კატეგორიის გარეშე

იაპონიის დედაქალაქ ტოკიოში მიმდინარე ახალგაზრდულ მსოფლიო ჩემპიონატზე ბატუტზე სინქრონულ ხტომებში ქართველმა გოგონებმა დიდ წარმატებას მიაღწიეს.

კვალიფიკაციაში ქართულმა წყვილმა 44.710 ქულა მოაგროვა და მეორე შედეგი აჩვენა იაპონელების შემდეგ, თუმცა ფინალში მათ შესანიშნავად იასპარეზეს და 44.340 ქულით პირველობა არავის დაუთმეს – 11-12 წლამდელთა კატეგორიაში მაია ბოჭორიძემ და ანა ლაპიაშვილმა ოქროს მედლები მოიპოვეს.

ვერცხლის მედლები რუს გოგონებს (44.280) ერგოთ, იაპონელები (43.870) კი მესამე ადგილს და, შესაბამისად, ბრინჯაოს დასჯერდნენ.

მსოფლიო ჩემპიონატზე იაპონიაში, სხვა ქვეყნების წარმომადგენლებთან ერთად, საქართველოს ტანვარჯიშის სახეობათა ეროვნული ფედერაციის გენერალური მდივანი რუსუდან ხოფერიაც მსაჯობდა.

ახალგაზრდა ანალიტიკოსთა და მეცნიერთა დარბაზი ,,დოქტრინა”

წებოვანი ლენტით მიკრული  ბანანი, რომელიც მაურიციო კატელანის არტ-ინსტალაცია იყო, ნიუ იორკში გამოფენაზე ქართველმა არტისტმა დეივიდ-დათუნამ შეჭამა.

“ეს არის პერფორმანსი სახელად “მშიერი არტისტი,“ – თქვა ბანანის ჭამისას დეივიდ-დათუნამ, წარმოშობით ქართველმა ხელოვანმა, რომელიც ამჟამად ნიუ იორკში ცხოვრობს.

მის ამ საქციელს გამოფენაზე მყოფი მოქალაქეების ნაწილისგან კრიტიკა მოჰყვა, თუმცა, დეივიდ-დათუნამ თქვა, რომ როდესაც ერთი არტისტი მეორე არტისტის ნამუშევარს ჭამს, ეს თავად ხელოვნებაა.

კედელზე წებოვანი ლენტით მიკრული ბანანი – ეს არის არტ-ინსტალაცია მაურიციო კატელანისგან, რომელიც მაიამის ერთ-ერთ სახელოვნებო აუქციონზე 150 ათას აშშ დოლარად გაიყიდა. უკანასკნელი 15 წლის განმავლობაში, ეს პირველი ნაშრომია, რომელიც არტისტმა აუქციონზე გაიტანა.

ნამუშევარს “კომიკოსი“ ჰქვია და სულ მისი 3 ვერსია არსებობს. ორი მათგანი უკვე გაყიდულია, მათი თავდაპირველი ფასი 120 ათასი აშშ დოლარი იყო. თავად ავტორის თქმით, მისი შემადგენელი ერთ-ერთი უმთავრესი ელემენტი – ბანანი, მან მაიამის ჩვეულებრივ სასურსათო მაღაზიაში იყიდა.

ახალგაზრდა ანალიტიკოსთა და მეცნიერთა დარბაზი ,,დოქტრინა”

მსოფლიოში ტექნოლოგიური განვითარების მასშტაბები, ყოველდღიურად იზრდება. რუსეთი ცდილობს არ ჩამორჩეს ამ ტენდენციას და სახელმწიფო დონეზე ხდება, როგორც ხელოვნური ინტელექტის, ასევე რობოტიკის განვითარების ხელშეწყობა. ამჯერად, სოციალური პოლიტიკის სამინისტროს დაკვეთით “სკოლკოვოში” შეიქმნა ბოტი, სახელად “ვასილი”, რომლის სრულყოფაზეც, რუსი ტექნიკოსები და მეცნიერები სამი თვე მუშაობდნენ და ბოტმა წარმატებით გაიარა ტესტირებაც. მისი ძირითადი დანიშნულება, ერთგვარი დამხმარის ფუნქცია იყო, თუმცა მოულოდნელმა უბედურების ზარმა, უშუალოდ საჯარო პრეზენტაციისას ჩამოჰკრა, როდესაც მომხმარებელს, ბოტმა დაბეჯითებით ურჩია, თავის გადასარჩენად, რუსეთიდან გაქცევა. რუსული საბიუჯეტო სახსრებით დაპროექტებული “ვასილი”, ამასაც არ დასჯერდა და მოქალაქეებს დეტალურ რჩევებს აძლევდა, თუ რომელ ქვეყნებში შეეძლოთ მათ გაქცევა, ასევე აწვდიდა საკონსულოების ნომრებს და კოორდინატებს. ბოტის ლოგიკური ალგორითმი, მოქალაქეებისთვის რეკომენდაციების და რჩევების მიცემა იყო, რასაც დამდგარი შედეგის გამო, ოფიციალური შეფასებებით ვასილმა თავი ვერ გაართვა. მომხდარის ახსნისას, Поп-тех-ის ოფიციალურმა წარმომადგენელმა, განაცხადა, რომ „ვასილი“ ჰაკერული თავდასხმის მსხვერპლია და პროგრამა მწყობრიდან გამოვიდა. ამ მომენტისთვის “ვასილის” რეაბილიტაცია/შეკეთება მიმდინარეობს, რასაც რუსული ბიუჯეტი დამატებით 3 მილიარდი რუბლით აფინანსებს.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ფილმ „მანდარინების“ რეჟისორი ზაზა ურუშაძე გარდაიცვალა. ის 53 წლის იყო.

რეჟისორის გარდაცვალების სავარაუდო მიზეზად გულის შეტევა სახელდება.

გავრცელებული ინფორმაციით, ის უქმე დღეს ვაკის საცურაო აუზზე ატარებდა და მეგობრებთან ერთად ტენისს თანამშობდა, რა დროსაც შემთხვევა მოხდა.  მომხდარზე გამოძიება სსკ-ის 115-ე მუხლით დაიწყო, რაც თვითმკვლელობამდე მიყვანას გულისხმობს.

ზაზა ურუშაძე შოთა რუსთაველის სახელობის თბილისის თეატრალურ ინსტიტუტში სწავლობდა, რომელიც 1987 წელს დაამთავრა. 2013 წლის 9 მაისიდან საქართველოს კინემატოგრაფისტთა კავშირის თავმჯდომარე იყო.

2013 წელს გამოვიდა მის მიერ გადაღებული ესტონურ-ქართული პროდუქცია „მანდარინები“. ფილმი ნომინირებული იყო ოქროს გლობუსის საუკეთესო უცხოენოვანი ფილმის ჯილდოზე. ასევე ნომინირებული იყო ოსკარის საუკეთესო უცხოენოვანი ფილმის კატეგორიაში.
ახალგაზრდა ანალიტიკოსთა და მეცნიერთა დარბაზი ,,დოქტრინა”

მანჩესტერის უნივერსიტეტის მეცნიერებმა სამსხვერპლოს თანავარსკვლავედში აღმოაჩინეს რადიოტალღები, რომლის სიკაშკაშეც სამი კვირის განმავლობაში გაძლიერდა. ამის შესახებ ინფორმაციას Science Alert-ი ავრცელებს. 

სპეციალისტები ამ მოვლენას სამხრეთ აფრიკაში რადიოტელესკოპ MeerKAT-ით აკვირდებოდნენ. მათი თქმით, ეს ვარსკლავური სისტემის იმგვარი ნათება იყო, როგორიც აქამდე არ დაუფიქსირებიათ. რადიაციის წყარო დიდი ვარსკვლავის TYC 8332-2529-1-ის ადგილმდებარეობას დაემთხვა, რომელიც დედამიწიდან 1800 სინათლის წელიწადით არის დაშორებული. ეს დიდი ვარსკვლავი კი მზეზე ორნახევარჯერ დიდია. მისი სიკაშკაშე 21 დღის განმლობაში იცვლებოდა.

მკვლევრების აზრით, რადიოტალღები გამოწვეული იყო დიდი ვარსკვლავის მაგნიტური აქტივობით, მაგალითად, მისი გაელვებით. ასეთივე გაელვებები დამახასიათებელია ჯუჯა ვარსკვლავებისთვისაც. მსგავსი ძლიერი განათება შეიძლება ასევე მოხდეს იმ სისტემებშიც, სადაც ერთი ვარსკვლავი გიგანტია, მეორე კი მზის მსგავსია, თუმცა, ამ კონკრეტულ სისტემაში მზის მსგავსი ვარსკვლავები არ არსებობს.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ინდოეთის ქალაქ ჩენაის პლაჟები საშიშმა თეთრმა ქაფმა დაფარა, რაც, გარემოს დამცველთა თქმით, დაბინძურების ახალ საშიშროებას ქმნის.
მედიკოსები მოსახლეობას აფრთხილებენ, სანაპიროებზე გასვლისგან თავი შეიკავონ, ვინაიდან უცნაურმა ქაფმა, შესაძლოა, კანის პრობლემები გამოიწვიოს. ისინი მშობლებს მოუწოდებენ, ბავშვები ზღვის სანაპიროებზე არ გაუშვან.
თამილ ნადუს შტატის დაბინძურების კონტროლის საბჭოს განცხადებით, მათ ქაფის ნიმუშები ანალიზისთვის უკვე აიღეს.
ექსპერტები ვარაუდობენ, რომ უცნაური ქაფის წარმოქმნა ბოლო დღეების ძლიერმა წვიმებმა გამოიწვია, რომელმაც ზღვაში დაუმუშავებელი ნარჩენები და ფოსფატი ჩაიტანა. ზოგიერთი მათგანი თვლის, რომ ქაფი სხვა ნარჩენებთან შერეული სარეცხი საშუალებებისგან წარმოიქმნა. მათი თქმით, ჩენაისა და სხვა დიდ ქალაქებში ნარჩენების მხოლოდ 40 პროცენტის გადამუშავება ხდება.
ხელისუფლება შიშობს, 2017 წლის ინციდენტი არ განმეორდეს, როდესაც მსგავსი ინციდენტის შედეგად წელიწადის ამავე პერიოდში ათასობით თევზი დაიხოცა.
ტამილ ნადუ ინდოეთის ერთ-ერთი გამორჩეული ტურისტული ცენტრია, რომელსაც ყოველწლიურად მილიონობით ვიზიტორი სტუმრობს. მარინას სანაპირო კი, რომელიც შტატის ქალაქ ჩენაიში მდებაროებს, ერთ-ერთი ყველაზე გრძელი სანაპიროა მთელს მსოფლიოში.

წყარო : sciencealert.com

მასალა მოამზადა : თამარ ტაბატაძემ 

ახალგაზრდა ანალიტიკოსთა და მეცნიერთა დარბაზი ,,დოქტრინა”

„ხელოვნური ინტელექტი – ეს უცხოპლანეტელია დედამიწაზე და ის ადამიანს არ უნდა შევადაროთ“. „ყველაფერი კეთდება იმისათვის, რომ ჩვენი გონება მეტად განვითარდეს“ და „ჩვენი გონება მეტად ძლიერია ვიდრე ნებისმიერი კომპიუტერი, ან ტექნოლოგია“, – ამბობს სალომე უროტაძე – 20 წლის AI დეველოპერი, რომელიც ილონ მასკის კომპანიებთან – SpaceX და Neuralink თანამშრომლობს, პარალელურად მუშაობს Microsoft-ში, კვანტური კომპიუტერის შექმნაზე, თუმცა, ამ შემთხვევაში, ფიზიკოსთა ჯგუფის წევრია.

ეს მისი საქმიანობების სრული ჩამონათვალი არაა, გარდა ამისა, ის AI-სა და გეიმ დეველოპმენტის მიმართულებით კურსს კითხულობს ნიუ-იორკის უნივერსიტეტში, მომავალი წლიდან კი წაიკითხავს მიჩიგანის უნივერსიტეტში, თუმცა თვითონ, ჯერ არც ერთი უნივერსიტეტი დაუმთავრებია. სწავლობს ქიმიისა და ფიზიკის მიმართულებით და ამბობს, რომ აგრარულ უნივერსიტეტსა და მასაჩუსეტსის ტექნოლოგიურ ინსტიტუტში (MIT) აკადემიური აქვს აღებული, რადგან ფიზიკურად, დრო არ აქვს. 14 წლის ასაკში ის Yager-თან თანამშრომლობდა. ახლა კი  ცნობილი გახდა, რომ მისი ნამუშევრით (ფიზიკის მიმართულებით), ნობელის პრემიის კომიტეტი დაინტერესდა. „მიუხედავად იმისა, რომ ზედმეტად აქტიურად ვარ AI-ზე გადართული, ფიზიკაში ჩემთვის ყველაზე მნიშველოვანი თეორიის წერა დავასრულე, რითიც ნობელის კომიტეტი დაინტერესდა. მიმიწვიეს და სავარაუდოდ, მალე უფრო გრანდიოზულ ამბებსაც გაგაგებინებთ“.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ბუქარესტში ეს წუთია ჭადრაკში 65 წელს ზემოთ ასაკის მოჭადრაკე ქალთა შორის მსოფლიო ჩემპიონატი დასრულდა.

1962-1978 წლების მსოფლიო ჩემპიონმა, ლეგენდარულმა ნონა გაფრინდაშვილმა კვლავინდებურად შესანიშნავად იასპარეზა, 11 შესაძლებლობიდან 8,5 ქულა დააგროვა დააგროვა და პირველი ადგილი დაიკავა.

ნონა გაფრინდაშვილი ვეტერანთა შორის მსოფლიო ჩემპიონის ტიტულს მეშვიდედ (1995, 2009, 2014, 2015, 2016, 2018, 2019) დაეუფლა.

ახალგაზრდა ანალიტიკოსთა და მეცნიერთა დარბაზი ,,დოქტრინა”

ადამიანების დიდ ნაწილისთვის ჭურჭლის რეცხვა ერთ-ერთი ყველაზე უსიამოვნო საქმეა, მაგრამ გირჩევთ, ეს საქმე შეიყვაროთ, რადგანაც ახალი კვლევის მიხედვით, ის გვეხმარება განტვირთვაში და დამღლელი დღის ბოლოს სტრესის დაძლევის საუკეთესო საშუალებაა.

ფლორიდის უნივერსიტეტის მკვლევართა ჯგუფის მიერ ჩატარებული კვლევის თანახმად, თუ დამღლელი დღის ბოლოს ჭურჭელს გარეცხავთ, სტრესისგან გათავისუფლდებით, გონებას დაასვენებთ, კარგ ხასიათზე დადგებით და თავს უფრო კარგად იგრძნობთ.

კვლევა ჟურნალ Mindfulness–ში გამოქვეყნდა და მასში ნათქვამია, რომ თუ გინდათ, სწრაფად და მარტივად გათავისუფლდეთ დაძაბულობისგან, ჭურჭელი ხშირად უნდა გარეცხოთ.

მეცნიერების თქმით, ჭურჭლის რეცხვით ადამიანები ისე თავისუფლდებიან სტრესისგან და დეპრესიისგან, რომ ამის შესახებ წარმოდგენა არ აქვთ.

ახალგაზრდა ანალიტიკოსთა და მეცნიერთა დარბაზი ,,დოქტრინა”