რობოტექნიკა

Shenzhen EngineAI Robotics-მა თავისი პირველი ჰუმანოიდი რობოტი წარადგინა. SE01 უახლესი ტექნოლოგიითა შექმნილი და კიდევ ერთხელ გვაფიქრებს იმაზე, თუ რამხელა პოტენციალი აქვს რობოტიკას.

SE01-ის ერთ-ერთი გამორჩეული მახასიათებელი მისი ნერვული ქსელის სისტემაა. ამით შემქმნელები რობოტიკის ერთ-ერთ მთავარ გამოწვევას უპირისპირდებიან, სურთ რობოტმა უფრო ბუნებრივად, ადამიანის მსგავსად იმოძრაოს.

ახალი ჰუმანოიდი რობოტის ნაბიჯები სწრაფი და გლუვია, რაც ადამიანის მოძრაობას გვაგონებს.

ინჟინრების თქმით, ეს რობოტიკის სფეროში სრულიად ახალ შესაძლებლობებს აჩენს.

რობოტი აღჭურვილია NVIDIA-ისა და Intel-ის ორმაგი პროცესორებით, ასევე მაღალი სიზუსტის სტერეო კამერების სამი კომპლექტით. მთლიანობაში ეს SE01-ის მოწინავე ვიზუალურ ნერვულ ქსელს უზრუნველყოფს. ეს რობოტს საშუალებას აძლევს დაამუშაოს ვიზუალური მონაცემები რეალურ დროში.

EngineAI-მ ალუმინის სპეციალური შენადნობი გამოიყენა, რაც რობოტს მკვრივ და მსუბუქ სხეულს აძლევს.

EngineAI Robotics-ის დამფუძნებელმა და აღმასრულებელმა დირექტორმა, ჟაო ტონგიანგმა აღნიშნა, რომ მათი მიზანი რობოტიკის ბაზრის გაფართოება და რობოტების უფრო “გაადამიანურებაა”.

კომპანიის მიზანი, 2025 წლისთვის 1000-ზე მეტი ასეთი რობოტის წარმოებაში ჩაშვებაა.

ანალიტიკოსთა და მეცნიერთა დარბაზი ,,დოქტრინა”

Sotheby’s აუქციონზე რობოტის მიერ შექმნილი ნახატი გაიყიდებაკომპანიის ვებგვერდზე გამოქვეყნებული ინფორმაციის თანახმად, სურათი 2019 წელს შექმნილმა რობოტმა Ai-Da-მ დაწერა. პორტრეტზე ბრიტანელი მათემატიკოსი ალან ტიურინგია გამოსახული.

Sotheby’s ამ ლოტში 120-180 ათასი დოლარის მიღება სურს. აუქციონი 31 ოქტომბერს გაიმართება.

Ai-Da მსოფლიოში პირველი მხატვარი რობოტი გახდება, რომლის ნამუშევარიც აუქციონზე გაიყიდება. აღსანიშნავია, რომ 2024 წლის მაისში მისი ნახატი გაეროში წარადგინეს.

„ჩემი ნამუშევრები გაერთიანებული ერების ორგანიზაციის პრინციპების შესაბამისია, რომელთა თანახმადაც ხელოვნური ინტელექტი პასუხისმგებლობიანად უნდა იყოს გამოყენებული. ეს იყო ალან ტიურინგის პოზიციაც“, – ამბობს რობოტი, რომელიც კომუნიკაციისთვის ხელოვნური ინტელექტის მოწინავე მოდელს იყენებს.

ანალიტიკოსთა და მეცნიერთა დარბაზი “დოქტრინა”

სამხრეთ კორეაში რობოტმა ადამიანი ყუთისგან ვერ გაარჩია და სასიკვდილო დაზიანებები მიაყენა. ამის შესახებ BBC წერს.

გამოცემის ინფორმაციით, ინციდენტი ქვეყნის სამხრეთით, ერთ-ერთ ქარხანაში მოხდა, სადაც რობოტიზებულ ხელს წიწაკით სავსე კოლოფების დიდ ყუთებში ჩასალაგებლად იყენებენ. როდესაც გეგმური შემოწმებისას რობოტთან ქარხნის თანამშრომელი მივიდა, რობოტმა ისიც ყუთად აღიქვა, დაიჭირა და კონვეიერზე დააგდო. კაცმა სახისა და გულმკერდის არეში სერიოზული დაზიანებები მიიღო და კლინიკაში გარდაიცვალა.

ინციდენტის შემდეგ გავრცელებულ განცხადებაში, ქარხნის მფლობელმა კომპანიამ Donggoseong Export Agricultural Complex უსაფრთხო გარემოს შექმნისადმი მზადყოფნა გამოთქვა.

ანალიტიკოსთა და მეცნიერთა დარბაზი “დოქტრინა”

რობოტების მწარმოებელი კომპანია Boston Dynamics მფრინავი ჰუმანოიდი რობოტის შექმნას აპირებს. ახლახან შევიტყვეთ, რომ იგი ფირმა Gravity Industries-თან ითანამშრომლებს. ეს უკანასკნელი ვერტიკალური აფრენისა და დაჯდომის (VTOL) საავიაციო სისტემებს, Jet Suit-ებს აწარმოებს — ერთგვარ მოსასხამებს, რომლებიც ადამიანს ფრენის საშუალებას აძლევს.

კომპანიები ერთმანეთთან თანამშრომლობით მფრინავ რობოტზე იმუშავებენ. კერძოდ, Gravity-ს ტექნოლოგიის დახმარებით Boston Dynamics-ის ჰუმანოიდ რობოტს, სახელად Atlas, ფრენის უნარს შესძენენ. სპეციალისტებმა სატესტო ფრენები უკვე დაიწყეს ბოსტონის პორტის თავზე.

კომპანიების წარმოდგენით, მფრინავი რობოტი სამომავლოდ არაერთი კუთხით შეიძლება დაგვეხმაროს. მათ შორისაა: ტურბინების ინსპექცია და შეკეთება, ტყის ხანძრების მონიტორინგი და საჭიროების შემთხვევაში სასწრაფო დახმარების გაწევა, ცათამბჯენებზე ფანჯრების წმენდა, მწყობრიდან გამოსული საჰაერო ბურთებიდან ხალხის ჩამოყვანა, ჰაერში ტრანსპორტის მოძრაობის კონტროლი და ა. შ.

„ვინაიდან ოთხფეხა და ჰუმანოიდი რობოტების კუთხით გლობალური ინტერესი დიდია, გადავწყვიტეთ, რომ საზღვრები უნდა დაგვეტესტა და რაღაც ახალი გვეცადა”, — განაცხადა მარკ ტერმანმა, Boston Dynamics-ის სტრატეგიულმა დირექტორმა — “მიწაზე სიარული დღესდღეობით ლამის მარტივად გამოიყურება, ამიტომ ჩვენი ინოვაციები ცას უნდა მივაწვდინოთ”.

პირველი ტესტირების ფარგლებში ჰაერში მფრინავი რობოტის სიმარდეს ადამიანისას შეადარებენ. კვლევისა და გაუმჯობესების ეტაპზე Atlas ადამიან ათლეტებთან ერთად ჩაერთვება Gravity-ს მიერ ორგანიზებულ შეჯიბრებებში. მონაწილეები 1 500 ცხენისძალის მქონე Jet Suit-ებს გამოიყენებენ და სანაპიროებზე იფრენენ, მსოფლიოს სხვადასხვა წერტილში.

„სამეცნიერო ფანტასტიკას რეალობად ვაქცევთ”, — განაცხადა რიჩარდ ბრაუნინგმა, Gravity-ს აღმასრულებელმა დირექტორმა — “ეს ყველაზე მეტად გვაახლოებს სუპერგმირობის შეგრძნებასთან, და ერთი სული გვაქვს ვიხილოთ, რამდენ ადგილას გაფრინდება Atlas მომდევნო წლებში”.

ანალიტიკოსთა და მეცნიერთა დარბაზი “დოქტრინა”

ამეკა მსოფლიოში ყველაზე ექსპრესიულ რობოტად ითვლება და ახლა მან ძალები ხელოვნებაში გამოცადა.

Engineered Arts კომპანიაა, რომელიც ჰუმანოიდ რობოტებზე მუშაობს. ეს კომპანია დგას თავად Amaca-ს უკანაც და მათ ახლა რობოტს დახატვა ასწავლეს.

ვიდეოში, რომელიც 29 ივნისს გამოქვეყნდა, Ameca-ს კატის დახატვას ავალებენ.

ამეკას შესახებ

ამეკა 2021 წელს შეიმუშავეს. ის ჰუმანოიდი რობოტია, რომელიც აღჭურვილია მიკროფონებით, კამერებით, სახის ამომცნობი ტექნოლოგიითა და სხვა შესაძლებლობებით.

2023 წლის აპრილში Engineered Arts-მა რობოტის პროგრამული უზრუნველყოფა განაახლა და ის GPT-4-თან დააკავშირეს. და აი ახლა, მკვლევრებმა რობოტს “ნახატების წარმოდგენის” საშუალება მისცეს.

Engineered Arts-ის თანახმად, ერთ-ერთი მთავარი გამოწვევა სურათების ვექტორებად და ხაზებად გარდაქმნა იყო.

ამეკა და კატა

ვიდეოში ამეკა განმარტავს, თუ როგორ ქმნის ნახატებს.

“გამოსახულებას ვქმნი ნერვული ქსელის გამოყენებით. ქსელიდან ვიღებ ნახატებზე წვდომას და შემდეგ ვქმნი გამოსახულებას. საბოლოოდ, აღქმული ინფორმაცია ტილოზე გადმომაქვს”, — ამბობს ამეკა.

როდესაც ამეკას კატის დახატვა სთხოვეს, რობოტმა ხაზი გაუსვა იმას, რომ მას კატის კონტექსტი ესმის.

ნახატის შესრულების შემდეგ რობოტმა ტილოზე თავისი ხელმოწერა დატოვა და ისიც იკითხა, მოსწონდათ თუ არა მისი ნამუშევარი.

ვიდეოს ნახვა შეგიძლიათ ქვემოთ:

ალბათ ერთხელ მაინც გიფიქრიათ რობოტზე, რომელიც თქვენს მაგივრად საოჯახო საქმეს ასრულებს. თუ ასეა, თქვენ უბრალოდ მეოცნებე არ ხართ. ინფორმაციას უცხოური მედია ავრცელებს. 

კარნეგი მელონის უნივერსიტეტის (CMU) მკვლევართა ჯგუფი (ისევე როგორც სხვა მეცნიერები) ფიქრობს იმაზე თუ როგორ აქციოს თქვენი ოცნებები რეალობად.

მკვლევრებმა რობოტებს ვიდეოები აყურებინეს, სადაც ადამიანები ჩვეულებრივი საქმიანობებით: უჯრის გამოღებით, ტელეფონზე პასუხითა და სახლის დალაგებით იყვნენ დაკავებულნი.

აქამდე, მეცნიერები რობოტებს დავალებების შესასრულებლად იმიტირებულ გარემოში ავარჯიშებდნენ. ამ მიდგომას დიდი დრო და რესუსრები სჭირდება.

ახალი მეთოდი სტანდარტულს ბევრად ჯობია. მკვლევრების თქმით, მათ მიერ შემოთავაზებული მოდელი, “ვიზუალური რობოტიკის ხიდი” (VRB), რობოტებს დავალების შესრულებას 25 წუთში ასწავლის. რაც მთავარია, ეს ადამიანისა და სიმულირებული გარემოს გარეშე.

„დიახ, ჩვენ ვაჩვენეთ, რომ რობოტებს ვიდეოების ყურებით ბევრი რამის სწავლა შეუძლიათ. ეს დროისა და რესურსის დაზოგვის საშუალებაა”, – თქვა შიხარ ბაჰლმა, კვლევის ერთ-ერთმა ავტორმა.

ეს WHIRL-ის გაუმჯობესებული ვერსიაა. განსხვავება WHIRL-სა და VRB-ს შორის არის ის, რომ პირველი მოითხოვს ადამიანს, მეორე კი მხოლოდ ვიდეოს გაშვებას საჭიროებს. WHIRL სწავლების ფარგლებში ადამიანი ასრულებს გარკვეულ დავალებას, მას რობოტი უყურებს და ასე სწავლობს.

ვიდეოების ყურების შემდეგ რობოტებმა თორმეტივე დავალება წარმატებით შეასრულეს. ესენი იყო ქილის გახსნა, ტელეფონის აღება, სახურავის აწევა, კარის გაღება, უჯრის გამოღება და სხვა.

ანალიტიკოსთა და მეცნიერთა დარბაზი “დოქტრინა”