გამოგონება - ინოვაცია

ილიას სახელმწიფო უნივერსიტეტში 11-12 მარტს ჩატარდა ,,Weekend Accelerator-ი“, სადაც ახალგაზრდებმა შეზღუდულ დროში მოახდინეს ინოვაციური ბიზნეს იდეების გენერირება და პრეზენტაცია. პროექტის გამარჯვებული გუნდი გახდა, Signoutსტარტაპი, რომელიც ქმნის ინოვაციურ დასაქმების პლატფორმას. ,,დოქტრინა“ გაესაუბრა იდეის ერთ-ერთ ავტორს – დავით  რუტკაუსკასს, რომელმაც ისაუბრა მათი წამოწყებისა და სამომავლო გეგმების შესახებ.

პროექტ ,,SignOut-ის” იდეის ავტორები გახლავთ დავით რუტკაუსკასი და ნინი ზენაიშვილი, ორივე მათგანი ილიას სახელმწიფო უნივერსიტეტის მეოთხე კურსის სტუდენტია. ნინი ამჟამად მუშაობს პროექტზე ,,Sadari”, რომელიც გახლავთ საძიებო-სანავიგაციო მობილური აპლიკაცია და პარალელურად Anti Gaming Studio-შიც ახორციელებს კომპიუტერულ თამაშს. მათი  გუნდი Signout-ის სახელით უკვე რამდნეიმე მეიქათონსა და სტარტაპკვირეულზე გამოვიდა, ამჟამად კი, მუშაობს საკმაოდ თემატურ და აქტუალურ პრობლემაზე, რომელიც სტუდენტების დასაქმებას ეხება და არა მარტო სტუდენტების.

პროექტი ,,SingOut-ი” ერთ-ერთი მეიქათონის დროს ჩამოყალიბდა  და მასზე მუშაობა ჯერაც არ დამთავრებულა და ჩამოყალიბების ეტაპზეა.  როგორც უკვე აღვნიშნეთ, პროექტი განსაკუთრებით სტუდენტების დასაქმებას ეხება, რაზეც დავითმა ,,დოქტრინასთან“ ინტერვიუშიც ისაუბრა ,,უპირველეს ყოვლისა, პროექტი აერთიანებს სამ სხვადასხვა იდეას, რომლებიც ჩვენი, როგორც სტუდენტების, ყოველდღიური პრობლემებიდან წამოვიდა. მთავარი პრობლება არის ზუსტად ის, რომ სტუდენტები ხშირად ვერ ახერხებენ სამუშაო და სასწავლო დროის ერთმანეთთან შეთავსებას, რის გამოც უწევთ ან ლექციების გაცდენა, ან სამუშაოზე უარის თქმა, ამიტომაც გვინდა შევქმნათ პლატფორმა, სადაც განთავსდება განცხადებები დროებითი სამუშაოების შესახებ, ეს იქნება პლატფორმა, მსგავსი ფრილანსერისა სადაც  მსურველს შესაძლებლობა ექნება იხილოს ყველა სახის რეალური ვაკანსია, რომელიც შესაძლოა ეხებოდეს სულაც ძაღლის გასეირნებას ან ნებისმიერი სახის დახმარებას, რომლისთვისაც  დამქირავებლები მზად არიან თანხა გადაიხადონ“.

როგორც ჩანს, პლატფორმას საქართველოში ჯერჯერობით ანალოგი არ ჰყავს და შესაბამისად, საკმაოდ აქტუალურიცაა, ჩვენი რეალობიდან გამომდინარე, დროთა განმავლობაში შეიქმნება ლოგოც და მომხმარებელს უკვე შეეძლება პლატფორმით სარგებლობა. ამის შემდეგ კი, გუნდი კიდევ უფრო მეტი იდეით აპირებს კარიერული მოღვაწობის გაგრძელებას.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

,,დოქტრინა“ ქართველი ახალგაზრდების კიდევ ერთ წამოწყებაზე გთავაზობთ ინფორმაციას, ეს არის ორი გოგონას მიერ შექმნილი სამოსისა და ჩანთების ხაზი, რომელიც მომხმარებელს სრულიად განსხვავებული მასალის გამოყენებით შექმნილ პროდუქტს სთავაზობს. წამოწყება სულ რამდენიმე თვეა რაც არსებობს, თუმცა უკვე საკმაოდ პოპულარულია და ნელ-ნელა იმკვიდრებს თავს  ,,J&Sister-ის” სახელით.

,,J&Sister-ის” ხაზი დებს – ჯული და ელენე ცერცვაძეებს, ეკუთვნის. ელენე 22-ის, ხოლო  ჯული – 25  წლისაა, ორივე მათგანი საქართველოს ტექნიკური უნივერსიტეტის საინჟინრო ფაკულტეტის სტუდენტია და დიზაინერულ საქმიანობასთან ერთად, პარალელურად, საკუთარი პროფესიითაც მუშაობს.

როგორც თავად ამბობენ, გოგონები ჩანთების, ტანსაცმლის და აქსესუარების დიზაინს  ჯერ კიდევ სკოლის ასაკიდან ქმნიდნენ. მოგვიანებით კი, მას შემდეგ, რაც ელენემ ლაზერულ მჭრელთან მუშაობა და სხვადასხვა მასალის დამუშავება ისწავლა, თანდათან გაჩნდა სახლის დეკორის იდეაც, რომელიც ძირითადად ბავშვებისთვის განკუთვნილი პროდუქტის შექმნას გულისხმობდა, იქნებოდა ეს ხის თაროები, გასართობი დაფები თუ სხვა. დაახლოებით სამი თვის წინ კი, გოგონებს გაუჩნდათ იდეა, რომ ის მასალა, რომელსაც ელენე იყენებდა, აქსესუარების და დეტალების სახით გამოეყენებინათ ჩანთებსა და ტანისამოსშიც.

იდეის გაჩენის შემდეგ, სატესტოდ შეიკერა ზურგჩანთა, რომელსაც გოგონებმა სამკუთხედის ფორმის გამჭირვალე ორგანული მინა ჩააკერეს. როგორც ,,დოქტრინასთან“ საუბარში მათ აღნიშნეს, ორგანული მინა საკმაოდ მოსახერხებელია და ჩვეულებრივი მინის მსგავსად არ არის ადვილად მსხვრევადი, ვინაიდან მის შემადგენლობაში შედის პლასტმასი და როგორც პრაქტიკიდან ჩანს საკმაოდ კომფორტულიცაა ყოველდღიური გამოყენებისთვისაც. რაც მთავარია, ორგანული მინა, ისევე როგორც ხის დეტალები, განსხვავებულს ხდის აქსესუარებს და მოლოდინისამებრ, გამჭვირვალე დეტალმა თავისებური ეფექტი მოახდინა. საბოლოოდ კი,  ჩანთას დიდი გამოხმაურება მოჰყვა საზოგადოების მხრიდან და პირველივე დღეს გაიყიდა, რამაც გოგონებს სტიმული მისცა, რომ ამ ყველაფრისთვის ბიზნესის სახე მიეცათ და უფრო აქტიურად დაეწყოთ ახალ ჩანთებზე მუშაობა.

იმის გათვალისწინებით, რომ ჯერ მხოლოდ 2 თვეა, რაც ახალგაზრდებმა საქმიანობა დაიწყეს, არ ჰქონიათ სერიოზული წარდგენა საზოგადოების წინაშე, თუნდაც სტარტაპის სახით. თუმცა, რამდენჯერმე მიიღეს მონაწილეობა საქველოქმედო „ბაზრობებზე“. ამრიგად, როგორც თავად აღნიშნავენ, გზა იდეიდან პროდუქტამდე არ ყოფილა რთული და გრძელი, რადგან  ყველანაირი რესურსი გააჩნდათ საკუთარი მიზნების განსახორციელებლად და დიდი მონდომებით ძალიან მალე შეძლეს სახასიათო პროდუქტის შექმნაც.

სამომავლო გეგმებს რაც შეეხება, ახალგაზრდა დიზაინერებს  საკმაოდ ბევრი იდეა აქვთ ჩანთების, აქსესუარების და სახლის დეკორის მიმართულებით. მაგალითად გეგმავენ, რომ პროდუქციას შემატონ მამაკაცის ზურგჩანთები და ხელჩანთები, ოღონდ ამჯერად უკვე ხის დეტალებით.

ელენეს და ჯულის ჯერჯერობით მაღაზია და სახელოსნო არ აქვთ და პროდუქციას სოციალური ქსელის მეშვეობით ყიდიან, თუმცა, უახლოეს მომავალში გეგმავენ სახელოსნოს გახსნას, სადაც მომხმარებელი პროდუქციის დათვალიერებასა და შეძენასაც შეძლებს. აღსანიშნავია ისიც, რომ  ,,J&Sister-ის” პროდუქცია შეკვეთებზეც მუშაობს და ყველა მსურველს აქვს საშუალება ატაროს საკუთარი დიზაინით შექმნილი აქსესუარი თუ სამოსი.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 ,,მეცნიერი მე“ არის  კიდევ ერთი ახალი პროექტი, რომლის მიზანია, შექმნას სახლში მარტივად ჩასატარებელი სამეცნიერო ექსპერიმენტები ქართველი ბავშვებისთვისა და ტინეიჯერებისთვის. მასში შემავალი დაბალბიუჯეტიანი ექსპერიმენტები მიზნად ისახავს მოზარდების ცოდნის გაღრმავებას ისეთ სფეროებში, როგორიცაა – ასტრონომია, გეოლოგია, მეტეოროლოგია, კომპიუტერული მეცნიერებები, ფიზიკა, მათემატიკა და ინჟინერია. ,,დოქტრინა“ დაინტერესდა პროექტით და გაესაუბრა თაკო ბასიაშვილს.

თაკო ბასიაშვილი ჯერ მხოლოდ 19 წლისაა და სან დიეგოს სახელმწიფო უნივერსისტეტის ბიოქიმიის ფაკულტეტის მეორე კურსის სტუდენტია, თუმცა უკვე მოასწრო საკმაოდ საპასუხისმგებლო და საინტერესო პროექტის განხორციელებაში მიეღო მონაწილეობა. ეს არის პროექტი – „მეცნიერი მე“, რომლის იდეაც გაჩნდა არასამთავრობო ორგანიზაცია  -„JumpStart Georgia-ში“, სადაც ის პირველი კურსის დასასრულს მივიდა ამ პროექტზე სამუშაოდ. პროექტი უშუალოდ ამერიკის საელჩოს მხარდაჭერით ორგანიზაცია „JumpStart Georgia-ში“ განხორციელდა.

პროექტი ,,მეცნიერი მე“ (mecnieri.me) 12-წლამდე ბავშვებისთვის შექმნილი შემეცნებითი ონლაინპლატფორმაა, სადაც განთავსდა საინტერესო და რაც მთავარია, მარტივი ექსპერიმენტები. ამ ექსპერიმენტების მთავარი ხიბლი კი ისაა, რომ თითოეული მათგანის გაკეთება შესაძლებელია სახლში მარტივად მოსაპოვებელი ნივთებით.  ,,საიტზე თავმოყრილია ისეთი ექსპერიმენტები, რომელიც სახალისოა და პარალელურად ძალიან საინტერესოც, როგორც პატარებისთვის, ასევე ზრდასრულებისთვისაც. მაგალითად, ჩვენ ვასწავლით ბავშვებს, თუ როგორ შეუძლიათ გაბერონ გიგანტური საპნის ბუშტები სახლის პირობებში, ან თუნდაც სხვადასხვა ტიპის მფრინავის დიზაინს, რომლის კეთების დროსაც ისინი გართობასთან ერთად, საკმაოდ ბევრს სწავლობენ აეროდინამიკის შესახებ,“ – აღნიშნა თაკომ.

პროექტის იდეის უკეთ გასაგებად ავიღოთ რამდენიმე მარტივი ექსპერიმენტი, ერთ-ერთი მათგანია „უჩინარი მელანი“. ამ ექსპერიმენტისთვის საჭიროა მხოლოდ ფურცელი და ლიმონის წვენი. თუ ბავშვი ლიმონის წვენით ფურცელზე დაწერს რაიმე სიტყვას და გააშრობს მას, ფურცელზე არაფერი გამოჩნდება, თუმცა ფურცელის შეთბობის შემთხვევაში  გარკვევით გამოისახება დაწერილი სიტყვა. თვითონ პროცესი კი, არა მარტო სახალისო, არამედ შემეცნებითიცაა, რადგან ბავშვებს საიტზევე შეუძლიათ ნახონ ამ პროცესის ახსნა და გაიგონ მეტი თუ რატომ მიმდინარეობს ეს პროცესი, საიტი აწვდის მათ შესაბამის ინფორმაციას, ამრიგად მათთვის ცნობილი ხდება, რომ ლიმონის წვენი, ისევე, როგორც სხვა ხილის წვენი, შეიცავს ნახშირბადის ნაერთებს. ეს ნივთიერებები ოთახის ტემპერატურაზე უჩინარები არიან, მაგრამ სითბოს შეუძლია დაშალოს ისინი და გაათავისუფლოს ნახშირბადი. თუ ნახშირბადი ჰაერს შეხვდება, იწყება დაჟანგვის პროცესი და ნივთიერება გადაიქცევა ღია ან მუქ ყავისფრად, რაც განაპირობებს ზუსტად ამ ექსპერიმენტის შედეგსაც.

შემდეგი მარტივი ექსპერიმენტია ,,გიგანტური საპნის ბუშტები“, ალბათ ყველა ბავშვს უოცნებია დიდი ზომის საპნის ბუშტებზე,  რაც სინამდვილეში არც ისეთი რთულია, როგორიც ჩანს.  ამისთვის საჭიროა, ერთ ჭიქა წყალს შევურიოთ ორი სუფრის კოვზი ჭურჭლის სარეცხი სითხე, ერთი სუფრის კოვზი გლიცერინი (შესაძლებელია აფთიაქში შეძენა) და ერთი ჩაის კოვზი შაქარი, მათი ნარევი 1 სთ-ის განმავლობაში უნდა შევინახოთ დახურულ კონტეინერში, რის შემდეგაც, ნაზად უნდა მოვურიოთ და დრეკადი მეტალის ჯოხებით შევუდგეთ გიგანტური ბუშტების შექმნას.

პროექტი „მეცნიერი მე“ ხელს უწყობს ბავშვების ინტერესის გაღვივებას სამეცნიერო სფეროების მიმართ და აძლევს მათ საშუალებას სხვა თვალით შეხედონ მათ გარშემო მიმდინარე პროცესებს. პროექტის პრეზენტაცია უკვე შედგა თბილისში, ქუთაისში, გორსა და ხარაგაულში, სამომავლოდ შეიძლება პროექტმა ბანაკის სახეც მიიღოს და სხვადასხვა ასაკობრივი კატეგორიაც დაემატოს, თუმცა, როგორც თაკომ აღნიშნა, ეს ბევრ ფაქტორზეა დამოკიდებული, ფაქტი ერთია -პროექტი საკმაოდ მნიშვნელოვანია ქართველი ახალგაზრდებისთვის შემეცნების დონის ამაღლებისთვის, ,,მეცნიერებასთან და ტექნოლოგიებთან ადრეული ასაკიდანვე ურთიერთობა ხელს შეუწყობს ჩვენს ქვეყანაში ამ სფეროების მიმართ გარკვეული სტერეოტიპების დარღვევას და ტექნოლოგიურ-სამეცნიერო სფეროების მომავალი განვითარების და წარმატების საწინდარიც იქნება,“-აღნიშნა თაკომ დასასრულს.

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

27 თებერვალს გამოვლინდა ათასწლეულის ინოვაციის კონკურსის (Millennium Innovations Award – MIA) გამარჯვებული გუნდი – ,,Smart Kids-ი”, რომლის წევრები არიან: ალექსი ტყებუჩავა, ნათია შამათავა, დეა ჩიტაია, ლიკა კოკაია და გვანცა ჩიქოვანი. ახალგაზრდები წმ. ალექსი შუშანიას სახელობის სენაკის მართლმადიდებლური სკოლა-გიმნაზიის მოსწავლეები არიან. კონკურსის მიზანია საბუნებისმეტყველო მეცნიერებებისა და ტექნოლოგიების სფეროში ახალგაზრდების წახალისება, რაც, უპირველეს ყოვლისა, ხელს შეუწყობს აღნიშნული სფეროების განვითარებას ქვეყანაში. გუნდი აპრილში აშშ-ის ნასას კოსმოსურ ცენტრში გაემგზავრება. პროექტს ახორციელებს ,,ათასწლეულის გამოწვევის ფონდი – საქართველო”, განათლებისა და მეცნიერების სამინისტროს, აშშ-ის საელჩოსა და კომპანია ,,ჯეოსელის” მხარდაჭერით. ,,დოქტრინა” გაესაუბრა ჯგუფის წევრებსა და მათს მენტორ უტა კილასონიას. მათ დეტალურად ისაუბრეს გამოგონებაზე, რომელიც გააკონტროლებს მეწყერსაშიშ ზონებს, რათა თავიდან ავირიდოთ ადამიანთა მსხვერპლი და მინიმუმამდე დავიყვანოთ მოსალოდნელი ეკონომიკური ზარალი.

,,ჩვენი პროექტის, ,,გეოლოგიური საფრთხეების”, მიზანია, წინასწარ განვსაზღვროთ მეწყერის მოახლოების საშიშროება. ეს ხელსაწყო არის შეტყობინების სისტემა. გამოყენებული გვაქვს ჰოლის სენსორი, რომელიც გვიჩვენებს მაგნიტური ველის ინტენსივობის ცვლილებას. ჩვენს პროექტს ბევრი უპირატესობა აქვს: იაფია, ერგება ყველანაირ რელიეფს, გამოირჩევა სიზუსტით, საიმედოობით, ყველაზე მნიშვნელოვანი კი ისაა, რომ მისი დამზადება, წარმოება და დანერგვა შესაძლებელია საქართველოში. გრუნტის ზედაპირზე, მცირე ზომის თხრილში, თავსდება მაგნიტები, მათ ზემოთ რამდენიმე მილიმეტრის დაშორებით – ჰოლის სენსორები, რომელიც დაკავშირებულია მიკრო პროცესორთან და GSMსისტემის საშუალებით ინფორმაციას გადასცემს ცენტრალურ სერვერს. პლანშეტებში ჩატვირთულია აპლიკაცია, რომელიც საშუალებას გვაძლევს დავარეგულიროთ ზღვარი. როდესაც მიწაში რხევები გადააჭარბებს ჩვენს დაყენებულ ზღვარს, ხელსაწყო ავტომატურად აგზავნის შეტყობინებებს დარეგისტრირებულ მოსახლეობასთან მობილურ ტელეფონებზე. აღსანიშნავია, რომ სენსორულ აპარატს ანალოგი არ აქვს მსოფლიოს მასშტაბით. ეს იდეა გაგვიჩნდა 2016 წლის ფაქტიდან გამომდინარე, აგვისტოში მოვარდნილმა წყალდიდობამ და ღვარცოფმა დიდი ზარალი მიაყენა სენაკს, კერძოდ, ჩაინგრა ჩვენი სკოლა-გიმნაზიის მისასვლელი საავტომობილო გზა და ხიდი,” – აღნიშნეს ახალგაზრდებმა.

,,შევისწავლეთ დღეს არსებული ხელსაწყოები, რომელთათვისაც მილიონობით ლარია საჭირო. ჩვენი მოწყობილობა, ვფიქრობთ, ხარჯეფექტიანია სახელმწიფოსთვის, ჯდება დაახლოებით 10 000 ლარი, თანაც არის უფრო ზუსტი, ვიდრე არსებული. ჩვენი იდეების გაანალიზებაში, მოდელირებასა და კონსტრუირებაში დაგვეხმარა დავით სონღულაშვილის ვირტუალური ლაბორატორია და საგანმანათლებლო სისტემაზე დაფუძნებული STEM (Science, Technology, Engineering, Mathematics) კურსები, რომელიც ერთი წლის წინ გავიარეთ,” – აღნიშნა გუნდის მენტორმა, უტა კილასონიამ.

იგეგმება მოწყობილობის დამონტაჟება ნოქალაქევის არექეოლოგიური მუზეუმ-ნაკრძალის ტერიტორიაზე.

აღსანიშნავია, რომ სენაკელი ახალგაზრდების შექმნილ სენსორულ მოწყობილობას  უკვე დიდი გამოხმაურება და დადებითი შეფასებები მოჰყვა მეცნიერთა საზოგადოებისგან. წინ კი ჰიუსტონია, NASA, სადაც მოსწავლეები კოსმოსური ცენტრის უნივერსიტეტის საგანმანათლებლო პროგრამას გაივლიან.

მასალა მოამზადა: ნინი მშვენიერიძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 რამდენიმე სტუდენტისგან შექმნილი გუნდი ერთი იდეის გარშემო გაერთიანდა და ხის ჭკვიანი ბეჭედი შექმნა, რომელიც გაამარტივებს ადამიანების ცხოვრებას და უფრო უსაფრთხოს გახდის მას.

ნინო გვაზავა: „იდეა გაჩნდა ჩვენი უნივერსიტეტის საშვების სისტების დაყენების შემდეგ, გვინდოდა, რამე ისეთი მოგვეფიქრებინა, რაც ბარათის მოძებნის ნაცვლად, გაგვატარებდა უნივერსიტეტის შესასვლელში. ასე შეიქმნა პირველი ბეჭედი, რომელსაც, თავდაპირველად, მხოლოდ უნივერსიტეტის საშვის ფუნქცია ჰქონდა“.

სტარტაპი ინტერესის გამო ადნობდა სხვადასხვა ბარათს და მათში არსებული RFID თაგს 3D პრინტერით ამობეჭდილ 3ბეჭედში ათავსებდა, შემდეგ ამ ბეჭდით ახორციელებდნენ სხვადასხვა გადახდას მაღაზებში. საზოგადეობის დიდი ინტერესისა და აღფრთოვანების გამო მათ დაიწყეს პროექტზე სერიოზულად მუშაობა.

რა მასალისგან მზადდება ბეჭედი ?

,,კნიკი” ჭკვიანი სამკაულია, რომელიც ეკოლოგიურად სუფთა ხის მასალისაგან მზადდება და მომხმარებელს შესაძლებლობა ეძლევა თავად შეარჩიოს საკუთარი ბეჭდის დიზაინი, დაიტანოს ნებისმიერი წარწერა და აირჩიოს სასურველი ფერების განაწილება. გარდა ამისა, ერთადერთი სამკაულია, რომელიც ანაცვლებს მომხმარებლის საფულესა და, ამავდროულად, ზრუნავს მომხმარებლის სიცოცხლის გადარჩენაზე.

რა ფუნქციების მატარებელია მოწყობილობა?

#CNICK (კნიკი) არის ხის პირველი ჭკვიანი ბეჭედი, რომელიც მომხმარებელს შესაძლებლობას აძლევს, ხელის ერთი მოძრაობით შევიდეს სამსახურში, სპორტდარბაზში, კინოში, გასართობ ცენტრებში, რადგან მას ყველა საშვი, ბილეთი თუ აბონემენტი საკუთარ ბეჭედში ექნება გაერთიანებული. ,,კნიკი” ამავდროულად, ინახავს პირველად სამედიცინო ინფორმაციას (სისხლის ჯგუფის, გადატანილი დაავადებების, ალერგიულობას…), ეს განსაკუთრებით მნიშვნელოვანი გახლავთ, რადგან ამ ფუნციის საშუალებით, ,,კნიკს” მომხმარებლის სიცოცხლის გადარჩენაც კი შეუძლია.

ნინო გვაზავა: “#სტარტაპსაქართველოს კონკურსში გამარჯვების შემდეგ, საქართველოს ინოვაციებისა და ტექნოლოგიების სააგენტომ იდეის განხორციელებისთვის ხელშემწყობი პირობები შეგვიქმნა. უპირველეს ყოვლისა, გადმოგვცა დაფინანსება და დაგვაკავშირა ამერიკელ ექსპერტებთან, რომლებიც   კონკურსის შემდგომი 3 თვის განმავლობაში მეთვალყურეობას გაუწიეს ჩვენს პროექტს. ამ პერიოდის განმავლობაში ჩვენი პროექტი იღებდა ბიზნესის განხორციელებისა და სწრაფი ზრდისთვის ხელშემწყობ სხვადასხვა რჩევებს, Silicon Valley-ს ვენჩორული კაპიტალისტების გამოცდილებასა და მითითებებს. ტექნოპარკის  ფაბლაბში გავიარეთ სხვადასხვა კონსულტაციები და გამოვიყენეთ იქ არსებული ლაზერული მჭრელი,  ეს ძალიან კარგი შესაძლებლობაა ჩვენთვის, განვავითაროთ ჩვენი პროდუქტი ადგილობრივ ბაზარზე და შემდგომ ეტაპზე მოვახდინოთ მისი საერთაშორისო რეალიზაცია.”

სტარტაპმა ,,Cnick-ი” – მონაწილეობა მიიღო 2016 წლის Seed Forum-ში, რომელიც 14 დეკემბერს ნორვეგიის საგარეო საქმეთა სამინისტროს მხარდაჭერით აიჰაბ თბილისში ჩატარდა. პროექტის ფარგლებში კნიკის დამფუძნებლებს საშუალება ექნებათ მაისის თვეში ოსლოში, ნორვეგიაში გაიარონ ტრენინგები და წარდგნენ საკუთარი იდეით ინვესტორების წინაშე, რათა მოიპოვონ დამატებითი დაფინანსება პროდუქტის დასახვეწად და შეიძინონ ახალი კონტაქტები.ამჟამად, კნიკს არ აქვს გადახდის ფუნქცია, რადგან ბეჭდის მასობრივი წარმოებისთვის საჭიროა სხვადასხვა სერთიფიცირების პროცესების გავლა Visa-სა და Mastercard-თან, რაც გარკვეული დროს მოითხოვს. სტარტაპი ამაზე აქტიურად მუშაობს და უახლოეს პერიოდში ბეჭედს გადახდის ფუნციაც დაემატება.

ახალგაზრდა ანალიტიკოსთა და მეცნიერთა დარბაზი – ,,დოქტრინა”