუთვნილი იქნება ოჯახებისთვის, საშუალო ფასიანი და ძვირფასი კი სასწავლო დაწესებულებებისა თუ ტურისტული ცენტრებისთვის.

სამომავლოდ მეგობრები მხიარული დაფისვე პრინციპით აპირებენ მსოფლიოს კონტინენტების რუკების შექმნას და ასევე, დაფის მეშვეობით ეცდებიან იგავების და ზღაპრების პერსონაჟებიც გააცოცხლონ, არჩილმა აღნიშნა, რომ ,,დაფა ხმოვან რეჟიმში მოყვება პროფესიონალი მსახიობების მიერ გახმოვანებულ ზღაპარს და ბავშვებს საშუალება ექნებათ  საკუთარი ხელით ათამაშონ ნატურალური და ეკოლოგიურად სუფთა ხის მასალისგან დამზადებული ზღაპრის პერსონაჟები. ამასთანავე, სპეციალურად დაფისთვის დაიწერება ახალი ზღაპრები და შეიქმნება ახალი პერსონაჟები“

მასალა მოამზადა:  თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

პროფესიული განათლებისადმი დამოკიდებულება ბოლო დროს რადიკალურად შეიცვალა. აღნიშნული სექტორის განვითარებისთვის განათლების სამინისტრომ არაერთი პროექტი განახორციელა, ერთ-ერთია „პროფესიული განათლების ჰაკათონი“, რომელშიც მონაწილეობდნენ პროფესიული სასწავლებლის სტუდენტები, მათ ინოვაციური და მაღალტექნოლოგიური პროდუქტები წარმოადგინეს. პროექტის ფარგლებში სტუდენტები იყენებდნენ სამრეწველო ინოვაციების ლაბორატორიაში არსებულ დანადგარებს (ლაზერული მჭრელი, 3D პრინტერი, პროგრამირებადი ჩარხი და ა.შ.). პროექტს ერთობლივად ახორციელებდნენ საქართველოს ინოვაციებისა და ტექნოლოგიების სააგენტო, განათლებისა და მეცნიერების სამინისტრო, აგრეთვე, ორგანიზაცია „EUHack-ი”.

აგრარული მიმართულებით პირველი ადგილი დაიკავა კოლეჯ „ბლექსის“ გუნდმა „Healthy“, რომლის წევრები არიან მცენარეთა დაცვის ტექნიკოსის სპეციალობის სტუდენტები: მარიამ ცეცხლაძე, რუსუდან მელაძე, თინა სალუქვაძე და როლანდ ღოღობერიძე, ხოლო მათი მენტორია – ვლადა ხიმენკო.

გუნდმა წარმოადგინა პროექტი „ეკო-სამზარეულო“, რომელიც საზოგადოებას შესაძლებლობას მისცემს, დათესოს და სახლში მოიყვანოს სხვადასხვა პროდუქტი.  რაც ყველაზე მნიშვნელოვანია, მოსავალი იქნება შხამ-ქიმიკატებისგან სუფთა.

„მინისათბური სამზარეულოსთვის, ვფიქრობთ, ინოვაციური და ძალიან საჭიროა. ჩვენ ვიყენებთ ადგილობრივ მცენარეებსა და თესლებს, რითიც ვინარჩუნებთ თესლების გენოფონდს. მოგეხსენებათ, დღევანდელ პირობებში განსაკუთრებულად ფასობს ჯანსაღი, არაგენმოდიფიცირებული და ეკოლოგიურად სუფთა პროდუქტი.  ჩვენ საზოგადოებას შევთავაზებთ ლამაზ ფორმატში დამზადებულ კონსტრუქციას (ვგეგმავთ, კონსტრუქციები გავაფორმოთ ქართული ტრადიციული ორნამენტებით, ამით ჩვენ ვიტყვით, რომ ეს პროდუქტი დამზადებულია საქართველოში) თავისი განათებით, ინსტრუქციით, თესლებითა და მორწყვის სისტემით. ფასი კომპლექტაციისა და ზომების მიხედვით 35-300 ლარამდე განისაზღვრება. მორწყვა შესაძლებელი იქნება დისტანციურადაც, ამისთვის კი გამოვიყენებთ GSM მოდულს“ – აღნიშნავს გუნდის მენტორი – ვლადა ხიმენკო.

აღსანიშნავია, რომ მომხმარებელი მორწყვის სისტემის ჩართვას მობილურში ჩატვირთული სპეციალური აპლიკაციის საშუალებით შეძლებს. საწყის ეტაპზე გუნდი გეგმავს შემდეგი მცენარეების კულტივირებას: ქინძი, მაკიდო, კამა, პიტნა და მარწყვი.

„მე, როგორც აგრარული მიმართულების სტუდენტს, ყოველთვის მქონდა პრეტენზია ჯანსაღ და ეკოლოგიურად სუფთა პროდუქტზე.  მათ, ვისაც არ აქვთ მიწის ნაკვეთი და, შესაბამისად, ვერ იღებს ნატურალურ პროდუქტს, ჩვენ ვაძლევთ საშუალებას, მოუარონ მინისათბურს,“ – აღნიშნავს მარიამ ცეცხლაძე.

სტუდენტებს სურთ, რომ ახლო მომავალში გახდნენ ინოვაციებისა და ტექნოლოგიების სააგენტოს პროგრამის მონაწილეები, რათა პროექტის გასავითარებლად დაფინანსება მოიპოვონ.

მასალა მოამზადა:  ნინი მშვენიერიძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”