28 მარტს თბილისში “ათასწლეულის ინოვაციის კონკურსის” გამარჯვებულები გამოვლინდნენ. გამარჯვებული გუნდი “ობერტონი” ხუთ სკოლის მოსწვლეს – მარიამ გამრეკელაშვილს, გიორგი რიგიშვილი, ალექსანდრე ქაჯაიას, იონა იობიძესა და სოფიო ჩიხლაძეს აერთიანებს, მათი პროექტი, რომლის წყალობითაც ახალგაზრდები მალე NASA-ში გაემგზავრებიან, მეხსიერებაზე სხვადასხვა მედიკამენტის გავლენას შეეხება.
“ჩვენი გუნდი მუშაობს ბარნის სმარტ-ლაბირინთის ავტომატიზებაზე. ამ ტესტის საშუალებით ხდება საცდელი ცხოველის მეხსიერების შეფასება და წამლებისა თუ ქიმიური საშუალებების მათზე ზემოქმედების ანალიზი. ბიოლოგებს ამ ყველაფერზე დასაკვირვებლად დიდი დროის ხარჯვა და რუტინული სამუშაოს შესრულება უწევთ, რისი აცილებაც შესაძლებელია ჩვენი პროექტის საშუალებით. ის ავტომატურად განათავსებს თაგვს მაგიდის ტენტრში, იწერს მის მოქმედებას და ტრაექტორიას და ანალიზს მზა სახით აწვდის ბიოლოგს. ჩვენი გამოგონება სრულიად ახალი და ინოვაციური ნაბიჯია მედიცინასა და ბიოლოგიაში, რადგან იგი საშუალებას გვაძლევს შევამოწმოთ ახალი მედიკამენტის გავლენა მეხსიერებაზე, და რაც მთავარია, სრული სიზუსტით,” – აღნიშნა ჩვენთან საუბარში მარიამ გამრეკელაშვილმა.
მეორე ადგილის მფლობელი გახდა კომაროვის სკოლის მოსწავლეებით დაკომპლექსებული გუნდი, რომლის პროექტიც მოძრაობის სკანერი გახლავთ. ახალგაზრდები კონკურსის ფარგლებში სტენფორდის უნივერსიტეტში რობოტექნიკის კურსს გაივლიან.
მესამე ადგილზე კი, “აია-GESS”-ისა და სენაკის სკოლა-გიმნაზიის მოსწავლეების მიერ შექმნილი პროექტი “ესკულაპე” გავიდა. ნინო ბულბულაშვილი, მარიამ ბარიაშვილი, გიორგი გეგენავა, გიგი გუგუნავა და ალექსი ტყებუჩავა სულ მალე ბელგიაში გაემგზავრებიან და ევროსფეისის საზაფხულო სკოლაში მიიღებენ მონაწილეობას.
მასალა მოამზადა: თამარ დევდარიანმა
ახალგაზრდა ანალიტიკოსთა და მეცნიერთა დარბაზი “დოქტრინა”
0
