კატეგორიის გარეშე

ყველაფერი, რასაც ხელით ვეხებით, საკვები, ბაქტერია, ჭუჭყი, ადვილად ხვდება ჩვენს ტელეფონებზე, რის გამოც ტელეფონის ეკრანი მიკრობებით ივსება. ახალი კორონავირუსის გავრცელებასთან ერთად კიდევ უფრო აქტუალური გახდა კითხვა, როგორ გავუკეთოთ დეზინფექცია ჩვენს მობილურ ტელეფონებს.
აღსანიშნავია, რომ ბოლო პერიოდში მნიშვნელოვნად იმატა მობილური ტელეფონის გასაწმენდი მოწყობილობის ე.წ. PhoneSoap-ის გაყიდვებმა, რომელსაც ამავე სახელწოდების კომპანია უშვებს.
მოწყობილობა მიკრობების, მათ შორის ე-კოლისა და სალმონელას, 99,9 პროცენტს, ულტრაიისფერი სხივების – UV-C – საშუალებით კლავს.
პროდუქტი COVID-19-ზე ჯერჯერობით არ დაუტესტავთ, თუმცა, დამტკიცებულია, რომ ის A ტიპის ვირუსს H1N1-ს კლავს.
ჰარვარდის სამედიცინო სკოლის მეცნიერი, მია ლიბერმანი ახადებს, რომ ჩვენი მობილური ტელეფონების ზედაპირზე ხვდება ისეთი პათოგენები, რომლებიც, შესაძლოა, ანტიბიოტიკების მიმართ რეზისტენტულ ბაქტერიებსაც შეიცავდნენ. ეს მიკრობები განსაკუთრებით საშიშია დაბალი იმუნიტეტის მქონე ადამიანებისთვის.
კომპანიამ მარტის დასაწყისისთვის პროდუქტი მთლიანად ამოყიდა და გაყიდვებით მიღებული შემოსავალი გასულ თვეს 20-ჯერ გაიზარდა. ამჯერად PhoneSoap-ი შეკვეთების მიღებაზე გადავიდა.

წყარო: cnn.com
მასალა მოამზადა: თამარ ტაბატაძემ
ახალგაზრდა ანალიტიკოსთა და მეცნიერთა დარბაზი ,,დოქტრინა”

ჩინეთში ახალი კორონავირუსის შემთხვევები რეკორდულად იკლებს, ბოლო 24 საათში ქვეყანაში ვირუსით ინფიცირების 4 და გარდაცვალების 1 ფაქტი დაფიქსირდა. დღეის მონაცემებით ჩინეთში კორონავირუსი 14 000-ზე მეტ ადამიანს აქვს. გამოჯანმრთელებულთა რიცხვი 62 000-საჭარბებს.

ახალგაზრდა ანალიტიკოსთა და მეცნიერთა დარბაზი ,,დოქტრინა“

საქართველოში კორონავირუსით დაინფიცირების 25 შემთხვევაა დადასტურებული. დაინფიცირებულთა შორის ერთი ბავშვია. მედიკოსების ინფორმაციით 12 წლის პაციენტის ჯანმრთელობის მდგომარეობა დამაკმაყოფლებელია.
კორონავირუსთან დაკავშირებით მოქმედი უწყებათაშორისი საბჭოს გადაწყვეტილებით, საქართველოს მასშტაბით სასწავლო დაწესებულებებში გამოცხადებული არდადეგები 1-ელ აპრილამდე გახანგრძლივდა.
რამდენად დიდია „კოვიდ-19-ით“ ბავშვების დაინფიცირების რისკი და რამდენად საშიშია ის ბავშვებისთვის?
ოფიციალური სტატისტიკის თანახმად, ჩინეთში კორონავირუსით დაინფიცირებული პაციენტების 2,4 პროცენტი 18 წლამდე ასაკის პირია, აქედან, 1 პროცენტი – 9 წლამდე ასაკის ბავშვია. ვირუსის მძიმე სიმპტომები დაინფიცირებული ბავშვების მხოლოდ 2,5 პროცენტს ახასიათებდა.
რა სიმპტომები ახასიათებთ ახალი კორონავირუსით დაინფიცირებულ ბავშვებს?
ჩინელი ექიმები აცხადებენ, რომ დაინფიცირებულ ბავშვებს ხშირად აქვთ ხველა, სუნთქვის გართულება, გამონადენი ცხვირიდან, დიარეა და თავის ტკივილი. მაღალი ტემპერატურა დაინფიცირებული ბავშვების ნახევარზე ნაკლებს აღენიშნება, უმეტესობას კი არანაირი სიმპტომი აქვს. ჩინეთში დაინფიცირებული ბავშვები ერთ-ორ კვირაში გამოჯანმრთელდნენ.
აღსანიშნავია, რომ ახალშობილებსაც კი, რომლებიც მძიმე რესპირატორული დაავადებების მიმართ უფრო მგრძნობიარეები არიან, ინფექციის შედარებით მსუბუქი ფორმა აღენიშნებოდათ.
მიუხედევად იმისა, რომ ბავშვებს, უმეტეს შემთხვევაში, შედარებით მსუბუქი სიმპტომები აქვთ, ექსპერტები მიიჩნევენ, რომ ისინი „კოვიდ 19“-ის გავრცელებაში მნიშვნელოვან როლს ასრულებენ. ბავშვები მოძრავები არიან, ჯგუფ-ჯგუფად იკრიბებიან და ვირუსს ადვილად ავრცელებენ. ამიტომ, სკოლის ასაკის ბავშვებში გრიპის პრევენცია საზოგადოებაში გრიპის პრევენციის ეფექტური სტრატეგიაა. მედიკოსების შეფასებით, იმ პირობებში, როცა არ არსებობს „კოვიდ-19“-ის საწინააღმდეგო ვაქცინა, სკოლების დროებით დახურვას ვირუსის გავრცელების თავიდან აცილების კუთხით დიდი მნიშვნელობა აქვს.

წყარო: sciencealert.com
ახალგაზრდა ანალიტიკოსთა და მეცნიერთა დარბაზი ,,დოქტრინა”

„ბიბისის“ ინფორმაციით, ჩინეთი კორონავირუსის წინააღმდეგ ბრძოლისთვის იტალიას დახმარებას უგზავნის.

გავრცელებული ინფორმაციით, ჩინეთი იტალიას 100 000 სახის ნიღაბს, 20 000 დამცავ უნიფორმას 1000 სავენტილიაციო საშუალებას გაუგზავნის.

ჩინეთის მედიის ინფორმაციით, ჩინეთის წითელი ჯვრის საზოგადოება იტალიაში ჩინელი ექიმების ჯგუფის გაგზავნის საკითხსაც განიხილავს.

1tv.ge

ახალგაზრდა ანალიტიკოსთა და მეცნიერთა დარბაზი ,,დოქტრინა“

იტალიის პრემიერ-მინისტრის გადაწყვეტილებით, სრულიად იტალიის ტერიტორიაზე კარანტინი დაწესდება.. ამის შესახებ იტალიის პრემიერ-მინისტრმა სატელევიზიო მიმართვაში განაცხადა. ეს ზომა 10 მარტს ამოქმედდება და 3 აპრილამდე იქნება ძალაში.

ჯუზეპე კონტეს განცხადებით, დღეს მთლიანად იტალია ლომბარდიის რეგიონის მსგავსია.

„ახლა დრო არ გვაქვს. ინფექცია მზარდად ვრცელდება. კიდევ უფრო მკაცრ ზომებს მივიღებთ. ჩენი ჩვევები გვერდზე უნდა გადავდოთ იტალიის სასარგებლოდ: ყველანი სახლში დარჩით. გადაადგილება შესაძლებელი იქნება მხოლოდ იმ შემთხვევაში, თუ ეს სამუშაოს, საგანგებო სიტუაციას, ან ჯანმრთელობას უკავშირდება“, – განაცხადა იტალიის პრემიერ-მინისტრმა.

მისივე თქმით, სასწავლო პროცესი სკოლებში და უნივერსიტეტებში 3 აპრილამდე შეჩერდება. ასევე შეჩერდება ყველა სახის მასობრივი ღონისძიებების, სპორტული ტურნირების ჩატარება, მათ შორის იტალიის საფეხბურთო ჩემპიონატის.

ახალგაზრდა ანალიტიკოსთა და მეცნიერთა დარბაზი ,,დოქტრინა“

ჩინეთში, უჰანში მიიღეს ახალი კანონი, რომელიც ველური ცხოველების ჭამას კრძალავს. ინფორმაციას ამის შესახებ უცხოური მედია ავრცელებს.

გასულ თვეს მთავრობამ დაბლოკა ველური ცხოველებით ვაჭრობა, თუმცა კანონი ბოლომდე მიღებული არ იყო. კანონი ეხება ყველა გარეულ ცხოველს, მათ შორის გადაშენების საფრთხის წინაშე მყოფ და წყლის ველურ სახეობებს. კანონი ასევე ვრცელდება გარეული ცხოველებით მოვაჭრეებზე.

ოფიციალური წარმომადგენლების თქმით, არცერთ ორგანიზაციას და პირს არ აქვს უფლება აწარმოოს, დაამუშავოს, გამოიყენოს ან ჩაატაროს სამუშაოები ველური ბუნების ცხოველებთან დაკავშირებით, რაც დოკუმენტით არის აკრძალული.

მასთან დაკავშირებული ნებისმიერი ნადირობა, მოშენება, ტრანსპორტირება, ვაჭრობა ან ფოსტა უკანონოა.

კანონის მიხედვით, სამეცნიერო და სამედიცინო ჯგუფებმა მკაცრი შემოწმება უნდა გაიარონ, თუ ისინი ცხოველების გამოყენებას სხვა მიზნით დააპირებენ.

ჩინეთის დაავადებათა კონტროლისა და პრევენციის ცენტრის მეცნიერები ირწმუნებიან, რომ ადამიანებში ვირუსი სწორედ ველური ცხოველებიდან გავრცელდა. იანვრის დასაწყისში უჰანის ზღვის პროდუქტების ბაზარი ეპიდემიის გამო დაიხურა.

ახალგაზრდა ანალიტიკოსთა და მეცნიერთა დარბაზი ,,დოქტრინა“

ჩინეთმა შესაძლოა 100 ათასი იხვი გაგზავნოს მეზობელ პაკისტანში, სადაც კალიების შემოსევაა. ამის შესახებ BBC წერს.

გამოცემის ინფორმაციით, მომავალ კვირას ჩინეთის მთავრობა პაკისტანში ექსპერტების ჯგუფს გაგზავნის, რომელიც მწერებთან ბრძოლის მიზანმიმართული პროგრამის შექმნაზე იმუშავებს. გეგმის ეფექტიანობის დასადგენად ტესტები ჩინეთშიც ჩატარდება. ფრინველებს პაკისტანში მხოლოდ ამ პროცედურების შემდეგ გაგზავნიან. ექსპერტების თქმით, ერთ იხვს დღეში 200 კალიაზე მეტის შეჭმა შეუძლია, რაც პესტიციდების გაფრქვევაზე ეფექტურია.

მთავრობის გეგმამ ჩინეთის სოციალური ქსელები გაახალისა. „წინ, იხვებო! იმედია ცოცხლები დაბრუნდებით“, – დაწერა Twitter-ის მსგავსი მიკრობლოგის Weibo-ს ერთ-ერთმა მომხმარებელმა. „გმირი იხვები მტრის პირისპირ“, – წერს მეორე.

თუმცა სპეციალისტთა ნაწილი ამ ინიციატივას სკეპტიკურად უყურებს. მათი თქმით, იმის მიუხედავად, რომ იხვებს კალიებთან საბრძოლველად უძველესი დროიდან იყენებდნენ, შესაძლოა მათ პაკისტანში გაუჭირდეთ, რადგან წყალი სჭირდებათ, იქ კი ძირითადად უდაბნოში მოუწევთ „მუშაობა“. საბოლოო გადაწყვეტილებას ჩინეთის მთავრობა ტესტირების დასრულების შემდეგ მიიღებს.

ახალგაზრდა ანალიტიკოსთა და მეცნიერთა დარბაზი ,,დოქტრინა“

იანდექს ტაქსი ადასტურებს, რომ მომხმარებელთა მონაცემებს ძალოვან და საგამოძიებო სტრუქტურებს აწვდის. ამის შესახებ რუსულ გამოცემა მედიაზონას კომპანიის წარმომადგენელმა განუცხადა.

იანდექს ტაქსი ამას მომხმარებელზე ზრუნვით განმარტავს, მაგრამ ამავდროულად აცხადებს, რომ ინფორმაციის გამოთხოვისას საგამოძიებო უწყებები არ აკონკრეტებენ, კონკრეტულად რატომ სჭირდებათ ინფორმაცია — ეხება ის მსხვერპლს თუ დამნაშავეს.

“პრაქტიკიდან ჩვენ ვიცით, რომ ინფორმაციის მიწოდება მნიშვნელოვანია დანაშაულის გამოსაძიებლად და იმ მომენტში ვიღაცის სიცოცხლეს იცავს”, — განაცხადა იანდექსის წარმომადგენელმა.

როსკომსვაბოდას ინფორმაციით, იანდექს ტაქსი არ არის შეყვანილი რეესტრში ინფორმაციის მიმწოდებელთა სიაში, რაც იმას ნიშნავს, რომ მას მომხმარებელთა ისტორიის მიწოდების ვალდებულება არ აქვს. თუმცა, კომპანიის წარმომადგენლის მტკიცებით, ისინი პოლიციის კანონის შესაბამისად მოქმედებენ, რომლის მიხედვითაც, ინფორმაციის გაცემა საჭიროა.

TV Rain-ის ინფორმაციით, ეს საკითხი აქტუალური მას შემდეგ გახდა, რაც ერთ-ერთ გამოცემაში გამოქვეყნდა პოლიციელის ჩვენება, რომელიც ამბობდა, რომ მედუზას ჟურნალისტის საცხოვრებელი მისამართი იანდექს ტაქსის მგზავრობის ისტორიის გამოთხოვით გაიგო. მიუხედავად იმისა, რომ კომპანიის თქმით, მსგავსი ინფორმაციის გაცემას სერიოზულად უდგებიან, პოლიციელის თქმით, ეს ინფორმაცია Mail.ru-ს პირადი ანგარიშიდან გამოითხოვა.

რუსული ტაქსის კომპანია იანდექსი ქართულ ბაზარზე 2016 წელს შემოვიდა.

წყარო : on.ge

ახალგაზრდა ანალიტიკოსთა და მეცნიერთა დარბაზი ,,დოქტრინა“