ტექნოლოგიები

გიფიქრიათ, ტელეფონისა და კომპიუტერის ეკრანისგან შორს ყოფნაში ფულს გიხდიდნენ?

ამერიკული კომპანია Reviews.org მომხმარებლებს 24 საათის განმავლობაში ეკრანისგან შორს ყოფნაში 2 400 დოლარს გადაუხდის. კომპანიამ ,,ტექნოლოგიებისგან დეტოქს” კამპანია წამოიწყო, რის ფარგლებშიც მონაწილეებმა უნდა გაძლონ ეკრანის გარეშე ერთი დღის განმავლობაში.

მარტივად ჟღერს დავალების შესრულება, მაგრამ გამოწვევა ცოტათი უფრო რთულია. მოხალისეები ერთი დღის განმავლობაში არა მხოლოდ ტელეფონების, არამედ ტელევიზორის, კომპიუტერის, კომპიუტერული თამაშების, ჭკვიანი საათების, ანდა ჭკვიანი სახლის მოწყობილობების გარეშე უნდა გაძლონ. მონაწილეები მიიღებენ სეიფებს, სადაც 24 საათის განმავლობაში შეინახავენ ელექტრომოწყობილობებს.

მონაწილეობის მისაღებად კომპანია ითხოვს კითხვარის შევსებას და სულ რაღაც 100 სიტყვიან პასუხს კითხვაზე, თუ რატომ იღებენ მონაწილეობას. განაცხადების მიღება 26 მარტს შეწყდება და გამარჯვებულებს 29 მარტს გამოაცხადებენ. მონაწილეობის მიღება მხოლოდ აშშ-ში მცხოვრებლებს შეუძლიათ.

პანდემიის პირობებში ბევრ ადამიანს მოუწია დისტანციურად მუშაობა, სტუდენტებს დისტანციურად სწავლა, რამაც მათი ეკრანზე კიდევ უფრო მიჯაჭვულობა გამოიწვია. Common Sense Media-ს 2019 წლის ანგარიშის მიხედვით, აშშ-ს თინეიჯერების დიდი ნაწილი გასართობად მედიასაშუალებებს დღეში 7 საათზე მეტ დროს უთმობს.

მასალა მოამზადა: ნინი ხეცურიანმა

ახალგაზრდა ანალიტიკოსთა და მეცნიერთა დარბაზი ,,დოქტრინა“

Google-მა უკვე დაიწყო დრონების დატესტვა, როგორც მიწოდების სერვისის ნაწილის. ახლა კი, მოწყობილობას ხანძარსაწინააღმდეგო ტექნოლოგიადაც განიხილავს.

ცნობილია, რომ The Google Research Climate and Energy Group-მა ცოტა ხნის წინ ფედერალურ საავიაციო ადმინისტრაციას (FAA) კერძო საკუთრებაში დრონის შემოწმების ნებართვა სთხოვა. კერძოდ, კომპანიას სურს, Homeland Surveillance & Electronics (HSE)-ის მიერ შექმნილი დრონი გამოსცადოს, რომელიც პირველადი ხედვის ტექნოლოგიით ხანძარსაწინააღმდეგო და მონიტორინგის ოპერაციების შესამოწმებლად იქნება განკუთვნილი.

ამ ეტაპზე Google-ის გეგმასთან დაკავშირებით საკმაოდ მწირი ინფორმაცია გვაქვს და არ ვიცით მისი სპეციფიკური დეტალების შესახებ. თუმცა იმის გათვალისწინებით, რომ HSE-ის ზოგიერთი მოწყობილობა უკვე გამოიყენება ნათესების მოსარწყავად, ადვილი წარმოსადგენია, მართლაც ვიხილოთ “ხანძრის წინააღმდეგ მებრძოლი” დრონები.

მსოფლიოში სახანძრო განყოფილებებში უკვე იყენებენ დრონებს, მაგრამ უმეტეს შემთხვევაში მათი ფუნქცია მხოლოდ მონაცემების რეალურ დროში მიწოდებას მოიცავს, რათა მეხანძრეებმა ხანძრის ჩაქრობა უსაფრთხოდ და მაქსიმალურად ეფექტურად შეძლონ. თუმცა ტექნოლოგიების განვითარებასთან ერთად სულ უფრო მეტად ვხვდებით “წყლის შესასხურებელ” დრონებსაც.

ახალგაზრდა ანალიტიკოსთა და მეცნიერთა დარბაზი ,,დოქტრინა”

დღეს ინტერნეტის და ციფრული სერვისების გარეშე ცხოვრება ბევრი ჩვენგანისთვის წარმოუდგენელია. ამ ევოლუციამ ყოველდღიურობა ძალიან გაამარტივა – ონლაინშოპინგიდან დაწყებული, საბანკო მომსახურებით დამთავრებული – ყველაფერს უფრო სწრაფად და მარტივად ვაკეთებთ. ამ დიდ კომფორტს თავისი საფრთხეებიც ახლავს თან, რომლებიც აუცილებლად უნდა გავითვალისწინოთ.

ალბათ, გსმენიათ, რომ ინტერნეტსამყაროში არსებობენ „მოხერხებული“ თაღლითები, რომლებიც სხვადასხვა გზით ცდილობენ ჩვენს მოტყუებას და ჩვენი საბანკო ანგარიშებიდან თანხის მოპარვას. ასეთი ტიპის თაღლითობას “ფიშინგი” ჰქვია. ეს სიტყვა კარგად უნდა დავიმახსოვროთ, რადგან მასთან გამკლავება მხოლოდ ჩვენზეა დამოკიდებული.

ინტერნეტთაღლითების მთავარი იარაღი ჩვენ წინააღმდეგ სწორედ ჩვენი უყურადღებობაა. ისინი სარგებლობენ იმით, რომ ჩვენ ხშირად ინტერნეტში სწრაფად ვიღებთ გადაწყვეტილებებს და არ ვაკვირდებით დეტალებს. სწორედ ამიტომ, ჩვენი ანგარიშებიდან თანხა ქრება, უფრო სწორად, მათ ანგარიშებზე ირიცხება.
ფიშინგისგან არაფერი დაგიცავთ უკეთ, ვიდრე საკუთარი თავი და პირადი პასუხისმგებლობა.

მოდით, დავფიქრდეთ, როგორ შეიძლება ამის გაკეთება:

● ინტერნეტთაღლითები თქვენს ანგარიშზე წვდომის მისაღებად იყენებენ სხვადასხვა ორგანიზაციის ყალბ ბმულებს, რომელსაც მეილზე, მესენჯერში ან სხვა მსგავს აპლიკაციებში გიგზავნიან. ამ დროს, აუცილებლად უნდა დააკვირდეთ ვებგვერდის მისამართის მაგალითად, ჩვენივე უყურადღებობის გამო, შესაძლოა აღმოვჩნდეთ ვებგვერდზე, რომელიც Amazon.com გვგონია, სინამდვილეში კი ვიყოთ ხაფანგში სახელად Amzon.com; შენიშნეთ? – დიახ, სწორედ აქ ვუშვებთ პირველ შეცდომას; თუკი მისამართი არ ემთხვევა ორგანიზაციის რეალურ მისამართს, ესე იგი , თქვენ საფრთხის ქვეშ ხართ;

● ინტერნეტთაღლითები თქვენი ყურადღების მისაქცევად იყენებენ ემოციური მანიპულაციის ტექნიკას, რაც იმას ნიშნავს, რომ მესიჯები, რომელსაც გიგზავნიან, აუცილებლად საგანგაშო იქნება. ეს შეიძლება იყოს, როგორც შეტყობინება, რომ თქვენ მოიგეთ iPhone 12, ასევე ის, რომ თქვენს ანგარიშზე ხორციელდება შეტევა და, ამის გამო, საჭიროა იდენტიფიკაციის გავლა. თუკი ასეთ მესიჯს მიიღებთ, აუცილებლად გადაამოწმეთ იმ კომპანიასთან, რომლის სახელითაც მოგდით შეტყობინება. მაგ: თუკი ბანკისგან მეილზე მიიღეთ შეტყობინება, დარეკეთ ქოლცენტრში და გადაამოწმეთ. კომპანიების უმრავლესობა თქვენთვის მნიშვნელოვანი შეტყობინების გამოსაგზავნად ოფიციალურ არხებს, ინტერნეტბანკს ან პირად ზარს იყენებს.

● ერთ-ერთი მარტივი გზა საფრთხის აღმოსაჩენად თქვენი ბრაუზერის ფუნქციონალია. დააკვირდით ბრაუზერის მარცხენა კუთხეში ბოქლომის ნიშანს, რომელიც გკარნახობთ, რამდენად უსაფრთხოა ესა თუ ის ვებგვერდი. თუკი ბოქლომი გადახაზულია, ესე იგი, თქვენ სახიფათო ზონაში ხართ და დროა დატოვოთ იქაურობა. გარდა ამისა, ბრაუზერების უმრავლესობას აქვს ფიშინგის დეტექტორი დამატებები, რომელთა დაყენებაც უფასოდ და მარტივად შეგიძლიათ. ამისათვის კი საჭიროა უბრალოდ დაგუგლოთ anti phishing add on chrome / mozilla / opera და სხვა.

თუ, კიბერთაღლითების მახეში მაინც გაებით:

● თუ ყალბ საიტზე აღმოჩნდით და ტრანზაქციის შესრულებას გთხოვთ, დარწმუნდით, რამდენად უსაფრთხო გადახდის მეთოდს იყენებს ესა თუ ის საიტი. თუკი გადახდის მეთოდი არ არის სანდო, სასწრაფოდ დატოვეთ ის.
● თუკი თქვენ უკვე დაუშვით შეცდომა, აუცილებლად, დაუყოვნებლივ მიმართეთ კომპანიას დროულად. ისინი დაგეხმარებიან პრობლემის მოგვარებაში, გირჩევენ საუკეთესო გზას და შეეცდებიან თავიდან აგარიდონ ზიანი;
● ყოველი შემთხვევისთვის, დააზღვიეთ თქვენი საბანკო ანგარიში, რომ ზიანის ასანაზღაურებლად ლეგიტიმური გზა გქონდეთ.

გახსოვდეთ, რომ ფიშინგთან გამკლავება მარტივია, თუკი შესაბამის ინფორმაციას ფლობთ და ყურადღებით ხართ.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ამერიკელი მილიარდერი ელონ მასკი, რომელიც ცნობილი კომპანიების SpaceX- სა და Tesla- ს ხელმძღვანელია, აცხადებს, რომ მის სტარტაპს, Neuralink-ს ჰყავს მაიმუნი, რომელსაც ვიდეო თამაშების თამაში შეუძლია.

მასკის განმარტებით, მაიმუნს თავის ტვინში უსადენო ჩიპი ჩაუდეს, რომელიც მას ვიდეო თამაშების თამაშის საშუალებას აძლევს, რითაც მაიმუნი “ძალიან ბედნიერია”.

„ჩვენ გვყავს მაიმუნი, თავის ქალაში უსადენო იმპლანტით, რომელიც ტვინს წვრილი სადენებით უკავშირდება, რის შედეგადაც მას ვიდეო თამაშების თამაში გონებით შეუძლია. ის სრულიად ბედნიერად გამოიყურება,“- განაცხადა მასკმა სოციალურ აპლიკაცია Clubhouse-ში საუბრისას.

„ერთი რამ, რის გარკვევასაც ვცდილობთ არის ის, შეძლებენ თუ არა მაიმუნები ერთმანეთს Pong-ი ეთამაშონ,“- დასძინა მასკმა.

მისი თქმით, Neuralink- ის ობიექტები  აშშ-ის მარეგულირებელი ორგანოების მოთხოვნებს აკმაყოფილებენ.

წყარო : independent.co.uk

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”