close

ტურიზმი

გეოგრაფიასაქართველოტურიზმი

ეროვნული მნიშვნელობის უცნობი ადგილები გიორგი დვალაშვილის წიგნში

4.86K views on

საქართველოს სრულქმნილი ბუნება ოდითგანვე აღფრთოვანებას იწვევდა დამთვალიერებელში, თითოეული კუთხე გამორჩეულია როგორც მატერიალური, ისე არამატერიალური კულტურული მემკვიდრეობით. ეროვნული მნიშვნელობის მქონე უნიკალური, მომნუსხველი, ბუნების დიდებული და სრულყოფილი ქმნილებები შესულია წიგნში ,,საქართველოს ბუნების 100 საოცრება”, რომლის ავტორია ივანე ჯავახიშვილის სახელობის თბილისის სახელმწიფო უნივერსიტეტის ზუსტ და საბუნებისმეტყველო მეცნიერებათა ფაკულტეტის გეოგრაფიის დეპარტამენტის გეომორფოლოგია-კარტოგრაფიის კათედრის ასისტენტ-პროფესორი, გეოგრაფიის აკადემიური დოქტორი – გიორგი დვალაშვილი. წიგნში იხილავთ ზღაპრულ მღვიმეებს, კლდე-შთენილებს, ტბებს, მყინვარებს, ტრავერტინებს, ხეობებს, მოკლედ, მაღალი ესთეტიკური მახასიათებლების მქონე გასაოცარ ადგილებს.

,,აღნიშნული ადგილები შევარჩიეთ რეგიონების მიხედვით, ნაშრომში ზუსტადაა აღწერილი მარშრუტი, მითითებულია მანძილი ქვეყნის დედაქალაქიდან, მუნიციპალიტეტის ცენტრიდან და რეგიონის ცენტრიდან. აღსანიშნავია ისიც, რომ წიგნში შესული ბუნების 22 საოცრება, ამავდროულად, არის კულტურული მემკვიდრეობის ძეგლი, მაგალითად, უფლისციხე. ვფიქრობ, წიგნში ბევრ უცხო და გამორჩეულ ადგილს იხილავს საზოგადოება. წიგნი ილუსტრირებულია 350 ფოტოკადრითა და რუკით. გამოიცა ქართულ, ინგლისურ და რუსულ ენებზე, რადგან, მოგეხსენებათ, დაინტერესება დიდია, შესაბამისად, ვიზრუნეთ ტურისტებზეც,” – აღნიშნა გიორგი დვალაშვილმა ,,დოქტრინასთან” საუბრისას.

1.ტაბაწყურის ტბა

სოფელი ტაბაწყური მდებარეობს სამცხე-ჯავახეთის მხარეში, ბორჯომისა და ახალქალაქის მუნიციპალიტეტის საზღვარზე. მისი სახელი ტბის (ტაბის) ყურეს ნიშნავს. სოფელი მართლაც პირდაპირ ტბაშია შეჭრილი.  ვულკანის ამოფრქვევის შედეგად წარმოქმნილ ტბასაც ტაბაწყური ჰქვია. ტბის მაქსიმალური სიღრმე 40.2 მეტრია და საქართველოს ტბებს შორის ყველაზე დიდი მოცულობა აქვს (221 მლნ მ3). ზაფხულში ცისფრად მოლივლივე ტბა ნოემბერში სარკესავით იყინება. ტბის წყალი იმდენად სუფთაა, რომ ადგილობრივი მოსახლეობა წლების მანძილზე სასმელად იყენებდა.

2.ასკანის თიხები

თიხა საქართველოში ბევრგან მოიპოვება და მას უძველესი დროიდან იყენებს ადამიანი. საბადო, რომელიც გურიაში, სოფელ მთისპირში, 1932 წელს აღმოაჩინეს, უნიკალურია. ეს არის 60 მილიონი წლის წინათ წყალქვეშა ვულკანების ფერფლის ზღვის წყლის პირობებში დალექვის შედეგად წარმოქმნილი ბუნებრივი განძი, რომელსაც მეცნიერები ბენტონიტურ თიხებს უწოდებენ. ასკანის თიხა გამოიყენება: ფარმაცევტულ თუ საფეიქრო მრეწველობებში, პარფიუმერიაში, ენერგეტიკულ მრეწველობაში, სოფლის მეურნეობაში, ასკანგელი გამოიყენება მანქანათმშენებლობაში, კერამიკულ და საფეიქრო მრეწველობაში და ა.შ. ,,ასკანის” წარმოშობის შესახებ მრავალი ლეგენდა არსებობს, ამბობენ, რომ გურიაში გავრცელებული ეპიდემიის დროს ჯანმრთელი მხოლოდ ამ სოფლის მოსახლეობა დარჩა, სწორედ ამიტომ, მათ ,,ასკანიანები” უწოდეს. კიდევ ერთი ვერსიით, მოსახლეობა მეფუტკრეობას მისდევდა, ,,ასკანის” ფუძეც სიტყვა ,,სკა” არის.

3.ჩანჩხალოს მღვიმე-მაცივარი

აჭარაში მდებარე სოფელ ჩანჩხალოში მდებარეობს საინტერესო ბუნებრივი წარმონაქმნი ,,მღვიმე-მაცივარი”. სოფლის ამ ნაწილს ნამალევი ჰქვია. სიტყვა ,,ნამალევიდან” გამომდინარე, ვარაუდობენ, რომ ომიანობის დროს ციხესთან არსებული ბუნებრივი მღვიმე სამალავადაც გამოიყენებოდა. მოსახლეობა მღვიმის მიმდებარე ტერიტორიაზე ხშირად თხრის ორმოს და სურსათს ინახავს თხრილში, სადაც ზაფხულში დაახლოებით ისეთივე ტემპერატურა ფიქსირდება, რაც მაცივარში. პაპანაქება სიცხეშიც კი მღვიმეში არ დნება ყინული, რომელიც სოფლის მოსახლეობას ამოაქვს და სხვადასხვა დანიშნულებით იყენებს. ჩანჩხალოს მკვიდრს, რომელსაც კლდესთან ახლოს აქვს სახლი, მღვიმე-მაცივრის პრაქტიკული გამოყენებაც გადაუწყვეტავს, ბუნებრივი ,,მაცივრისთვის” რკინის კარი შეუბამს და საკუჭნაოდ გაუკეთებია.

4.უშოლთის მღვიმე

რაჭის ქედზე, ონის მუნიციპალიტეტში, სოფელ შქმერთან ახლოს, ფოცხვრების მთის აღმოსავლეთ ფერდობზე, სუბალპურ სარტყელში, სათავეს იღებს მდინარე რიონის მარცხენა შენაკადი – მდინარე ხეორი. ეს ანკარა მთის მდინარე პირდაპირ, სოფლის ორღობეებში მოედინება. მისი სიგრძე 14,5 კმ-ია.

ხეორის ძნელად მისადგომი კანიონის ქვეშ, ე.წ. ბრმა ხეობაში მიედინება ხეორი. მდინარის აუზში მდებარეობს უშოლთის მღვიმე. 2150 მ სიგრძის ბუნებრივი გამოქვაბული მდიდარია ქიმიური ნაღვენთებით, განსაკუთრებით ორი დარბაზი – ,,თბილისის უნივერსიტეტი” და ,,ვახუშტი”.

5.კაცხის სვეტი

ზემო იმერეთის სოფლებს შორის ერთ-ერთი უძველესი და ულამაზესია სოფელი კაცხი, რომელსაც საინტერესო ისტორია აქვს. სიტყვა ,,კაცხი” სვანურია  და მწვერვალს ნიშნავს. კაცხის ტერიტორიაზე აღმართულია ბუნებრივი კირქვული სვეტი – ტექტონიკური ძვრების შედეგად წარმოქმნილი კლდოვანი მასა, გეოლოგების ენაზე – დენუდაციური ,,მოწმე” შთენილი. კაცხის სვეტის მიდამოები და თხემი ფართოფოთლოვანი მცენარეებითა და ლიანებით არის შემოსილი, რაც განუმეორებელ ლანდშაფტს ქმნის.

ადრინდელ შუა საუკუნეებში აქ განდეგილთა სამყოფელი და სალოცავი ყოფილა. სვეტის ზედა ბაქანზე დგას მომცრო ზომის ეკლესია.

6.კვერნაქების კლდე-შთენილები

კვერნაქის ქედი გადაჭიმულია მტკვრის მარცხენა სანაპიროზე მდინარე საქაშეთისხევიდან მდინარე არაგვამდე.

აღმოსავლეთ კვერნაქის სამხრეთ კალთაზე კლდოვანი რელიეფი მრავალრიცხოვანი ფლატეებითა და ქარაფებითაა წარმოდგენილი. აქ მრავლდაა ხელოვნური გამოქვაბულები. მათგან ყველაზე გამორჩეულია კლდეში ნაკვეთი კომპლექსი-გამოქვაბული – ციხე-ქალაქი უფლისციხე. დღეს უფლისციხე ღია ცის ქვეშ არსებული მუზეუმია. უფლისციხეში არის წმიდა გიორგის სახელობის ბიზანტიური სტილის სამნავიანი ბაზილიკა.

7.ხორხების მღვიმე

ხორხების ყინულოვანი მღვიმე ბედენის პლატოს სამხრულ შვერილზე მდინარე კლდეისის წყლის ორ მდგენელს შორის მდებარეობს. ლოდების ქვეშ საყინულეა. სწორედ ამ ლოდებს შორის არის ვიწრო შესასვლელი, საიდანაც გვირაბებით დაქსელილ მიწისქვეშეთში შეიძლება შესვლა.

სოფელ კლდეისის ტერიტორიაზე არის ჩანჩქერი, სწორედ აქ მდებარეობს გამოქვაბული. თქმულების მიხედვით, აქ ნადირობდა თამარ მეფე, ნადირობისას კლდეს ისარი შეერჭო და სოფლის სახელწოდებაც აქედან მომდინარეობს – ,,კლდეისი”.

8.შამგონის კუნძული

ზუგდიდში მდებარე სოფელი შამგონა გაშენებულია მოშლამულ მდინარეულ კუნძულზე. დღევანდელი შამგონა შორეულ წარსულში ტყით ყოფილა დაფარული. ძველად იქ ხარობდა ვაზის ჯიში – შამგუ, რომელიც გადაშენდა, თუმცა სახელი შემორჩა კუნძულს. იტალიელ მისიონერ არქანჯელო ლამბერტის, რომელიც სამეგრელოს ეწვია (1611-1657), თავის ნაშრომში ნახსენები აქვს შამგონაში მდგარი ,,წიფურიას მონასტერი”. მისივე ჩანახატის მიხედვით, მონასტერი მდებარეობდა მდ.ენგურის მარცხენა ტოტის მარჯვენა ნაპირზე, სოფელ ნობაკევსა და ზუგდიდს შორის – ეს კი თანამედროვე შამგონის ტერიტორიაა.

9.აბუდელაურის ტბები

აბუდელაურის მყინვარის მოქმედების მიერ წარმოქმნილ ჩადაბლებაში მდებარეობს სამი ერთმანეთისგან განსხვავებული ტბა: მწვანე, ლურჯი და თეთრი. სოფელ როშკიდან ტბებამდე საფეხმავლო მარშრუტი მიემართება. მარშრუტის პირველი ობიექტი მწვანე ტბაა. მას დიდი რაოდენობით ბალახებეულობის გამო აქვს მწვანე შეფერილობა. ტბის მაქსიმალური სიღრმე 3.8 მეტრია, მოცულობა 45500მ3.

მწვანე ტბის ჩრდილოეთით 200 მეტრში მდებარე ჩადაბლებაში გვხვდება ,,ლურჯი ტბა”. ამ ტბაში ზაფხულის პერიოდში ნაკადები არ შეედინება, შესაბამისად, წყალი სუფთა და ანკარაა, სწორედ ამიტომ ტბას მკვეთრად ლურჯი ფერი აქვს.

ლურჯი ტბიდან ჩრდილო-დასავლეთით, 1 კილომეტრში, მდებარეობს ,,თეთრი ტბა”, რომელიც წარმოიქმნა აბუდელაურის მყინვარის დაბოლოების ადგილას. ტბებიდან მიწისქვეშა გამოსავლებით გამოედინება ნაკადები, რომლებიც ქმნიან მდინარე აბუდელაურს.

10.გომბორის შთენილი

გომბორის უღელტეხილის საავტომობილო გზასთან ახლოს, სოფელ ვერონის ჩრდილო-აღმოსავლეთით, მდინარე გომბორულას აუზში, საავტომობილო გზასთან ახლოს, დაახლოებით 50 მ სიმაღლის საინტერესო ფორმის ბუნებრივი წარმონაქმნი დგას. გადმოცემით, ომიანობის დროს მიმდებარე სოფლების მოსახლეობა ამ გამოქვაბულებს თავშესაფრად იყენებდა. კლდე-შთენილის ჩრდილოეთი მხარე ტყით არის დაფარული. მწვერვალზე მოხვედრა სწორედ ამ კლდის გავლით შეგიძლიათ. გომბორის ქედის თხემზე მეორეული სუბალპური მდელოებია, კალთებზე – ფოთლოვანი ტყე და ფიჭვნარი. ახლოს მდებარეობს მარიამჯვრის ნაკრძალი. ეს ტერიტორია კულტურული, სათავგადასავლო და საფეხმავლო ტურების მოყვარულთა საყვარელი ადგილია.

11.თუშეთი

დღევანდელი ადმინისტრაციული დაყოფით თუშეთის მთელი ტერიტორია კახეთის მხარის ახმეტის მუნიციპალიტეტის შემადგენლობაში შედის და მოიცავს რამდენიმე სოფელს, სადაც მუდმივი მოსახლეობა შემორჩა. სოფლები განლაგებულია ზღვის დონიდან 1900 მ-დან 2400 მ-მდე. თუშეთის ცენტრად ითვლება სოფელი ომალო.

თუშეთი დღეს მთლიანად დაცულ ტერიტორიად არის გამოცხადებული. აქ ჯერ კიდევ შენარჩუნებულია კულტურული მემკვიდრეობის უნიკალური ძეგლები: უძველესი ნასოფლარები, ხალხური ხელსაქმის ნიმუშები, ყოფითი კულტურის ნივთები, ციხე-კოშკები ბუნებრივ გარემოსთან ერთად ლანდშაფტურ ღირებულებას ქმნის.

თუშეთში იხილავთ სოფელ ბოჭორნას – ევროპაში ყველაზე მაღლა მდებარე დასახლებული პუნქტს, რომელიც ზღვის დონიდან 2345 მეტრზე მდებარეობს.

 

 

მომზადებულია გიორგი დვალაშვილის წიგნის მიხედვით – ,,საქართველოს ბუნების 100 საოცრება”.

 

მასალა მოამზადა: ნინი მშვენიერიძემ

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 

სრულად ნახვა
საქართველოტურიზმი

,,The New York Times-ი” თბილისის ყველაზე მოკრძალებულ და სასიამოვნო რესტორნებს ასახელებს

3.11K views on

,,The New York Times-ის” თებერვლის გამოცემაში საუბარია თბილისში მიმდინარე კულინარიულ რევოლუციაზე და დასახელებულია ექვსი რესტორანი, რომელიც თავისი უბრალოებით მიმზიდველია, როგორც ტურისტებისთვის, ისევე ადგილობრივებისთვის. ,,შეიძლება ითქვას, რომ თბილისში ახლა განახლებული კვების კულტურა მკვიდრდება. ათამდე სტანდარტული  კერძის ნაცვლად, პოსტსაბჭოურ რესტორნებში მოკრძალებული მომხიბვლელობა ბრუნდება, რომელიც ძირითადად ორგანულ საკვებზეა ორიენტირებული,” – ნათქვამია გამოცემაში.

,,შავი ლომი”.  რესტორანი 2011 წელს მერიკო გუბელაძემ გახსნა, რომლის თქმითაც, თბილისში ნამდვილად იყო პატარა, მყუდრო რესტორნების დეფიციტი, სადაც, ამ ყველაფერთან ერთად, გემრიელი საკვების დაგემოვნებაც შეიძლებოდა. გამოცემაში ხაზი გაესვა, საბჭოთა კავშირის პერიოდიდან ნელ-ნელა მეტად მრავალფეროვანი ხდება საკვების არჩევანი სწორედ მსგავსი რესტორნების წყალობით,  ,,შავი ლომის” გახსნიდან ოთხი წლის თავზე სხვა რესტორნებმაც მიბაძეს მას და ოჯახური ტიპის მომსახურება შესთავაზეს სტუმრებს, რომლებსაც, ყველასთვის ცნობილი სუნელებით გაზავებულ კერძებთან და ხაჭაპურთან ერთად, უკვე გაცილებით ფართო არჩევანი ხვდებათ.

 

Vino Underground. თუ კი მდიდრული არომატი და ნათელი ხალიჩებით გაწყობილი სასადილოს ტიპის გარემო ,,შავი ლომის” პრივილეგიებს წარმოადგენდა, ორგანული საკვებისა და ნატურალური ღვინის მექა ,,Vino Underground-ია”. სწორედ ეს ორი რესტორანია რომელსაც ,,New York Times-ი” ქართული კულინარიული რევოლუციის პიონერად აღიარებს.

,,ბარბარესთან“. კულინარიული ციებ-ცხელება ტრადიციული ტურისტული არეალიდან, ძველი თბილისიდან  უფრო თანამედროვე უბნებშიც გავრცელდა და კიდევ ერთი ცხელი წერტილია რესტორანი ,,ბარბარესთან”, რომელიც განთავსებულია უწინ ხორცის მაღაზიის ადგილას, სადაც ჯერ კიდევ შესაძლებელია ხორცის საკიდ კაუჭებსა და გალიებში მოთავსებულ მგალობელ იადონებს მოჰკრათ თვალი. ოჯახის საკუთრებაში არსებულმა რესტორანმა მენიუ მე-19 საუკუნეში ბარბარე ჯორჯაძის მიერ დაწერილი სამზარეულოს წიგნის მიხედვით შეადგინა, რომელმაც აღნიშნა აბრეშუმის გზის გავლენა ჩვენი ქვეყნის სამზარეულოზე.

,,ეზო“. თავისუფლების მოედანზე არსებული წმინდა გიორგის მოოქროვილი ქანდაკების მახლობლად სამი რესტორანი გაიხსნა. აქაურ მშვიდ ქუჩაში სეირნობისას სტუმარს სასიამოვნოდ გააკვირვებს ,,ეზო”, რომელიც საცხოვრებლის შიდაეზოშია განთავსებული. რესტორანი ორი წლის წინ გაიხსნა.  ,,არ შეგაცდინოთ მისმა უბრალოებამ, რადგან აქ ადამიანს 25 დოლარად თამარ დედოფალივით შეუძლია ივახშმოს. ამასთანავე,  ორგანული ინგრედიენტები უმეტესწილად სწორედ მფლობელის ფერმაშია მოყვანილი,” – წერს გამოცემა.

,,აზარფეშა“. ,,ეზოდან” რამდენიმე ნაბიჯში შეგხვდებათ რიყის ქვით მოკირწყლული ადგილი, ძველი ბუტიკებითა და ხილის დახლებით, რომლებიც თითქოს სულ გაშლილია, სწორედ აქ არის რესტორანი ,,აზარფეშა”, რომელიც უკვე 4 წლისაა. რესტორნის კედლებზე გამოსახულია უძველესი სასმისები, რომელიც მას მუზეუმადაც აქცევს.  რაც შეეხება აქაურ მენიუს, ეს არის ტრადიცული და უცხო კერძების ნაზავი, რომლებიც შეგიძლიათ დააგემოვნოთ ტრადიციული პოლიფონიური ხალხური სიმღერების ფონზე.

,,პოლიფონია“. ცოლ-ქმარმა – ნინო და ლუარსაბ ტოგონიძეებმა, ამერიკელ მეგობართან, მეღვინე -ჯონ ვურდემანთან ერთად შექმნეს არაჩვეულებრივი ქართული მენიუ და სამი წლის წინ გახსნეს რესტორანი ,,პოლიფონია”, სადაც ყველაფერს ეტყობა ქართულ კულტურის კვალი, მაშინაც კი – როცა თუნდაც აქაური წიწაკა ან მზესუმზირის ზეთი პერუში ან მექსიკაშიც კი გაგრძნობინებთ თავს.

 

წყარო: The New York Times

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი

სრულად ნახვა
საქართველოტურიზმი

გუდაურში სატვირთო კონტეინერებისგან შექმნილ სასტუმროს მსოფლიო მედია ეხმაურება

6.07K views on

უკვე რამდენიმე დღეა მსოფლიოს ყურადღების ცენტრშია ორიგინალური სასტუმრო, რომელმაც სულ რამდენიმე კვირაა, რაც გუდაურში დაიწყო ფუნქციონირება – ზღვის დონიდან 2 200 მეტზე,  ახალი სასტუმრო გაიხსნა. იგი კი იმით არის გამორჩეული, რომ  სატვირთო კონტეინერებისაგანაა შექმნილი და მისი ვიზუალი პირამიდას მოგვაგონებს. სასტუმრო ,,Quadrum-ი” მინიმალისტურია და ადგილობრივ რელიეფს იმეორებს. 

კონტეინერებისგან დამზადებული 11-ნომრიანი სასტუმრო 2017 წლის 15 თებერვალს გაიხსნა, როგორც ჩანს, მან იმდენად მიიქცია ტურისტების ყურადღება, რომ სიახლემ უმალვე დააინტერესა მედია და არამარტო.

ნაგებობა ქართველი არქიტექტორების – სანდრო რამიშვილისა და ირაკლი ერისთავის ერთობლივი ნამუშევარია.

როგორც ავტორები ამბობენ, პროექტის მიზანი იყო, რომ დაეცვათ გარემო დამაზიანებელი ქმედებებისგან.

ეს პირველი სასტუმრო-ბუტიკია, რომელიც გუდაურის ტერიტორიაზე განთავსდა.

 

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 

სრულად ნახვა
საქართველოტურიზმი

საქართველო GoTravelYourWay-ს ობიექტივში მოხვდა

2.83K views on

წარმოშობით გერმანელმა მოგზაურმა და ბლოგერმა, ჯოშ ქეიჰილმა, უკვე დიდი ხანია ბევრი ადამიანის ყურადღება მიიქცია საკუთარი ბლოგით “GoTravelYourWay” და გასულ წელს საუკეთესო ბლოგერადაც დასახედა.  მისი ყურადღების ცენტრში ამჯერად  საქართველოც მოექცა, მოგზაურმა განიხილა ტურისტებისთვის 8 ყველაზე მიმზიდველი ფაქტი  ჩვენი  ქვეყნის შესახებ.

 

1)ენით აღუწერელი ბუნება – ,,არ აქვს მნიშვნელობა, საქართველოს რომელ რეგიონში იმოგზაურებთ, რადგან აქაური ბუნება ყველგან გასაოცარია. ერთ-ერთი ადგილი, რომელიც არასდროს დამავიწყდება  თუშეთის ეროვნული პარკია კავკასიონის ჩრდილოეთ კალთაზე.  აქაურობა შოტლანდიას მაგონებს, თუმცა  თუშეთი გაცილებით ლამაზი და ჯადოსნურია, ყველაზე რთულია, დაიჯერო, რომ მსგავსი ადგილი თითქმის ხელუხლებელია და ტურისტებსაც იშვიათად შეხვდებით. ვისურვებდი რომ აქ ყველაფერი სწორედ ამგვარადვე დარჩეს,” – წერს ჯოში.

 

 2)ქართველები თქვენი გულის მონადირებას შეძლებენ. მოგზაური საქართველოში ყოფნის პერიოდს თავისი ცხოვრების ყველაზე დიდი გამოცდილებას უწოდებს, რადგან სასიამოვნოდაა გაკვირვებული ახალგაცნობილი ადამიანების გულითადი და თბილი მიღებით, რაც დღევანდელ დღეს ნამდვიად იშვიათია. ,,კაცობრიობას შეუძლია ასეთი პატივისცემითა და ურთიერთკავშირით სამყარო შეცვალოს,”  – ამბობს ის.

 

3)ადგილობრივი სავაჭრო ადგილები. სხვადასხვა პროდუქტების შესაძენად მსგავსს ადგილებს ყველგან წააწყდებით, რაც ტრადიციულიცაა და მაშინაც კია სასურველი ესტუმროთ, როცა არაფრის ყიდვა არ გსურთ, მით უმეტეს, რომ ფასზეც შეგიძლიათ მოელაპარაკოთ მოხუც გამყიდველებს, რომლებმაც, როგორც წესი, ინგლისური არ იციან 🙂

 

4)თბილისი ერთ-ერთი უნიკალური ქალაქია,  რაც, ბუნებრივია, განსაზღვრა ფაქტმა, რომ საქართველო ბევრი საინტერესო კულტურის მქონე ქვეყნითაა გარშემორტყმული, რომელთა კვალი ქვეყანაშიც იგრძნობა.

„თბილისის ღამის ცხოვრებაც  არაჩვეულებრივია, მიუხედავად იმისა რომ ქვეყანა რელიგიურია. ,,მოდის ახალი თაობა რომელსაც არ გამოუვლია საბჭოთა ოკუპაცია და ქვეყანა ნელ-ნელა უხსნის კარს მსოფლიოს,“ – ნათქვამია ბლოგში.

 

5)თბილისის პატარა ქუჩები.  პატარა ხეივნებითა და ქუჩებს ქალაქში ყველგან შეხვდებით, რასაც ნამდვილად აქვს თავისი ხიბლი, რის გამოც ჯოში მას პარიზსაც ადარებს. ,,თბილისის ქუჩები პარიზსა და ვენეციას დაგავიწყებთ!“

 

6)იაფი და კარგი ლუდი. ,,ქართული ლუდი მაქსიმალურად სუფთა და გემრიელია, ქალაქის ცენტრში სულ რაღაც 2 დოლარად შეიძენთ ერთ პინტა ლუდს (პინტა-0.57ლ.) და შეგიყვარდებათ ის”, მოგზაურს, რა თქმა უნდა, არც ჩვენი სამზარეულო და ტრადიციული ხინკალი დავიწყნია.

 

7)ყაზბეგი. ,,ბუნებრივია, იკითხოთ რა არის მასში ასეთი განსაკუთრებული, რადგან  ევროპის ყველა  სოფელში არის მინიმუმ ორი ეკლესია… ამ შემთხვევაში საინტერესოა, რომ ეკლესიები ყველაზე უცნაურ ადგილებშია, სადაც ვერაფერს ნახავთ ცხვრებისა და მთების გარდა”. მოგზაურის ყურადღება ყველაზე მეტად გერგეთის სამებას მიუქცევია, რომელიც ზღვის დონიდან 2170 მ-ის სიმაღლეზე მდებრეობს.

 

8)ბათუმი. ,,უნდა ვაღიარო, რომ უფრო კარგ სანაპიროებზეც ვყოფილვარ და ქვებსაც ქვიშას ვამჯობინებ, მაგრამ ბათუმს და შავი ზღვის სანაპიროს თავისი შარმი აქვს, ეს არის მთისა და ზღვის სიახლოვე, რაც არაჩვეულებრივ კომბინაციას ქმნის. თქვენ შეგიძლიათ თხილამურებით ისრიალოთ და ორი საათის შემდეგ სანაპიროზე დაისვენოთ,” – ნათვამია დასასრულს.

 

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

 

 

სრულად ნახვა
საქართველოტურიზმი

თბილისი ტექნოტურისტებისთვის 10 ყველაზე სასურველ ქალაქს შორის დასახელდა

1.86K views on

სასიხარულო ფაქტია, რომ საქართველოში საერთაშორისო ტურისტების რაოდენობა ყოველწლიურად შესამჩნევად იზრდება. 2016 წლის მონაცემებით, ტურისტების რაოდენობამ 2,714,773 შეადგინა, რაც 2015 წლის ანალოგიურ მაჩვენებელთან შედარებით 19%-ით მეტია, რაშიც, როგორც ჩანს, საკმაოდ მნიშვნელოვანი წვლილი მიუძღვის ელექტრონული მუსიკის ფესტივალებს, რამაც მსოფლიოს მრავალი კუთხიდან მოიზიდა მსმენელი.
ახლახან გამოცემა Electronicbeats.net-მა გამოაქვეყნა ტექნოტურისტებისთვის 2017 წლის ყველაზე სასურველი 10 ქალაქის სია, მათ შორისაა თბილისიც. ,,გასულ წელს, კლუბ BASSIANI-ში ჩატარებული ღონისძიებებიდან გამომდინარე, საქართველოს დედაქალაქი მსოფლიო ყურადღების ცენტრში მოექცა. ისეთი ცნობილი დიჯეების მიერ გაზიარებული ვიდეო მასალები და ენთუზიაზმით გაჯერებული მიმოხილვები, როგორიცაა, მაგალითად, ნინა კრავიცი, არაჩვეულებრივ სურათს გვიხატავს კლუბისას, რომელშიც სრულყოფილი მელოდებით შეგიძლიათ დატკბეთ და გიბიძგებთ, რომ ესტუმროთ მას” – ნათქვამია სტატიაში.
გამოცემაში ასევე ხაზი გაესვა იმ ფაქტსაც, რომ აღნიშნული კლუბის გარდა თბილისში კიდევ მრავალი ადგილია, სადაც დაინტერესებულ პირებს შეუძლიათ, მსოფლიოში ცნობილ მუსიკოსებთან ერთად, ადგილობრივ ნიჭიერ შემსრულებლებსაც მოუსმინონ.
რჩეულ ქალაქებს შორის მოხვდა ასევე – კიევი, მოსკოვი, ვარშავა და სხვა, ეს ქალაქები უკვე დიდი ხანია, რაც მსგავსი ღონისძიებებით ანებივრებს, როგორც ადგილობრივ, ასევე უცხოელ მსმენელს. შესაბამისად ტექნოტურიზმის ცნება უკვე ფართოდაა დამკვიდრებული მსოფლიოს მასშტაბით, ტექნოტურისტებად კი მიიჩნევიან ადამიანები, რომლებიც სხვადასხვა ქალაქებში მოგზაურობენ, რათა დაესწრონ ელექტრონული მუსიკის ფესტივალებს, რაც, თავის მხრივ, რა თქმა უნდა, ხელს უწყობს ტურიზმის განვითარებასაც. საქართველოში კი ტექნოტურიზმი ჯერჯერობით ახალია, თუმცა, ამ ეტაპზეც მსოფლიო ყურადღების ცენტრში მოქცევა უკვე წინ გადადგმული ნაბიჯია და მეტ წარმატებას უწინასწარმეტყველებს მას მსოფლიო ასპარეზზე.

 

წყარო: http://electronicbeats.net/

მასალა მოამზადა: თამარ დევდარიანმა

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
საქართველოტურიზმი

,,Wizz Air-ი” ქუთაისსა და ლონდონს შორის პირდაპირ ფრენებს 105 ლარად განახორციელებს

1.9K views on

 ავიაკომპანია ,,Wizz Air-ი” ქუთაისსა და ლონდონს (ლუტონი) შორის პირდაპირ ავიამიმოსვლას იწყებს. ავიარეისების ოპერირება 18 ივნისიდან დაიწყება, კვირაში ორი სიხშირით, ყოველ ხუთშაბათსა და კვირას. ყველა ავიარეისი სრულდება 180-ადგილიანი ,,აირბას A320” და 230-ადგილიანი  ,,აირბას A321” ტიპის საჰაერო ხომალდებით.

მგზავრებს უკვე შეუძლიათ ავიაბილეთების შეძენა ავიაკომპანიის საიტზე www.wizzair.com მხოლოდ 105.99* ლარი/£ 34.99*-დან.

,,სამომავლოდ ქართველ მგზავრებს, მათი მოთხოვნების გათვალისწინებით, შევთავაზებთ კიდევ უფრო მეტ საინტერესო შესაძლებლობას“ – განაცხადა ,,ვიზეარის” კომუნიკაციების მენეჯერმა, სორინა რაციმ.

 

ავიაკომპანია ,,ვიზეარი”  მომხმარებელს სთავზობს ავიარეისებს 500 მიმართულებით 28 ბაზირებული აეროპორტიდან, რითაც ერთმანეთთან აკავშირებს 40 ქვეყნის 137 ქალაქს. ავიაკომპანიის ცნობით, ისინი მომხმარებლებს მაღალი ხარისხის სერვისს და ბილეთებს ყველაზე დაბალ ფასს სთავაზობენ, რის გამოც “ვიზეარი”, 2016 წლის 30 ნოემბრის ფინანსური წლის მონაცემებით, 23 მილიონზე მეტმა მგზავრმა აირჩია.

 

ახალგაზრდა ანალიტიკოსთა და მეცნიერთა დარბაზი – ,,დოქტრინა”

სრულად ნახვა
საქართველოტურიზმი

თბილისის მეტროში რუკები განთავსდება

1.76K views on

თბილისის სატრანსპორტო კომპანიისა და ორგანიზაცია „უბრანული ლაბორატორიის“ ინიციატივით, მეტროს ვაგონებში სამარშრუტო რუკები განთავსდება. 

პროექტის მიზანი, ჩვენი მოქალაქეებისა და ტურისტებისთვის მეტი კომფორტის შეთავაზებაა. აღნიშნული რუკები ორენოვანია და მათზე სამარშრუტო სქემასთან ერთად, დედაქალაქის ღირსშესანიშნაობებიცააა წარმოდგენილი, რაც მგზავრებს საშუალებას მისცემს მარტივად დაგეგმონ მგზავრობა. რუკების შექმნაზე კონკურსი რამდენიმე თვის წინ გამოცხადდა და მასში მონაწილეობა სხვადასხვა ეროვნების დიზაინერებმა მიიღეს. კონკურსი ორ ეტაპად ჩატარდა, ჟიურის წევრებმა კი, მერიასთან და სატრანსპორტო კომპანიასთან შეთანხმებული კრიტერიუმებით, არჩევანი ახალგაზრდა დიზაინერზე, იანა შავგანჩუკზე გააკეთეს, რომლის ნამუშევარიც გამორჩეულია დედაქალაქის ტურისტულად მნიშვნელოვანი ადგილებისა და მეტროს სამარშრუტო სქემის სინთეზით.

მერიის ტრანსპორტის საქალაქო სამსახურის უფროსის მოადგილემ, მერაბ მამულაშვილმა აღნიშნა რომ ეს რუკები დაეხმარება არა მარტო უცხოელებს, არამედ საქართველოს ნებისმიერი კუთხიდან  დედაქალაქში ჩამოსულ ადამიანებს და გაუიოლებს მათ ორიენტირებას გადაადგილების პერიოდში.

პროექტის ფინანსური მხარდამჭერია არასამთავრობო ორგანიზაცია „ორბელიანი“ და შვედეთის მთავრობა. რუკების განთავსება კი მეტროს ვაგონებში უახლოეს დღეებში დასრულდება.

 

მასალა მოამზადა: თამარ დევდარიანმა

ახალგაზრდა  ანალიტიკოსთა და მეცნიერთა დარბაზი – ,,დოქტრინა”

 

სრულად ნახვა
საქართველოტურიზმი

,,The Financial-მა” საქართველოს 5 ყველაზე პრესტიჟული  სასტუმრო დაასახელა

16.8K views on

ყოველდღიურმა  გავლენიანმა გაზეთმა ,,The Financial-მა” საქართველოს ყველაზე პრესტიჟული სასტუმროების სია გამოაქვეყნა. როგორც შესავალშივე აღინიშნა, ბოლო წლების განმავლობაში საქართველო მიმზიდველი ქვეყანა გახდა უცხოელი ბიზნესმენებისთვის და უკანასკნელი მონაცემებით, ბიზნესის კეთებით საქართველო 190 ქვეყნიდან მე-16 ადგილზეა, რაც 2017 წლისთვის ქვეყანაში ტურისტების რაოდენობის გაზრდას პროგნოზირებს.

გაზეთის რჩეული სასტუმროების სია კი ასე გამოიყურება:

  1) Georgia Palace Hotel & Spa – ხუთვარსკვლავიანი სასტუმროა, რომელიც მდებარეობს კოლხეთის დაბლობზე, ქობულეთში. აქაური უნიკალური კლიმატი შესანიშნავია გულ-სისხლძარღვთა, სასუნთქი და ნერვული სისტემების სამკურნალოდ. სასტუმროში განთავსებული 156 დახვეწილი დიზაინის მქონე, პასტელის ფერებში გაფორმებული ოთახი, ზღვის მშვენიერი ხედი და ლამაზი ეზო სასტუმროს ყველასთვის მიმზიდველ ადგილად აქცევს.

            საბჭოთა პერიოდში სასტუმროს ტერიტორია  ლავრენტი ბერიას ხელში იყო, თუმცა მისი მოსკოვში გადასვლის შემდეგ, აგარაკი სანატორიუმად გადაკეთდა, რომელსაც ეწოდა ,,საქართველო”. მალევე სანატორიუმი ერთ-ერთი ყველაზე პრესტიჟულ დასასვენებელ და შემეცნებით ადგილად იქცა.

  2)  Leogrand Batumi –  კიდევ ერთი ფეშენებელური სასტუმროა შავი ზღვის სანაპიროზე, ბათუმში. სასტუმროს აქვს სპაცენტრი, საუნა, რესტორანი და უფასო ავტოსადგომი.

 

   3)  Hôtels & Préférence Hualing Tbilisi – თბილისის ზღვასთან მდებარე ხუთვარსკვლავიანი სასტუმროა, რომელიც ძირითადად ბიზნესშეხვედრებისთვის  და დასასვენებლადაა შექმნილი. 246 კომფორტულ სასტუმრო ოთახთან ერთად სასტუმროში არის სხვადასხვა სასადილო განყოფილება, რომლებიც სტუმრებს სთავაზობს აზიურ, ევროპულ და ადგილობრივ სამზარეულოს, ასევეა დახურული საცურაო აუზი, სპორტული დარბაზი და ექვსი საკონფერენციო დარბაზი.

 

 4) Hotel Coste, Tbilisi – რუსთაველის გამზირზე, ფილარმონიის საკონცერტო დარბაზთან ახლოს მდებარე ოთხვარსკვლავიანი სასტუმროა, რომელიც 60 კომფორტულ ნომერთან ერთად, მომხმარებლებს სთავაზობს წვდომას ქალაქის ღირსშესანიშნაობებსა და სავაჭრო წერტილებთან.

 

 5)  Schuchmann Wines Chateau & Spa – თელავში მდებარე დახვეწილი დიზაინის მქონე სასტუმროა, სასტუმროშივე არსებული ვენახი სტუმრებს მშვენიერ შესაძლებლობას აძლევს  ქართული ღვინის დაგემოვნებისთვის. სასტუმროს აქვს სხვადასხვა სამკურნალო პროცედურული მომსახურებაც, მათ შორის სხვადასხვა ტიპის მასაჟი და საუნა. სტუმრებს ასევე შეუძლიათ გაერთონ მინიგოლფის, მაგიდის ჩოგბურთის ან ბილიარდის თამაშით.

წყარო:http://finchannel.com/

მასალა მოამზადა: თამარ დევდარიანმა
ახალგაზრდა ანალიტიკოსთა და მეცნიერთა დარბაზი ,,დოქტრინა”

 

სრულად ნახვა
ტურიზმი

 მედიის როლი საქართველოს ტურიზმის განვითარებაში

2.24K views on

 

ტურიზმის განვითარების მხრივ, ბოლო დეკადა საკმაოდ მნიშვნელოვანი აღმოჩნდა საქართველოსთვის. ამის განმაპირობებელი უამრავი მიზეზი არსებობს, თუმცა ნაკლებად აღინიშნება მედიის როლი, რომელიც საკმაოდ მსხვილი და მთავარი მოთამაშეა.

ის, რომ საქართველოს ტურიზმის განვითარების კუთხით საკმაოდ დიდი პოტენციალი აქვს, უდავოა, მაგრამ, როგორ უნდა მოხერხდეს ამ პოტენციალის სრული ათვისება და ამ პროცესებში რა როლო უნდა შეასრულოს მედიამ? ეს ერთ-ერთი ყველაზე მნიშვნელოვანი საკითხია. უკვე ყველა თანხმდება იმაზე, რომ მედია ხელიოსუფლების მეოთხე შტოს წარმოადგენს, რომელიც, რეალურად რომ ვიმსჯელოთ, ახდენს გარკვეული პროცესების ფორმირებას. სამწუხაროდ,  თავად მედიასაშუალებები საკმაოდ მცირე ყურადღებას უთმობენ საქართველოში მიმდინარე პროცესებს, რომლებიც ტურისტული ბაზრის გაფართოებასთან არის დაკავშირებული, არადა, ერთობლივი მუშაობა არა კონკრეტულად ერთი, არამედ ყველა მხრისთვის სასარგებლო იქნება.

საქართველოში ტურიზმის განვითარებასა და მეტი და მეტი უცხოელი ვიზიტორის ჩამოსვლაში დიდი როლი ითამაშა მაგ: ბრიტანეთის სამაუწყებლო კორპორაციამ ( ბი ბი სი), როდესაც რამდენიმე რეპორტაჟი და სარეკლამო რგოლი თავის ეთერში გაუშვა. სხვა საკითხია, თუ რა თანხა დაიხარჯა ამ დროს.

2013 წელს საქართველომ CNN-სა და BBC-ზე სატელევიზიო რეკლმების განთავსებაზე, რომელიც ქვეყნის ტურისტული პოტენციალის რეკლამირებას ისახავდა მიზნად, უარს განაცხადა,  ,,წინა ხელილსუფლებამ მხოლოდ CNN–ზე საქართველოს რეკლამირებისთვის 27 მილიონი აშშ დოლარი დახარჯა, მიღებული შედეგი კი, არცთუ ისე ეფექტურია“ – ასეთი იყო ტურიზმის ეროვნული ადმინისტრაციის ხელმძღვანელის – გიორგი სიგუას კომენტარი. საინტერესოა, იქონია თუ არა ამ ფაქტმა გავლენა ტურიზმის განვითარებაზე და რა ცვლილებები შეინიშნა ბაზარზე?

2014 წლის ნოემბერში ტურიზმის ეროვნული ადმინისტრაციის ხელმძღვანელად გიორგი ჩოგოვაძე დაინიშნა, რომელმაც მოქმედებისა და განვითარების სხვა გეგმა წარმოადგინა და მედიის ჩართულობა ერთ-ერთ მთავარ პრიორიტეტად დაისახა.

თუ ვინ არის ტურისტი/ვიზიტორი და რამდენად მნიშვნელოვანია ქვეყანაში ტურიზმის განვითარება?

ვიზიტორია ის პირი, ვინც თავისი ბუნებრივი გარემოდან კონკრეტული მიმართულებით მოგზაურობს, იქ ერთ წელზე ნაკლები ვადით რჩება და დასაქმებული არ არის. ის ვიზიტორი ვინც კონკრეტულ ადგილზე ერთ ღამეს მაინც ათევს, ტურისტად კლასიფიცირდება.

ტურიზმის განვითარება კი, ისეთი ღარიბი ქვეყნისათვის, როგორიც საქართველოა, შემოსავლის არსებობის უმთავრესი წყაროა. ტურისტების საკმაოდ დიდი მაწილი დიდ თანხას ხარჯავს, რაც პირდაპირპროპორციულად აისახება  მოსახლეობის სოციალურ მდგომარეობაზე – მოგეხსენებათ, რომ არსებობს უამრავი საკვები დაწესებულება, სასტუმრო, ჰოსტელი და ა.შ. , რომელსაც ხშირად მიმართავენ ტურისტები.

მომსახურების სახეობებს შორის ტურიზმის ინდუსტრია ერთ-ერთი ყველაზე მსხვილი და სწრაფად მზარდია მთელს მსოფლიოში. მოგზაურობისა და ტურიზმის მსოფლიო საბჭოს მონაცემები, რომლებიც ყოველწლიურად იზრდება, გვამცნობს, რომ ამ დარგის პირდაპირმა კონტრიბუციამ მთლიან მსოფლიო შიდა პროდუქტებში ორ ტრილიონს გადააჭარბა.

ტურიზმის სექტორს განსაკუთრებული მნიშვნელობა გააჩნია საქართველოსთვის. ჩვენი ქვეყანა სხვა განვითარებადი ქვეყნების მსგავსად იძენს ფიზიკურ კაპიტალსა და ტექნიკურ გამოცდილებას, ამ ორ მნიშვნელოვან ფაქტორთან ერთად, საქართველო მდიდარია ისტორიული ღირსშესანიშნაობებით, ორიგინალური ტრადიციებითა და სხვა თავისებურებებით.

ცოტა რამ ჟურნალისტიკისა და მისი როლის შესახებ – თანამედროვე ქართული მასმედია, შეიძლება ითქვას, რომ თავის განვითარებას ახლა იწყებს. მისი ისტორია საბჭოთა კავშირის დაშლის შემდეგ. 90 – იანი წლების დასაწყისიდან იწყება. დაახლოებით 17-18 წელია, რაც დამოუკიდებელმა ქართულმა მედიამ არსებობა დაიწყო.

საქართველოში, ისევე როგორც ალბათ მთელს მსოფლიოში,   აუდიტორიის მსხვილი ნაწილი ტელევიზიას ჰყავს. თუმცა, რასაკვირველია რადიოსა და პრესას ჰყავს საკუთარი სეგმენტი, მაგრამ გაცილებით ნაკლები რაოდენობის. თუმცა, ონლაინმედია პირველობას არავის უთმობს.

მსოფლიოში მედიის როლი დღითიდღე იზრდება, დღეს ეს არის საშუალება, რომელიც ინფორმაციის ყველაზე სწრაფი გადამცემი და გამავრცელებელია.

მედიას გააჩნია ის ბერკეტები, რომელიც ქვეყანაში ეკონომიკური ზრდის ხელშემწყობიც კი შეიძლება იყოს. თუმცა, დღეს სხვა რეალობის წინაშე ვდგავართ. როგორც ჩანს, მე-19 საუკუნის საქართველოში ჟურნალისტიკა უფრო ასრულდებდა საკუთარ როლს, ვიდრე დღეს.  დღესდღეობით, ქართული მედია სავსეა არაფრისმომცემი და მდარე ხარისხის პროდუქციით. არადა, ამ სექტორს იმაზე დიდი ფუნცია და შესაძლებლობები აქვს, ვიდრე ჩვენ წარმოგვიდგენია.

ტურიზმს რომ დავუბრუნდეთ, სტატისტიკა საკმაოდ ბევრი დასკვნის გაკეთების საშუალებას მოგვცემს. ტურიზმის ეროვნული ადმინისტრაციის ინფორმაციით, 2012 წელს საქართველოში 4.4 მილიონი ვიზიტორი შემოვიდა, რის შედეგადაც ვიზიტორების რაოდენობა წინა წლის მაჩვენებელთან შედარებით 57%-ით გაიზარდა. 2014 წელს პროცენტულმა ზრდამ 2% შეადგინა. მიმდინარე წლის იანვარში კი, 2014 წლის ანალოგიურ პერიოდთან შედარებით, ვიზიტორთა რიცხვი 3%-ით, ხოლო თებერვალში 1%-ით შემცირდა.

რაც შეეხება ქვეყანაში შემოსული ტურისტების რაოდენობას, 2012 წელს ტურიზმი 36%-ით გაიზარდა. 2014 წელს ტურისტთა რაოდენობის ზრდამ 7% შეადგინა.  შინაგან საქმეთა სამინისტროს ინფორმაციით, მიმდინარე წლის (იანვარ-თებერვლის) მონაცემებით, ტურისტთა რაოდენობა წინა წლის ანალოგიურ პერიოდთან შედარებით 7.5 %-ით შემცირდა

2016 წელს ქვეყანაში გაზრდილი ვიზიტორების რაოდენობა მივიღეთ, თუმცა, გულწრფელად რომ ვთქვათ, ეს თურქეთში არსებული მძიმე ვითარების ბრალია, რამაც ამ ქვეყანაში წამომსველელების გეზი საქართველოსაკენ მომართა. ამას დამატებული რამდენიმე ცნობილი ვარსკვლავის ჩამოსვლა და პროექტი ,,ჩეკ ინ ჯორჯია“ და წლის ბოლომდე, სავარაუდოდ, ქვეყანა 5-6  მილიონამდე ვიზიტორს დაითვლის (ასეთია ექსპერტების პროგნოზი).   ამ მონაცემებით, პირველი 9 თვის მანძილზე საქართველოში 2 156 731 ტურისტი ჩამოვიდა, რაც 19,5%-ით აღემატება 2015 წლის ანალოგიურ მაჩვენებელს.

ზოგადად, კონფლიქტებს ტურიზმზე ძალიან დიდი ზეგავლენა აქვს, თუმცა, ამის მეორე მხარეა ის, თუ რას აკეთებს ამ დროს მედია და რამდენად სწორად აშუქებს მიმდინარე მოვლენებს, რომელთა გაშუქებაზეც არის დამოკიდებული მრავალი ქვეყნის ეკონომიკური მდგომარეობის განვითარება.

დღეს მსოფლიოში მიმდირე 40-მდე შეიარაღებული კონფლიქტია, ამ კონფლიქტების შედეგია 50 მილიონზე მეტი იძულებით გადაადგილებული პირი. მაგრამ, კონფლიქტის გარდა იძულებით გადაადგილებული პირებისა სხვა შედეგიც მოჰყვება, მათ შორის ეკონომიკური, რაშიც, გარდა ინფრასტრუქტურული ზარალისა შეარაღებული შეტაკების ზონებში, დიდი ზარალი ადგება ტურიზმს და შესაბამისად, შრომით ბაზარს.

კონფლიქტის დარეგულირებამდე დაძაბული მდგომარეობა ნაწილდება გაცილებით დიდი არეალით. სწორედ ამიტომ, ხშირად ზარალდება კონფლიქტის ზონიდან მოშორებით არსებული ტურისტული ზონები. ამას ემატება გატაცების ფაქტები, რომელსაც იყენებენ ტერორისტული ორგანიზაციები. 2015 წელს დაფიქსირდა ტურისტების გატაცების უამრავი ფაქტი, ისეთ ქვეყნებში როგორებიც არის ფილიპინები, ალბანეთი, არგენტინა, ტაილანდი, ეგვიპტე და სხვა.

ზემოთ ჩამოთვლილი ქვეყნები ცნობილია თავისი ტურისტული მიმზიდველობით, კულტურის ძეგლებით, ბუნებით და რაც ძალიან მნიშვნელოვანია, მომსახურების სერვისით. გლობალიზაციამ და ტექნოლოგიურმა განვითარებამ ხელი შეუწყო ინფორმაციის სწრაფ გავრცელებას. როდესაც ტურისტი არჩევს ქვეყანას ან ქალაქს, სადაც  სურს გაატაროს დასვენების პერიოდი, უპირველეს ყოვლისა, სტუმრობს საძიებო სისტემებს, ეცნობა რეიტინგულ და საინფორმაციო ვებგვერდებს, იღებს ინფორმაციას ტელევიზიიდან. ამის გათვალისწინებით,  ტურისტის გადაწყვეტილება დამოკიდებულია მიღებულ ინფორმაციაზე.

სწორედ არჩევანის პროცესში ახდენს უდიდეს ზეგავლენას მასმედია ტურისტის არჩევანზე, საინფორმაციო სააგენტო ,,ტელეგრაფის“ ცნობით. ბოლო რამდენიმე წელიწადში ეგვიპტეში საგრძნობლად იმატა ტურისტების გატაცების ფაქტებმა. არსებული სტატია ძალიან ბუნდოვანია და ქმნის შთაბეჭდილებას, რომ ამ ეტაპზე ეგვიპტეში ჩასვლა სარისკოა. მაგრამ თუ დავაკვირდებით ,,ალ ჯაზირას“ 2013 წლის 22 მარტს გამოქვეყნებულ სტატიაში, „Tourists kidnapped near Egypt beach resorts“, წავიკითხავთ, რომ აღნიშნული ტურისტები მოგზაურობდნენ პროვინცია ტაბაში  და  დაარღვიეს  ეგვიპტის და ისრაელის საზღვართან სახიფათო ზონა.

რაც შეეხება საქართველოში მიმდინარე კონფლიქტს, მაგალითად, 2008 წლის აგვისტოს ომის შესახებ ვერ ვიტყვით, რომ საინფორმაციო საშუალებებმა არასწორად გაავრცელეს ინფორმაცია, რადგანაც არსებული სიტუაცია ხალხისათვის მართლაც საშიში იყო. მიუხედავად იმისა, რომ ამან უდიდესი ეკონომიკური კოლაფსი გამოიწვია, მედია ვალდებული იყო, არსებული ვითარების შესახებ ამომწურავი ინფორმაცია მიეწოდებინა საზოგადოებისათვის.

როგორი უცნაურიც არ უნდა იყოს, გაეროს მსოფლიო ტურიზმის ორგანიზაციის 2013 წლის ანგარიშის (World Tourism Barometer, January 2014) მიხედვით, ვიზიტორების ზრდის 21.2%-იანი მაჩვენებლით საქართველო მოწინავე ქვეყანაა ევროპაში. 2013 წელს, ვიზიტორთა რაოდენობის პროცენტული ზრდის ყველაზე მაღალი მაჩვენებლის მქონე ევროპისა და ცენტრალური აზიის ქვეყნების სია შემდეგნაირად გამოიყურება: ( ყაზახეთი  21,9 %, საქართველო 21,2, ბოსნია და ჰერცოგოვინა 21,0%, ისლანდია – 17,5 %, საბერძნეთი 15,3% და ა.შ.

2006 წლიდან დღემდე ვიზიტორთა რაოდენობა ყოველწლიურად იზრდება. ნიშანდობლივია, რომ 2008 წლის მსოფლიო ეკონომიკური კრიზისის დროს, როდესაც მსოფლიო მასშტაბით ტურისტული აქტივობები შენელდა, საქართველოში ვიზიტორთა რაოდენობა  23%-ით გაიზარდა. საქართველოს ტურიზმის ეროვნული ადმინისტრაციის 2013 წლის ანგარიშის მიხედვით, საქართველოს ბოლო 5 წლის მანძილზე, ევროპის დანარჩენ ქვეყნებთან შედარებით, ვიზიტორთა რაოდენობის ზრდის ყველაზე მაღალი მაჩვენებელი აქვს.

ტურიზმი საქართველოს ეკონომიკის ერთ-ერთი მნიშვნელოვანი ნაწილია, მასზე საქართველოს მშპ-ის დაახლოებით 7% მოდის. ამასთანავე ტურიზმიდან მიღებული შემოსავლები უცხოურ ვალუტაშია ნომინირებული, რის გამოც ტურიზმი საქართველოში უცხოური ვალუტის შემოდინების ერთ-ერთ მნიშვნელოვან წყაროს წარმოადგენს. 2016 წლის პირველი ორი კვარტლის მონაცემებით, საერთაშორისო ტურიზმიდან შემოსავალმა 101 მილიონ აშშ დოლარს გადააჭარბა.

ტურიზმის შემცირება ეკონომიკის მრავალი სექტორის შემცირებაზე აისახება. ყველაზე აშკარად ეს შემცირება სასტუმროების, რესტორნებისა და ტრანსპორტის  სექტორზე აისახება.

ბოლო პერიოდში ნათელი გახდა, რომ მნიშვნელოვანია სოციალური მედიის როლი მარკეტინგისა და  ტურიზმის განვითარების კუთხით. სოციალური ქსელების მნიშვნელობა იმდენადაა გაზრდილი, რომ ამ სფეროს გამოუყენებლობა არ შეიძლება. ისიც  გასათვალისწინებელია, რომ  მწერლები თუ ჟურნალისტები და ბლოგერები, მხოლოდ ერთი გამოცემისთვის არ წერენ და ხშირად თითოეული მათგანი რამდენიმე ჟურნალსა და ინტერნეტგამოცემაში აქვეყნებს  ტექსტებს. მათი ნაწერები კი, ხშირ შემთხვევაში,  მოდის განმსაზღვრელია – თუ რომელ ქვეყანაში სჯობს ამა თუ იმ წელს ვიზიტი.

როგორი დაუჯერებელიც არ უნდა იყოს მავანთათვის, მედიას ზემოქმედების საუკეთესო უნარი აქვს და იგი, სამწუხაროდ თუ საბედნიეროდ, ადამიანების ცნობიერების ფორმირებას უწყობს ხელს. მაშინ, როდესაც ტურიზმით დაინტერესებული ადამიანი რომელიმე ,,წონიან“ მედიასაშუალებაში აღმოაჩენს ქვეყანას, რომელიც დადებით კონტექსტშია მოხსენიებული, იღებს მესიჯს, რომელიც მას ამ ქვეყნაში წამოსვლისკენ უბიძგებს.

დღეს მსოფლიოში არცერთი მთავარი მოვლენა არ რჩება მედიის ყურადღების მიღმა. 2008 წელს საქართველოში მომხდარმა ომმა ბევრი უცხოური მედიასაშუალება დაააინტერესა და საკითხი ფართოდ გაშუქდა, მსოფლიოში მრავალმა ადამიანმა შეიტყო, რომ ქვეყანაში არასტაბილური ვითარება იყო და უამრავი ვიზიტი გაუქმდა. ეს, რა თქმა უნდა, ძალიან ნორმალური და აბსოლუტურად რელევანტური გადაწყვეტილება იყო ვიზიტორების მხრიდან, თუმცა ქვეყანა ძალიან დიდი ეკონომიკური ზარალი განიცადა ტურიზმის შემცირებით, სხვა, იმ დროისათვის უფრო მნიშვნელოვან პრობლემებს თავი რომ გავანებოთ.

მას შემდეგ, საქართველოში მიმდინარე ამბები ბევრად უფრო ფართოდ შუქდება და შეიძლება ითქვას, რომ საქართველო  უცხოური მედიისათვის საკმაოდ საინტერესო ქვეყანაა, თუმცა, ვერ ვიტყვით, რომ ყველა რეპორტაჟი თუ სტატია საქართველოს დადებით კონტექსტში მოიხსენიებას ემსახურება. ბოლო პერიოდის განმავლობაში, უცხოურ მედიასაშუალებებში (მაგ: The Washingtom Post), საქართველოში სიტყვის თავისუფლებისა და ადამიანის უფლებების დარღვევის ფაქტებზე საუბრობენ.  საინტერესოა, მიუძღვით თუ არა წვლილი მსგავს მედიაპროდუქტებს ტურიზმის განვითარების შეფერხებაში?  ტურისტების რაოდენობის შემცირება,  ბევრ სხვა მიზეზთან ერთად, ამასაც შეიძლება დაბრალდეს. ადამიანების უმეტესობა სხვის მოსაზრებას ეყრდნობა და სასურველი ქვეყნების არჩევაში სწორედ მედია ეხმარება – მოგეხსენებათ, რომ, ბოლო პერიოდში ამ კუთხით, სოციალური მედია ყველაზე მეტად გააქტიურდა.

მიუხედავად გიორგი სიგუას განცხადებისა, დღეს უცხოურ მედიასაშუალებებში არაერთი ვიდეორგოლი გადის საქართველოს შესახებ, რადგანაც, როგორც გამოცდილებამ გვიჩვენა, მედიაში ჩადებული ფულის ასმაგად ამოღება შეიძლება და გაღებული რამდენიმე მილიონი (რომელიც ჩვენნაირი ღარიბი ქვეყნისათვის სულაც არ წარმოდგენს ცოტა თანხას), ღირს, რადგან შედეგი უფრო ეფექტურია.

საინტერესოა, ამ კუთხით რა ხდება დღეს?

როგორც გიორგი ჩოგოვაძე ამბობს, მას შემდეგ, რაც მიიღების სიგნალები ტურიზმის შემცირების შესახებ, სასწრაფო წესით შეიქმნა კრიზისის მენეჯმენტის საბჭო, სადაც განისაზღვრა აღნიშნულ გარემოებებში ბაზრების დივერსიფიკაციის აუცილებლობა და შედეგად ჩამოყალიბდა სამოქმედო გეგმა. გეგმის მიხედვით აქცენტი იმ საერთაშორისო აქტივობებზე გაკეთდა, რომელიც ახალი ბაზრებიდან მოგზაურების გაზრდას გაუკეთებდა სტიმულირებას და უკვე ათვისებულ ბაზრებზე სიტუაციას გამოასწორებდა.

საერთაშორისო მოგზაურების მოსაზიდად განხორციელდა შემდეგი ღონისძიებები: მარკეტინგული კამპანიები რამდენიმე მიზნობრივ ბაზარზე (რუსეთი, უკრაინა, ბელორუსი, ყაზახეთი, აზერბაიჯანი, ლატვია, უნგრეთი, ისრაელი თურქეთი და სხვ.), მარკეტინგული კამპანიები საერთაშორისო მედიის საშუალებით (CNN; Euronews), 300-მდე  მეტი ჟურნალისტის მოწვევა, მედიაფორუმი, მოლაპარაკების წარმოება ახალი პირდაპირი რეისების დასანიშნად და არსებულის გასაზრდელად.

განხორციელებულ პროექტებზე საუბრისას, უნდა ითქვას ისიც, რომ ადმინისტრაციაში შეიქმნა ინტერნეტრეკლამის ჯგუფი, განახლდა  საიტი სადაც შესაძლებელია ნებისმიერი ინფორმაციის მოპოვება  საქართველოს შესახებ.

ასევე ხაზგასასმელია, რომ მოვხვდით რამდენიმე მნიშვნელოვან რეიტინგში. განსაკუთრებით კი ნიშვნელოვანია, რომ National Geographic-მა 50 ქვეყანას შორის მოგვახვედრა და რამდენიმემილიონიან მკითხველს საქართველოში მოგზაურობა ურჩია. ასევე გამოქვეყნდა  სტატიები New yourk Times-ში, გარდიანში, CNN-მა სოციალურ ქსელში სვანეთის ფოტოები ატვირთა, სტატია დაიბეჭდა გავლენიან ამერიკულ გამოცემა ,,ბლუმბერგში“, სადაც გამოცემის მიმომხილველმა მკითხველს საქართველოში მოგზაურობა და ქართული ღვინის დაგემოვნება ურჩია. ქართული ღვინისა და კერძების შესახებ სტატია დაიბეჭდა Washington Post-შიც. სვანეთის სოფლებს BBC-ის ჟურანლსიტმა ევროპის ძლიერი და ლეგენდარული სოფლები უწოდა და სტატია გამოაქვეყნა.

მნიშვნელოვანი მოვლენაა შიდა ტურიზმის სტიმულირების კამპანია – ,,გაიცანი საქართველო“, რომელშიც  ძალიან ბევრი  საზოგადოებისთვის ცნობილი ადამიანი არის ჩართული, დამზადებულია სპეციალური ვიდეორგოლები, რომელიც ტელეარხებზე ტრიალებს, ტარდება პრესტურები და ეს ყველაფერი, ჯამში სწორედ ტურიზმის განვითარებას ემსახურება.

საქართველოს რეკლამა  გავიდა   Euronews-ზე, ეს არის 30-წამიანი საიმიჯო რგოლი ქვეყნის შესახებ, მოგეხსენებათ რომ Euronews-ს ჰყავს 400  მილიონიანი აუდიტორია, მაუწყებლობს 14 ენაზე, 155 ქვეყანაში და ეს  საკმაოდ ეფექტური გზაა განვითარების კუთხით. კლიპი  21 კვირის განმავლობაში ტრიალდებდა Euronews-ზე.

გარდა ამისა, საქართველოს საიმიჯო რგოლი ტრიალებდა მსოფლიოში ერთერთ ყველაზე ცნობილ, რეიტინგულ და პოპულარულ ტელეარხზე CNN-ზე, რომელაც ასევე რამდენიმე ასეულ მილიონიანი აუდიტორია ჰყავს.

წელს მიმდინარე წელს ტურიზმის ეროვნულმა ადმინისტრაციამ ონლაინ–კამპანია ჩაატარა მსოფლიოს 16 ქვეყანაში.

საქართველომ მონაწილეობა მიიღო 14 საერთაშორისო და ადგილობრივ ტურისტულ გამოფენაში, ხოლო საქართველოს 434 უცხოელი ჟურნალისტი და 238 ტუროპერატორი ესტუმრა.

ამასთანავე, იგეგმება დამატებით მრავალი პრეს-და გაცნობითი ტურები წამყვანი საერთაშორისო ჟურნალისტებისა და ტუროპერატორებისათვის. ეს ყველაფერი კი, საბოლოო ჯამში, ხელს უწყობს საქართველოს პოპულარიზაციას და ცნობადობის გაზრდას.

ამჟამად ტურიზმის ეროვნულ ადმინისტრაციას საკმაოდ სწორი გეზი აქვს არჩეული. ის, რომ საქართველოში ტურიზმის განვითარების შემაფერხებელი არაერთი ფაქტორი არსებობს, უდავოა. ჩვენ ჯერ კიდე ვდგავართ ინფრასტრუქტურული, მენტალური თუ სხვა პრობლემების წინაშე, თუმცა, მედიას გააჩნია ფუნქცია, რომელიც საზოგადოებას აჯერებს, თუნდაც ირეალურ ფაქტებს. მიუხედავად იმისა, რომ ბევრი რამ მოუწესრიგებელია, დღეს ყველა ერთხმად აღნიშნავს იმას, რომ საქართველო ტურისტული თვალსაზრისით ძალიან საინტერესო და  ეგზოტიკური ქვეყანაა. ეს ყველაფერი კი სწორი ფორმით უნდა მიეწოდოს მსოფლიო საზოგადოებას. შეიძლება ამას ამ ეტაპზე მილიონები დასჭირდეს, თუმცა, უნდა გავითვალისწინოთ, რომ  ყველა ნაბიჯი  ჩადებული თანხის გაასმაგების საშუალებას იძლევა, პოტენციალის გამოუყენებლობა კი – ყველაზე დიდი დანაშაული იქნება.

გამოყენებული ლიტერატურა:

http://cnn.it/2dwfU4W   ( ბოლო ნახვა, 22 ოქტომბერი)

http://wapo.st/2ei29bE  ( ბოლო ნახვა, 22 ოქტომბერი)

 ( ბოლო ნახვა, 22 ოქტომბერი)

 ( ბოლო ნახვა, 22 ოქტომბერი)

   ( ბოლო ნახვა, 22 ოქტომბერი)

(ბოლო ნახვა, 22 ოქტომბერი)

(ბოლო ნახვა, 22 ოქტომბერი)

მასალა მოამზადა: ნატალია ჯალაღონია
ახალგაზრდა ანალიტიკოსთა და მეცნიერთა დარბაზი “დოქტრინა”

 

 

 

 

 

სრულად ნახვა
1 … 5 6 7
Page 7 of 7