ტექნოლოგიები

“კიბორგის” კონცეფციის შემოღებიდან ნახევარი საუკუნე გავიდა. თანამედროვე ტექნოლოგიის სწრაფი ტემპით განვითარებიდან გამომდინარე, ის, რაც ერთ დროს უბრალო კონცეფციად ითვლებოდა, დღეს ხორცს ისხამს.

ტოკიოს უნივერსიტეტის მკვლევართა ჯგუფმა შეიმუშავა რობოტული მკლავები, რომლებიც, მათი თქმით, კიბორგებს შორის ინტერაქციისთვის შეიქმნა.

ხელოვნური მკლავების დიზაინი ესთეტიკურად მიმზიდველია, თუმცა ოდნავ მოუხერხებელი, რადგან, ჯერჯერობით, 4 მკლავის გამოყენების შემთხვევაში მოწყობილობა 14 კგ-ს იწონის.

ნებისმიერ შემთხვევაში, ეს ტექნოლოგია ახალი ტიპის საზოგადოების ჩამოყალიბებისკენ წინგადადგმული ნაბიჯია და, ვინ იცის, იქნებ ერთ დღეს ის ჩვენი ცხოვრების განუყოფელი ნაწილიც გახდეს.

და თქვენ თუ მოირგებდით რობოტულ მკლავებს?

ანალიტიკოსთა და მეცნიერთა დარბაზი – ,,დოქტრინა”

ტიმ ბუჩერი ამბობს, რომ მან 100-მდე წიგნი ხელოვნური ინტელექტის გამოყენებით დაწერა. რაც საინტერესოა, მან ეს 2022 წლის აგვისტოდან შეძლო და რამდენიმე ათასი დოლარიც გამოიმუშავა.

მიუხედავად იმისა, რომ წიგნები შეიძლება უმაღლესი ხარისხის არ იყოს, ეს ხელოვნური ინტელექტის მორიგ პოტენციალს აჩვენებს. ბევრი მიიჩნევს, რომ მსგავს წიგნებს დიდი მომავალი აქვთ.

იდეებისა და ტექსტის გენერირებისთვის, ტიმ ბუჩერმა OpenAI-ის ChatGPT გამოიყენა. რაც შეეხება ილუსტრაციებს, ამისთვის მას Midjourney გამოადგა. ბუჩერის წიგნები, რომლებიც ხელმისაწვდომია Gumroad-ზე, დაახლოებით 1,99$-დან 5,99$-მდეა შეფასებული.

ბუჩერმა თქვა, რომ მას დაახლოებით ექვსიდან რვა საათი სჭირდება წიგნის შესაქმნელად.

“ზოგიერთ შემთხვევაში, მე ეს სამ საათშიც შევძელი”, — აღნიშნა მან.

ბუჩერმა ამაზე Newsweek-ში სტატია გამოაქვეყნა. თავის მხრივ, სტატიის 60 პროცენტიც ChatGPT-ის მიერ იყო გენერირებული.

წიგნებში ვხვდებით გამოგონილსა და მისტიკურ სიუჟეტებს. ხშირად სიუჟეტი მიწისქვეშ ვითარდება. მიუხედავად ამისა, პერსნაჟები ისეთი დახვეწილები და საინტერესოები ვერ არიან, როგორც ეს კარგ წიგნში შეიძლება იყოს.

“რთულია ხელოვნური ინტელექტის გამოყენებით კომპლექსური სიუჟეტის შექმნა. სიუჟეტი დიდი ხნის განმავლობაში ვერ გაგრძელდება. ამიტომ, ამ ეტაპზე, მოკლე სიუჟეტების შექმნა კარგი გამოსავალია”, — აღნიშნა ბუჩერმა.

ფაქტია, ნამდვილად ღირებული ნაწარმოების შექმნა ხელოვნურ ინტელექტს დღეს არ შეუძლია, მაგრამ ეს შეიძლება დროებითი იყოს. ხელოვნური ინტელექტი ამ დარგში მოღვაწეობას მხოლოდ ახლა იწყებს და ჯერ არავინ იცის ის, თუ რა იქნება შემდეგი.

ანალიტიკოსთა და მეცნიერთა დარბაზი – ,,დოქტრინა”

ხელოვნურ ინტელექტს 300 მილიონი სამუშაო ადგილის ათვისების პოტენციალი აქვს. საინვესტიციო ბანკის, Goldman Sachs-ის მიერ გამოცემულ ანგარიშში ნათქვამია, რომ ხელოვნურ ინტელექტს შეუძლია, აშშ-სა და ევროპაში ასობით მილიონი სრულგანაკვეთიანი სამუშაო დავალებების შესრულება.

კერძოდ, ხელოვნური ინტელექტით შესაძლებელია ადმინისტრაციულ და იურიდიულ პროფესიებში არსებული სამუშაო ძალის 40%-ზე მეტის ჩანაცვლება. განსაკუთრებით დიდ კონკურენციას შეუქმნის ავტომატიზებული სისტემები ისეთ პროფესიებს, როგორიც ჟურნალისტიკაა.

ანალიტიკოსთა და მეცნიერთა დარბაზი – ,,დოქტრინა

დუბაის ხელისუფლება მსოფლიოში პირველ მეჩეთს ააშენებს, რომელიც 3D-პრინტერზე დაიბეჭდება. ამის შესახებ CNN-ი იტყობინება.

ტელეარხის ცნობით, ნაგებობა 600 ადამიანზე იქნება გათვლილი და 2 სართულზე,2 ათასი კვადრატული მეტრის ფართობზე განთავსდება. მეჩეთს ბეტონის ხსნარისგან ააშენებენ. მშენებლობის დაწყება წლის ბოლოს იგეგმება, პროექტი კი 2025 წლის პირველ კვარტალში უნდა დასრულდეს.

3D-ბეჭდვის დახმარებით შენობების მშენებლობისთვის დიდი ბეჭდვითი მანქანებია საჭირო, რომლებშიც პროექტის შესახებ სრული ინფორმაციაა ატვირთული. კონსტრუქცია ფენებად აიწყობა.

ანალიტიკოსთა და მეცნიერთა დარბაზი – ,,დოქტრინა

ილონ მასკის ტვინის იმპლანტების შემქმნელმა კომპანია Neuralink-მა აშშ-ის სურსათისა და მედიკამენტების ადმინისტრაციისგან (FDA) ადამიანებზე კლინიკური გამოკვლევების ჩატარებისთვის თანხმობა მიიღო.
“ეს თანხმობა წარმოადგენს მნიშვნელოვან პირველ ნაბიჯს, რომელიც ერთ დღეს საშუალებას მისცემს ჩვენს ტექნოლოგიას, ბევრ ადამიანს დაეხმაროს”, – აღნიშნულია კომპანიის განცხადებაში.
Neuralink-ში ჯერჯერობით დეტალებზე არ საუბრობენ და აცხადებენ, რომ მეტი ინფორმაცია უახლოეს მომავალში იქნება ხელმისაწვდომი.
აშშ-ის სურსათისა და მედიკამენტების ადმინისტრაციაში ადასტურებენ, რომ უწყებამ Neuralink-ს თავის ტვინის იმპლანტისა და ქირურგიული რობოტის პაციენტებზე ცდების ჩასატარებლად გამოყენების უფლება მისცა.
2016 წელს დაფუძნებულ იმპლანტის კომპანიას, Neuralink-ს, სურს დაეხმაროს ადამიანებს მხედველობისა და მოძრაობის უნარის აღდგენაში ტვინის კომპიუტერთან დაკავშირების გზით. Neuralink იმედოვნებს, რომ მიკროჩიპების გამოყენება მოხდება ისეთი დაავადებების სამკურნალოდ, როგორიცაა დამბლა და სიბრმავე, და დაეხმარება გარკვეული შეზღუდული შესაძლებლობის მქონე ადამიანებს კომპიუტერებისა და მობილური ტექნოლოგიების გამოყენებაში.
ჩიპები – რომლებიც მაიმუნებზე უკვე დატესტეს – შექმნილია ტვინში წარმოქმნილი სიგნალების ინტერპრეტაციისთვის და მოწყობილობებზე Bluetooth-ის საშუალებით ინფორმაციის გადასაცემად.
2019 წლის შემდეგ ილონ მასკმა რამდენჯერმე განაცხადა, რომ Neuralink-ი ცდებს ადამიანებზე დაიწყებდა, მაგრამ კომპანიამ შესაბამისი ნებართვის მისაღებად აშშ-ის სურსათისა და მედიკამენტების ადმინისტრაციას მხოლოდ 2022 წლის დასაწყისში მიმართა და მარტში, უსაფრთხოებასთან დაკავშირებით არსებული შეშფოთების გამო, უარი მიიღო.

წყარო : reuters.com
bbc.com

ანალიტიკოსთა და მეცნიერთა დარბაზი ,,დოქტრინა”

ილონ მასკის კომპანია Neuralink-მა ტვინის ჩიპის ადამიანებზე გამოცდისთვის აშშ-ის სურსათისა და მედიკამენტების ხარისხის კონტროლის სააგენტოსგან (FDA) ნებართვა მიიღო. ამის შესახებ ინფორმაცია კომპანიამ Twitter-ის გვერდზე გაავრცელა.

„მოხარული ვართ გაცნობოთ, რომ FDA-სგან პირველი კლინიკური კვლევის ჩატარების ნებართვა მოვიპოვეთ. ეს, სააგენტოსთან თანამშრომლობით, Neuralink-ის გუნდის გასაოცარი მუშაობის შედეგია და წარმოადგენს მნიშვნელოვან პირველ ნაბიჯს, რომელიც ერთ დღეს ჩვენს ტექნოლოგიას უამრავი ადამიანის დახმარების საშუალებას მისცემს“, – ვკითხულობთ კომპანიის მიერ გამოქვეყნებულ განცხადებაში.

მასკი Neuralink-ის მიერ ნებართვის მიღებას ტვიტით გამოეხმაურა და კომპანიაში მომუშავეთა გუნდს წარმატება მიულოცა.

ილონ მასკმა Neuralink-ი მაქს ჰოდაკთან ერთად 2016 წლის ივლისში დააფუძნა. ამის შემდეგ კომპანია მიკროჩიპის შექმნასა და დახვეწაზე მუშაობს, რომლის თავის ტვინში იმპლანტაციის მეშვეობით ნეირონების სტიმულირებაა შესაძლებელი. Neuralink-ის მოწყობილობის მთავარი დანიშნულება ზურგის ტვინის დაზიანებით გამოწვეული დამბლისა და ნევროლოგიური დარღვევების მქონე ადამიანების მკურნალობაა.

ანალიტიკოსთა და მეცნიერთა დარბაზი ,,დოქტრინა”